الاثنين، 18 يناير 2010

أفاتار


السلام عليكم

وحشتوني جدا يا ولاد

ووحشتني المدونة

مش عارف ليه بقالي فترة مبكتبش فيها

رغم إن عدت أحداث كتير تستحق الكتابة

الجزاير ونجع حمادي وقتل الجندي وظهور العذرا والتغيير الوزاري وحاجات كتير

بس خلاص المواضيع قتلت بحثا

شكرا لكل اللي سأل عليا الفترة اللي فاتت نافر نافر

ربنا يخليكوا يا رب

أثناء جولاتي النتية التقليدية

عرفت إن فيلم جديد نازل اسمه أفاتار Avatar

كويس

شوية والفيلم نزل وبسرعة تصدر الإيرادات

وحقق مش عارف كام مليار

وشوية شوية قعد يتقدم في تصنيف أفضل الأفلام على مر التاريخ

لحد ما بقى ضمن أفضل 50 فيلم

الواحد بدأ يتشد ويقرا عنه

التعليقات في كل حتة بتقول إن الفيلم ده تاني أحسن حاجة اتعملت في الحياه بعد اختراع البطاطس المقلية

وبيقولوا إنه معمول بتقنية جديدة هي تقنية الثري دي

زي السيميلاتور كده

وإن المخرج بتاعه هو مخرج فيلم تايتانيك وإنه بيجهز للفيلم من 12 سنة

قلنا خلاص بقى

وشدينا الرحال إلى سينما سيتي ستارز

ولبسنا النضارات المخصصة

ودخلنا الفيلم

وياللهول

إيه الفيلم ده

إيه التكنولوجيا دي

الفيلم ثري دي فعلا

اللي هو تحس إنك جوه الفيلم

اللي هو في وسط مشاهد القتال وحركة الكاميرا تلاقي فوهة البندقية في وشك وبتضرب

اللي هو البطل ينط في البحر والمية تطرطش عليك

حتى الترجمة

عاملينها مش فوق الشاشة وخلاص

لا متفاعلة مع الفيلم برضه

تلاقيها فوق الكرسي

جنب المكتب

تحت الترابيزة

واحد ينزل بإيده عليها يشيلها

أكيد بيهزروا

فيلم تلات ساعات من غير لحظة زهق

ولما تيجي الاستراحة اللي في النص تلاقيك متضايق وعايزها تخلص

وأول ما الفيلم خلص الناس كلها قعدت تصقف

خلصنا الفيلم وقلنا ناكل رحنا الـfood court طبعا فوتنا كنتاكي وكوك دور والحاجت التقليدية دي

ولقينا مطعم آسيوي كده أثار طبيعتنا البطريقية

وكلنا وجبة المهراجا J

ورجعنا سعداء

فيلم حلو فعلا وتجربة جديدة

وعليك عزيزتي البطاطس المقلية .. أن تكتفي بالمركز التاني ..!!

هناك 31 تعليقًا:

Lady E يقول...

اول تعليق بعد العودة

Lady E يقول...

الفيلم فعلا اخد شهرة كبيرة جدا

وكلامك عنه مشوق

ان شاء الله هشوفه بعد الامتحانات

دمت بخير وبلاش الغيبة الطويلة دي تاني

المجاهد الصغير يقول...

السلام عليكم
شارك معنا حمله مليون توقيع تضد جدار العار
لا للجدار لا للحصار

http://www.amlalommah.net/nogedar/

قبلاوى يقول...

أخد تجهيز 12 ساعه بحالهم

كل اللى أعرفهم شافوا الفيلم ما عدا أنا ...

بس انت بتستعبط على فكره ،، مقلتليش ليه انكوا رايحين يوم الأحد

حسام غانم يقول...

Lady E
========

ألف مبروك أول تعليق يا ليدي

ليكي تلاتة جنيه خمسة وسبعين

ربنا يوفقك في امتحاناتك

وإن شاء الله تلحقي الفيلم

حسام غانم يقول...

المجاهد الصغير
===============

وعليكم السلام يا مجاهد

إن شاء الله أشارك

حسام غانم يقول...

قبلاوى
========

يااااه عليك حاجات يا قبلاوي

12 سنة يا سيدي

ابسط

ميرام يقول...

(:
شوقتني لدخوله
مع اني مش من محبي السينما
عودا حميدا
(:

حسام غانم يقول...

ميرام
=======

شكرا ليكي يا ميرام

وإن شاء الله الفيلم هيعجبك متقلقيش

منوراني دايما

شلاطة يقول...

انا شفت الفيلم دا
بس نزلته من عالنت
فيلم حلو فعلا
والحلو فيه انه ربط بين الافاتار والبشر بقصة حب لدرجة انه في النهاية حبوا بعض بجد

ودا الفرق بين صنعاة السينما بره وجوة
جوة بيتهايفوا وبرة بيشتغلوا
سلام

norahaty يقول...

لولولوىىى
حمدلله على السلامة
يادكتور حسااااااام
بركةاننا شفناك بخير وكمان
بتروح سينمات وبتتفرج على
افلامات:)شووووووقتنا للفيلم
وللفرجة عليه ربنا يسهل واروحه.

شمس النهار يقول...

اولا حمد الله علي السلامه

ايه الغيبه دي
يارب تكون غيبة خير

بيقولوا فعلا الفيلم جميل جدا

سلام

حسام غانم يقول...

شلاطة
======

القصة حلو فعلا

وفيها اسقاط حلو عالواقع

بس فاتتك تكنولوجيا الثري دي

حاجة وهم

نورتني يا شلاطة في أول زيارة وإن شاء الله نشوفك على طول

حسام غانم يقول...

norahaty
===========

الله يسلمك يا دكتورة

كنت مفتقد تدويناتك فعلا

شوفي الفيلم ومش هتندمي وابقي تعالي قولي ايه رأيك

منوراني دايما

حسام غانم يقول...

شمس النهار
===========

الله يسلمك

معلش والله عالغيبة دي

وإن شاء الله مش تتكرر


نورتي البوست كالعادة

شمس بقى :)

Khaled Selim يقول...

إنتا كده حسستني إني متفرجتش على حاجة

للأسف أنا شفته في الهيلتون .. حاجة كده بخماشر جنيه وكل عام وأنتم بخير ..

يا راجل ده أنا دخلت ظرف طارق بخمسة وعشرين جنيه في طنطا .. أقوم لما أدخل فيلم زي ده وثري دي .. أسيب الدنيا كلها وأشوفه في الهيلتون بخماشر جنيه والنظارة ببلاش كنوع من الدعاية والتسهيل على المواطنين ؟؟؟؟!!

يا ريتني كنت روحته في سيتي ستارز أو جرين بلاظا ههههههههههه

متعوضة إن شاء الله

حسام غانم يقول...

Khaled Selim
==============

ولا يهمك يا سيدي متعوضة إن شاء الله

بس نفسي أعرف الترجمة عاملينها كده إزاي

دي المفروض مش تبع الفيلم يعني

أكيد واحد مصري بيفهم أبدع الموضوع ده

منورني دايما يا واد

لاسع افندى يقول...

سيبك من الفيلم المهم اخبار المطعم ايه



تحيه لاسعه

dr chaky يقول...

وعليكم السلااااااام...........اخيرا عديت مرحله الrefractory period
الطويله ورجعت الحمد لله لينابالسلامه..........امابالنسبه للفيلم كل اللى شافه بيقول انه حلو اوى وكنت عايزه اروح اشوفه.....قلى بقه عشان اعمل الرحله دى محتاجه احوش كاااام؟؟

د/عرفه يقول...

كيفك يا حسام

وحشنى والله فعلا وفرحت جدا برجعوك

انا شوفت موضوعك من يومين بس معرفتش ارد لانى كنت لسه بمتحن

عموما
انا قولت حسام خلص امتحانات ويبدع فى الاجازة
بس الظاهر انت بتكتب فى الدراسة بس
هههههههههههه


بالنسبة للفيلم انا شوفته فى المنتديات بس كان لسه تصوير سينما
بس صحيح سمعت كده خبر بس مشوفتش تفاصيل انهم لغوا عرض الفيلم ده فى الصين
بس الصراحة مشوفتش تفاصيل للموضوع ده

حسام غانم يقول...

لاسع افندى
============

المطعم زي الفل

حاجة عجيبة كده اللي هي الفراخ عليها شطة وسكر :)

نورت البلوج بمرورك اللاسع :)

حسام غانم يقول...

dr chaky
=========

الله يسلمك يا دكتورة

الفيلم حلو فعلا وميتفوتش

قدامك حل من تلاتة

سينما الهيلتون

التذكرة بخمستاشر جنيه

أو سينما سيتي ستارز

فيه الحفلات الصباحية أعتقد بخمسة وعشرين أو خمسة وتلاتين

والحفلات المسائية من أول الساعة 4 بخمسين جنيه بالنضارة


بالإضافة طبعا للمواصلات

ولو نزلتي في رمسيس يبقى لازم سندوتشات من على بركة الله وموز بلبن من عند أولا ناصر


نورتي البلوج يا دكتورة

وإن شاء الله يدوم التواصل

حسام غانم يقول...

د/عرفه
=======

ازيك يا عرفة بيه

مبروك الأجازة يا سيدي

يبدو فعلا إن الدراسة بتثير كل المواهب اللي في الحياه

بدل المذاكرة يعني :)


منورني دايما :)

dr chaky يقول...

متشكره جدا

osama44 اسامه 44 يقول...

ازيك ياحسام
انت عامل ايه
بجد وحشتنا
ياريت متغيبش تانى

حسام غانم يقول...

osama44 اسامه 44
===================

ازيك يا أسامة

أنا الحمد لله تمام

شكرا على سؤالك

منورني دايما

Saydalanya Mat7oona يقول...

حمد الله على السلامة

وحشتنى كتاباتك

:))

حسام غانم يقول...

Saydalanya Mat7oona
====================

الله يسلمك يا صيدلانية

انت أكتر والله

منوراني دايما

GHALLAB 55 يقول...

أفاتار

تكريس أسلوب حياة الجلاد

العاب النادي يقول...

يعطيك العافية

العاب يقول...

well done