الاثنين، 26 يناير، 2009

كرة يد

بقالي كام يوم قاعد بتفرج على كرة يد !!

ميزة كرة اليد - أو عيبها مش متأكد - إنها بتعتمد على النفس الطويل في اللقاء واللي يلعب حلو يكسب .. مش زي كرة القدم ممكن فريق يكسب بغلطة أو بهجمة مرتدة .

بطولة العالم .. مقامة في كرواتيا .. ومنتخبنا الله يباركله خلاص جابلي الضغط !!

مصر في كل الماتشات بتيجي في أول الماتش وتبقى مغلوبة بفرق تلاتة أربعة وتفضل طول الماتش متأخرة .. ونقعد احنا بقى نحسب الفرق .. ونشجع .. ويلا يا ولاد الفرق أربعة نقطع الكورة دي ونجيب هجمة مرتدة .. تيجي الكورة جاية جون .. خلاص مش مشكلة الفرق خمسة يلا شوط يا حسين .. نايس يا ولد .. نصدّ دي بقى .. يلا يا نقيب .. جامد يا ابني .. باصي على طول يلا .. أيوة يلا يا أحمر .. أوباااا رمية جزاء .. لازم دقيقتين بقى .. نايس يا حكم .. نجيب دي يا حسين .. ياااه حرام عليك .. يلا يا جدعان .. اللعيب ده لوحده ليه ؟ .. يا جدعان دافعوا زي الناس الله يكرمكوا .. باصي للجناح .. حلوة يا ولد .. لااااا يا حكم مش دايس عالخط .. يا رب الكورة دي تضيع ....

وهكذا على ما الماتش يخلص يكون الواحد جاله الضغط فعلا !!

الواحد بييجي على آخر الماتش كده واحنا مغلوبين بتلاقي عندك أمل بطريقة عجيبة .. اللي هو إن شاء الله يا رب دلوقتي الفرق ستة وفاضل تلات دقايق .. يبقى ميجيبوش اجوان واحنا منضيعش ولا كورة بقى .. وبعدين يجيبوا فينا جون تقول يوووه خلاص ميجيبوش تاني بقى.

يمكن الطريقة دي بتحصل في الكورة .. بس مش في الماتش نفسه .. لأ .. في طريقة حساب النقاط في جدول الدوري .. يعني بما إن أنا زملكاوي بتيجي عالآخر برضه وتقعد تحسب حاجات عجيبة .. شوف لو احنا فزنا كل الماتشات الجاية والأهلي طبعا هيتغلب مننا ومن الاسماعيلي .. وممكن يتعادل مع الترسانة والمصري بقالهم فترة كويسين .. وربنا يسهل ويخسر كمان من المقاولين ونبقى كده الأول !! الواحد يتبسط بالحسبة دي ويخش ينام عشان يصحى يلاقي الزمالك اتغلب من المحلة !!

من الأمراض .. يمكن كرة اليد تقدر تجيب الضغط من التوتر اللي في الماتش .. إنما القدم يمكن مناسب ليها أكتر السكتة القلبية مع الهدف المفاجئ سواء ليك أو عليك.

ربنا يحمينا كلنا من الضغط والسكتة الـ....

استنوا .. قشطة دي مصر جابت جون وبقى الفرق خمسة ..

يا مسهل ..

هناك 10 تعليقات:

مذكرات مشاغب يقول...

واديني اول تعليق كمان اهه
على فكره انا بستمتع بكرة اليد اكتر من كرة لقدم
الاجوان بتكون كتير
واللعب بيكون سريع
عكس كورة القدم
وشايفها تستحق تكون اللعبه الشعبيه الاولى في العالم هي والتنس والفورمولا 1
ثانيا باه انا زعلت منك لما لاقيتك زملكاوي
ليه ياعم مستحمل كل ده
ههههههههههههههههههه
لا طبعا بهزر معاك على الرغم اني اهلاوي وفخور بفرقتي طبعا

تحياتي

حسام غانم يقول...

شكرا لتعليقك دكتور أحمد

أنا بحب كرة اليد فعلا .. فيها إثارة كده

أنا من كفر الشيخ برضه بالمناسبة

EL-KEBLAWY يقول...

أهى مصر فازت النهارده أهه

أنا شخصيا ماتشات اليد بتتعبنى جامد

عن القدم مثلا

مبعرفش أتفرج على ماتش يد بحاله

د/عرفه يقول...

بس شكلك يا حسام بيبقى عندك امل زياده عن اللزوم شويه

متحاولش يا بنى تعشم نفسك كده بزياده

خليكى واقعى شويه

يعنى مثلا انا زيك زملكاوى ومش عايز منهم اكتر من انهم يفضلوا فى الممتاز ومينزلوش درجه تانيه
ههههههههههههههههه

حسام غانم يقول...

شكرا لتعليقك قبلاوي و دعرفة

والله أنا في الفترة الأخيرة وصلت لحالة الاستسلام دي

وأقول خلاص معدتش هتضايق

بس برضه الزمالك ما شاء الله عليه دايما بيفاجئني ويتعدى خيالي

angel يقول...

بصراحه انا ملييشى فى اى نوع من انواع الكوره اقصد( المشاهده الغبيه )وبصراحه مبحبش اتفرج على اى ماتش ومبحبش اى واحد متعصب لفريق لانه بيستفزنى بس هو ده الشعب المصرى يجى فى الهايفه و......

حسام غانم يقول...

angel

أحسن ناس
مريح دماغك انت من الكلام ده

هو اللي بيتفرج على كورة أو بيشجع فريق
فده بالاضافة يعني لأنه بيستمتع بالمشاهدة أو بيتسلى

فانه بيرضي بيها عاطفة الانتماء عنده
( الحاجة إنك تكون منتمي لمكان وبتدافع عنه )

غير معرف يقول...

انا ما بحبش الكوره لكن بحب كره اليد جدا واللى بيتنرفزنى اكتر انى الاقى حد بيتعصب و هو بيتفرج على الماتش بجد اختارت صح

غير معرف يقول...

انا ما بحبش الكوره لكن بحب كره اليد جدا واللى بيتنرفزنى اكتر انى الاقى حد بيتعصب و هو بيتفرج على الماتش بجد اختارت صح
جدا يا حسام

غير معرف يقول...

انا ما بحبش الكوره لكن بحب كره اليد جدا واللى بيتنرفزنى اكتر انى الاقى حد بيتعصب و هو بيتفرج على الماتش بجد اختارت صح يا حسام