السبت، 14 فبراير، 2009

نظرة نفسية على الدروس الخصوصية

"مقال ليا نشر في مجلة TRL العدد الأول"

قعدت كتير أسأل نفسي إزاي بدأت الدروس الخصوصية ..

ومتهيألي البداية كانت من المدرس نفسه اللي حاول يزوّد دخله فجابله عيلين تلاتة (من قرايبه غالباً) وادّاهم درس في مادته .. فطبعاً العيال بييجوا في حصة المادة دي في المدرسة بيبقوا واخدين الكلام ده قبل كده فتلاقيهم مش مركِّزين وممكن يشغلوا باقي الفصل. واللي حصل مع العيلين دول في مادة معينة أكيد حصل مع غيرهم في مادة تانية وهكذا فتلاقي العيال مش عارفة تركّز في حصص المدرسة فيلجأوا للدروس .. لأ واللي زاد وغطّى موضوع أعمال السنة ده كمان اللي بيجبر العيال إنّها تاخد عند مدرس الفصل عشان ياخدوا درجات أعمال السنة كاملة .

 

ودلوقتي لو حد فكّر إن احنا ممكن نلغي الدروس خالص على بتوع الثانوية مثلاً عشان هيه مش هتفرق فبدل ما الواد يكون الـ17 وهو جايب 99٪ هايبقى الـ17 برضه بس وهو جايب 94٪ مثلاً وبكده مش هتفرق حاجة في الكليات بس هتشيل مصاريف الدروس اللي واكلة نص مرتبات الناس. بس طبعاً الفكرة دي لو اطّبقت هتفشل من أول يوم، هاتقولّي ليه... أقولك، طبعاً الواد اللي قولنا هيطلع الـ17 ده هايفكر طب ليه أنا ماخدش درس من غير ما حد يعرف وأطلع الـ9 مثلاً ، وحتى لو هو ما عملش كده في الأول أكيد هايبقى شاكك في كل زمايله إنهم بيعملوا كده فهيعمل كده في الآخر برضه .

 

وطبعاً إخوانّا المدرسين هيقولولي إيه يا عم انت؟ انت هتبصلنا في لقمة عيشنا ماتسيبنا نسترزق... بس أنا شايف إن مش كل المدرسين بيسترزقوا من موضوع الدروس ده، فتلاقي في كل مادة فيه مدرس واحد هو اللي مكوّش على معظم الطلبة و مجموعته 60 واحد وبياخد على قلبه قد كده والباقي يا عيني يا دوب عيل ولا اتنين .

 

وأنا حاسس إن احنا عدّينا عصر النقلة من المدرسة للدرس، احنا دلوقتي في عصر النقلة من درس لدرسين في المادة الواحدة. فالواحد بيبقى قاعد في المجموعة الـ60 نفر دي تركيزه ضايع بسبب الناس اللي بتاخد درس تاني في البيت في نفس المادة وطبعاً برضه واخدين الكلام ده قبل كده و.....

 

الصفحة خلصت !!!

هناك 30 تعليقًا:

المـــفـــــــقــــــــوعـــــة مــرارتـهــا يقول...

تفسير منطقي مااقدرش اقوووول حاجة عنه
انا مثلا لما بأحضر الدرس مع ابني قبل ماياخده في المدرسة بيروح يشوشر علي اصحابه والميس تشتكي
بيني وبينك ياحسام المدرسين دول عمالين ذي المنشار طالع واكل ونازل واكل
تحياتي

مهندس / على درويش يقول...

فعلا هي مشكله
بدايتها انت أقترحتها لأن بدايتها كانت سهله
أما النهايه أصبحت صعبه زي مانت قلت

فعلا الموضوع جامد ويهم كل الناس من الفلاح للوزير لأنه كله بيدفع

فكرة من الزمن ده يقول...

الدروس بقت زي المعضلة اللي ماينفعش فيها اي حلول من ع الوش لازم حل جذري من الاساس زي مابدات من الاساس زي ما انت فكرت فييها.
لازم تتحل من الاساس
يعني يلغوا المدارس والناس تاخد درومس خصوصية في المدرسة في الوسع والقعدة مريحة بدل ترابيزة السفرة والسبورة كبيرة بردو
شكرا ليك

iBRAHiM sAllAm يقول...

و الله ما أنا عارف أقول إيه يا حسام ,

المشكلة إن المستفيد من الدروس دي هم قلة من المدرسين و ليس جميعهم ,

لكن بيسيؤوا لسمعة المدرسين كلهم ,

و الحمد لله إن الواحد خلص تعليم على خير
و للأسف الواحد مش لاقي حل لمشكلة التعليم غير إن الواحد ما يخلفش خالص , أو يخلف و يدخل ولاده مدارس أجنبية و بدل ما يطلعوا مسلمين مش متعلمين , يبقوا غربيين متعلمين !!

مافيش فايدة !! :(

مذكرات مشاغب يقول...

طيب دلوقتي انت طرحت مشكلة الدروس الخصوصيه
واقترحت حل وقولت ازاي هو مينفعش
طيب وبعدين
ايه يا عم الحج
انت بتضحك علينا ولا ايه
انا كان عندي فكره مجنونه كده للقضاء على مشكلة الدروس الخصوصيه
بس لا يمكن هتطبق خلال الفتره القادمه اصل فيها انقلاب على النظام التعليميواللينك بتاع لموضوع اههhttp://mosha3eb.blogspot.com/2008/12/blog-post.html

تحياتي

د/محمد الخطيب يقول...

همممممممممممممم
جميل ياحسام التفكير بالطريقة دى
بجد حاجة قوية يعنى
بس برده للأسف عشان تقنع واحد أو اتنين بالموضوع ده بتاخد تلات او اربع ساعات
فعشان تقنع باقى الناس هتاخد بتاع تلاتــ ..........!!!

هممممم ولك تحياتى

د/عرفه يقول...

معاك حق يا حسام
كل شويه الموضوع بيزيد ومش بيقل
المشكله انها بقت القاعده كمان عندنا فى الكليه
بقى معظم الناس بتاخد كورسات وبقى ده الاساس
والطلبه بقت زى ايام الثانوى بتسال هو فلان الاحسن ولا علان
وبقت دى المشكله
طيب اخد بريفت ولا فى الكورس عادى مع الناس

بس بصراحه مش عارف هى مممكن تتحل امتى المشكله دى

حسام غانم يقول...

المفقوعة مرارتها

أنا سعيد جدا بتشريفك يا أستاذة سحر


فعلا المدرسين دول زي المنشار

والدروس من أهم أسباب فشل التعليم في مصر

برغم إنها كمان بتضيع نص مرتبات الناس

حسام غانم يقول...

مهندس/علي درويش

ربنا يخليك

وشكرا لتعليقك

حسام غانم يقول...

فكرة من الزمن ده

شكرا لتعليقك

فعلا مشكلة الدروس

محتاجة قرار سيادي من فوق

لأن كده سنة ورا السنة التعليم بيتدهور أكتر

حسام غانم يقول...

ibrahim sallam

شكرا لردك

حسام غانم يقول...

مذكرات مشاغب

شكرا لتعليقك

أنا قريت موضوعك وعجبني جدا

بس هي الفكرة فانتازيا شوية

لأن الدروس مش مجرد شرح حلو

لأ .. ده المدرس الخصوصي بيجيبلك توقعات امتحانات ويحل لك نماذج الوزارة ويشطبلك الأجزاء المش بتيجي ويعمل لك اسكيمات وأغاني تحفظ بيها الموضوع

بيسقيك المنهج بالمعلقة

وده مش مطلوب

عشان المفروض الطالب يبتكر ويحل بنفسه ويحفظ بنفسه

حسام غانم يقول...

الخطيب حبيبي

ربنا يخليك

وميرسي لردك

salma mohamed يقول...

السلام عليكم
لا الموضوع ده شكلك كاتبه من زمان,
والله في مجموعات عند بعض الاساتذه عدت المئة,وبقى المدرس بس للشرح السريع,اما بقى المتابعة والتصحيح والامتحانات والشرح للطلبة اللي كانوا غايبين بقى من تخصص السكرتاريا اللي هما مدرسين في نفس المادة بس لسه في بداية المشوار,
وبالنسبة بقى لان العيال بتاخد درسين في المادة,فو الله اعرف اللي بياخدوا 3 دروس في نفس المادة,
وبتقول جايب 99% وطالع ال17
دا كان زمان والله جايبين 100% ومش طالعين حاجه خالص,
اصل احنا بقى التعليم بيتسقى بالمعلقة,
بس المشكلة ملهاش طرف واحد,المشكلة اكبر من كده ولو جيت تمسكها من طرف تلاقيلها مليون طرف تاني,
يعني باختصار حلقه مفرغه,
معلش آسفة على الاطاله.

Ahmed Al-Sabbagh يقول...

تم العثور على حفرية للمدرس الأول تعود لزمن جيولوجى بعيد
أثبتت أن بعض المدرسين الأوائل لجأوا لإعطاء دروس خصوصية للحماية من التعرض للإنقراض بفعل الغلاء الذى ساد فى العصر البلايستوسينى الأول
:)

إنت رائع

TIMMY !! يقول...

فكرتني بأيام الثانوي يا حسام ,
كانت طالعة عندنا موضة درسين في الفيزياء , واحد نظري و التاني مسائل ,
و درسين في رياضة اتنين برضه ,

الحمد لله إن الواحد خلص تعليم , مش عارف صراحة الواحد هيعمل إيه في عياله في المستقبل ؟؟

ربنا يستر علينا !!

حسام غانم يقول...

salma mohamed

هو الموضوع أنا كاتبه من فترة فعلا

المدرسين دلوقتي بقى ينطبق عليهم فعلا لفظ أباطرة الدروس الخصوصية
حاجة كده زي أباطرة المخدرات
وبقى ليهم ناسهم في الوزارة
وناسهم في الضرايب
عشان يظبطوهم

شكرا لتعليقك ومتابعتك

حسام غانم يقول...

Ahmed Al-Sabbagh

ههههههههه

جملة جامدة جدا

شكرا لردك

حسام غانم يقول...

TIMMY

ربنا يستر فعلا

متهيألي بعد كده الواحد هيبقى يعمل ميزانية لدروس الأولاد قبل ما يتجوز زي الشقة والعفش كده

شكرا لتعليقك

موناليزا يقول...

التنافس بقى دلؤتى للى ياخد اكتر من درسين فى المادة الواحدة
كان الله فى عون اولياء الامور

حسام غانم يقول...

موناليزا

بالظبط والله
ربنا يكون في عونهم

شكرا لتعليقك

فكرة من الزمن ده يقول...

شكرا على تعليقك على بوست وقعتكو سودة وتم تنزيل تنويه للتوضيح

فتافيت يقول...

ههههههههههههههههه اقولك حاجة بس اوعى تجيب سيرة لحد

في ثانوي كنت بكرهه الفيزيا كره عما يااااااااه زفت عليها

كنت باخد درس من ابو ستين واحد في المجموعة .. وواحد انا و4 بنات صحابي .. وواحد انا لوحدي في البيت

ده كله علشان في الاخر اجيب كام تخيل كده كام






















36.5 من 50 .. برااااااااااافو عليا

وتقوللي نلغي الدروس واحدة زي
لو من غير 3 دروس في الفيزياء كانت سقطة فيزيا

اقول اللي يفقع المرارة بقى .. دخلت كليه ايه تخيل والله تخيل



















علوم فيزيا عااااااااااااااااااااااا

اه والله العظيم يا حسام


بس ماقدرتش اكتر من سنة.. اصل انا لو قعدت وبطرقية دروسي احتمال ابيع ابويا عفش البيت .. وماضمنش انى انجح

ربنا يخلي الدروس ويخليه لامه
نيهههههههههاي

جروب الاسلام يقول...

دروووس درووووس
كفاية دروس بقى
يعنى احنا اهو فى تالتة اعدادى ولا نعرف المدرسة ولا بنشوفها
عشان مفييش اعمال سنة ومعتمديين على الدروووس
ولكن
والله نفسنا نرجع للمدرسة ونبطل درووس
بس نلاقى المدرسين اللى بجد بيدرسوا بذمة وضميير ويخدوا بالهم مننا
ولكن
ولا حياة لمن تنادى
وتحياتى اليك
وتسلم
ريحانة الاسلام

حسام غانم يقول...

فكرة من الزمن ده

أها
كده بقى واضح ومفهوم

حسام غانم يقول...

فتافيت

هههههه
وعلوم فيزيا كمان


لا بس أنا كنت بحب الفيزيا دي في الثانوي
ومسائل وبتاع


شكرا لتعليقك

حسام غانم يقول...

ريحانة الإسلام

والله هي حلقة مفرغة

الطلبة بيقولوا السبب المدرسين
والمدرسين بيقولوا السبب الطلبة

ربنا معاكوا

وشكرا لتعليقك

MǿиY El-Shreef يقول...

الحمدلله يااارب

مابخدش دروس ولا ببص ف خلقت مدرس

لسببين

الاول اني عايشه ف السعودية

والمناهج مش محتاجه دروس

والتاني ان كل الي بيدونا مدرسااات :D

اسجل اعجااابي الواضح بكل كلمه بتقولها والله

حسام غانم يقول...

MǿиY El-Shreef
===============

أنا كمان عشت فترة من حياتي في السعودية

وأحب أسجل إعجابي بالعملية التعليمية عندهم


مرور جميل
نورتي البلوج

عرب بس يقول...

مدونة رائعة ومواضيع جميلة ... المواصلة والمتابعة والاضافات الدائمة والتجديد سبيل التميز فى عالم المدونات

عرب بس http://arabbas.blogspot.com

تعليم كمبيوتر تعليم انترنت دين ممتع ثقافة لذيذة برامج هامة للنساء فقط من هو؟ سياسة وصراحة أجهزة حديثة تكنولوجيا غريبة كلام أبكانى وأحيانى شاهد ولن تندم إضحك من قلبك