الاثنين، 12 يناير، 2009

في مصر .. فقط

" نشر ليا هذا المقال في كتاب مولوتوف العدد السادس في معرض الكتاب 2008 "
 
 الفصال عادة مستشرية في الشعب المصري ، يعني لو البيّاع قال لك بـ60 هاتقول له بـ50 ، ولو لقيت نفس الحاجة عند بيّاع تاني وقال لك بـ50 هاتقول له بـ40 عشان كدة تلاقي البيّاعين دلوقتي بيقولولك سعر أعلى من السعر الحقيقي عشان لمّا تفاصل تاخدها بالسعر بتاعها أساساً .
ملحوظة : شعبنا الذكي فطن إلى الحركة دي وبقى يدّي Range واسع للفصال .
 الغريب إن نفس الباشمهندس اللي قعد يفاصل ساعتين عشان خمسة جنيه ، بيدفعهم من غير اعتراض لناس مالهاش لازمة زي منادي السيارات اللي مابيعملش حاجة في الحياة غير إنه طول النهار (( تعالى .. تعالى .. يمين .. أيوة .. باااااس )) .
 لو انت واقف في أي طابور ( في دريم بارك مثلاً ) لازم يطلعلك واحد بيعدي من جنبك بكل براءة ويرسم على وشه الأهميّة وباصص لقدّام خالص وبيقول :
" حاضر يا حسن .. جاي أهو .. بس فيه ناس معطلاني ( اللي هو سعادتك يعني ) "
راجل زي ده مالوش حل غير إنك تبص لقدّام برضه وتقول :
" إيه يا حسن ؟ .. عايزني أنا كمان .. طب ثواني "
 والنبي حد يقول لي فانوس رمضان اللي بيتعلق في البلكونة ده إيه لازمته ، ده أنا أمي دخلت عليّا مرة في أول يوم رمضان وقالت لي :
" انت يابني .. رمضان بدأ قوم شغل الفانوس .. حرام كده "
يا نهار أخضر هو بقى فرض كمان وأنا مش دريان ولا إيه ؟!
 لو انت عند أي مدرس بيسأل تلاقي أوّل ما يبدأ الأسئلة كل العيال تتوِّه ، تلاقي نصُّهم بيجيب القلم اللي وقع عالأرض من ربع ساعة ، واللي بيعدل في الكرسي ، واللي قاعد يحشر سنون في القلم .. لحد ما يخلص أسئلة تلاقي كلّهم بصّوا له مرة واحدة كأن شيئاً لم يكن .
 لو انت في ميكروباص تلاقي فيه ميل نفسي عند الركّاب إنهم يدفعوا الأجرة من أعفن فلوس معاهم وأكترها تقطيعاً عملاً بالحديث الشريف (( حب لأخيك ما تحب لنفسك ))
ملحوظة : لازم كل مرة هاتلاقي واحد بريء بيدفع مجمّد والناس تديله الباقي من الفكة اللي معاهم في شماتة ( حاول مايكونش انت الواحد ده )
 أشهر مسجد في كل محافظة اللي بتلاقي الناس كلها بتصلي فيه مابيبقاش فيه ميزة غير إنه بيبدأ الصلاة آخر واحد وبيخلّص أول واحد !!
 لو سألت حد في الشارع عن مكان أي حاجة هتلاقيه غالباً يفكّر شوية وبعدين يقول لك : " مشّي شوية كده وبعدين اسأل " ( لا والنبي !! )

هناك 3 تعليقات:

angel يقول...

على فكره احنا علمنا الاجانب اللى فى مصر برده انهم يفصلوا
بصراحه انا مبحبش الفصال ليه يعنى كده فيها ايه لو قال سعر ميظلمش نفسه ولا يظلمنى ولا لازم نعرفه انه حرامى
فى مصر ايضا
الشعب كله بيبقى عامل نفسه ابو العريف

حسام غانم يقول...

angel

أنا متفق معاك فعلا
هي الفكرة إن كل واحد بيقول
ليه أكسب أقل لما ممكن أكسب أكتر
فبالتالي بيبقى متوقع من الطرف التاني إن هو كمان بيبقى بيستخدم نفس المبدأ ده

شكرا لمرورك

Hajar Jackoub يقول...

مش عارفة ليه الناس معلقتش على البوست ده مع إنه جاااااااامد جدا :)
بس هوا فانوس رمضان مضايقك في ايه!!