الثلاثاء، 20 يناير، 2009

كبدة حمار

واحنا بناكل مرة عند أصالة لفت نظري في قايمة الأسعار عبارة بتقول كشري بالكبدة يضاف 1 جنيه وعبارة أخرى بتقول كشري بالفراخ يضاف 6 جنيه .. استغربت جدا لهذا التفاوت في الأسعار مع إن كيلو اللحمة المفروض أغلى من كيلو الفراخ .. تلاقي هنا سعر الفراخ قد اللحمة 6 مرات .. ايه تفسير الموضوع ده ؟ أكيد إن المحل بيجيب أسوأ نوع كبدة وهي كبدة الحمار رخيصة الثمن .. بينما الفراخ - للأسف - مهما كانت سيئة ومصابة وكل حاجة فهي في النهاية فراخ فراخ وليست فراخ حمار .
سألت أنا طب ايه بقى اللي يعرفني اللحمة النضيفة من لحمة الحمار ؟
قالولي لو انت بتاكل في محل نضيف بيبيعلك سندوتش الكبدة بـ 8 – 9 جنيه تبقى لحمة نضيفة بس لو بتاكل في محل رخيص السندوتش بجنيه تبقى لحمة حمار على قد فلوسك .
حلو طيب اش ضمنّي إن السندوتش أبو 8 – 9 جنيه ده مش لحمة حمار .. على أساس إنه بدل ما يكسبله في السندوتش 4 – 5 جنيه يكسبله 7 – 8 جنيه ؟
قال لي إن محدش بيعمل كده وإن أنا عندي انعدام ثقة ...
يا خبر أبيض انعدام ثقة !! متكلمنيش عن الثقة الله يخليك .. طبعا عندي انعدام ثقة ..
يا حبيبي احنا في بلد انعدام الثقة ..
مصر لما طلع في دماغها موضوع الخصخصة وبيع القطاع العام قعدت تقنع الناس إن الخصخصة هي الحل وهتدخل فلوس بالهبل للدولة وهتسد الديون .. كبدة نضيفة يعني .. وتلاقي القطاع العام بيتباع بعشر تمنه عشان يستفيد من الموضوع ده اتنين تلاتة .. تبقى كبدة حمار !!
لما يسمحوا بدخول عشرات الآلاف من التوك توك في صفقة بيزنس تاريخية .. ثم بعد أن يبيعوه يكتشفوا أنه غير ملائم للشوارع المصرية وأنه خطر عالمرور .. إذن هي كبدة حمار !!
لما تطلع في دماغهم فجأة أمن وسلامة السائقين .. ويطلّعوا قانون يلزم بوجود شنطة الاسعاف والمثلث المضيء .. ثم تجد أن ثمنها حوالي 300 جنيه وأن هناك شركة كبرى قامت بتجهيز الكلام ده للناس وانت مضطر تشتري .. يبقى شغل اتفاقات وبيزنس وكبدة حمار !!
لما تلاقي الريس يعمل تعديل في الدستور عشان يبقى فيه انتخابات رئاسية .. ثم يضع شروطا للترشيح لا تنطبق على أحد .. تبقى كبدة حمار !!
لما يطلع الريس بالفم المليان يقول لا للتوريث .. ثم تجد ابنه رئيس لجنة الشباب بالحزب الوطني .. ثم - بعد عمر طويل - يصبح هو الرئيس الجديد بعد مظاهرات تأييد شعبي حاشدة .. اسمحلي .. فهي كبدة حمار !!
لما تلاقي الدولة الحنونة العادلة بتقول لك تعالى يا حمادة خد نصيبك من أملاك الدولة .. فلتتوجس يا عزيزي .. فإن نصيبك بالتأكيد سيكون سهما في أكثر شركة خاسرة .. لماذا ؟ .. لأنها كبدة حمار !!
يا عزيزي لا تتحدث عن الثقة أرجوك .. فأنا غير مستعد لأن أصدق أن هناك مكانا واحدا في مصر يبيع كبدة عادية مهما كان عدد مفتشي الصحة عليه .. فهم بالتأكيد مرتشون .
بل إنك يا عزيزي لو جئت لي بالفرخة .. ورأيتها أمامي .. ورأيت جناحين وصدر وورك .. فإنني - في هذا البلد - متأكد تماما أنها فراخ .. حمار !!

هناك 18 تعليقًا:

fat7i يقول...

جامد جدا يا حسام !

غير معرف يقول...

جامدة قوى يا حوثام

بس لازم ناخد على لحمة الحمار علشان دى مستقبلنا

وما خفى كان اعظم

ayman يقول...

جامدة

السيد عبده يقول...

انا جوعت يا ولاد

د/عرفه يقول...

انت اول مره تعرف
ان كل حاجه عندنا بكبده الحمار

انت عارف الخطوه الجايه انك مش هتلاقى حتى كبده الحمار دى

مذكرات مشاغب يقول...

جامد جدا جدا الموضوع ده
اسلوبك في كتابته عاجبني جدا جدا
اصلي بحب الاسلوب ده جدا
شكلي هكون زبون دائم على كبدة الحمير بتاعتك دي

تحياتي

DR.SMART يقول...

ايه الحاجات الجامدة دي ..

حلوة جدا ..

حسام غانم يقول...

فتحي
غير معرف
أيمن
السيد عبده
د/عرفة
مذكرات مشاغب
سمر

شكرا عالردود يا جماعة ..

غير معرف يقول...

يعني والله اللي انا اعرفه ان كبده الحمار فيها اعلي نسبه كربوهيدرات فانت لو لقيت الساندوتش حلو زياده عن اللزوم تبقي اكيد كبده حمار
وبعدين اهي تبقي مفيده برضو عشان كده الحكومه بتشجع كبده الحمار وتطبقه في كل حاجه

حسام غانم يقول...

غير معرف

اه فعلا أنا سمعت المعلومة دي

ده حتى فيه مطعم عندنا لحمته رخيصة وطعمها مسكر فعلا

بس بنروحله برضه :)


شكرا لمرورك

غلاب 55 يقول...

بما إن كل شيء ى حياتنا عبارة عن كبدة حمار


فإحنا ممكن نسمى حياتنا دى


حياة حمار .........

حسام غانم يقول...

غلاب 55

هههههه

على رأيك ..

ونعملها فيلم زي حياة حشرة كده


شكرا لتعليقك

هبه جمعه يقول...

هههههههههههه
تحفه الموضوع جدا و اسلوب الكتابه جميل جدا جدا جدا

و واضح اوي على فكره انك بتحب د/احمد خالد توفيق وانا حاسه ان هيكونلك مستقبل جامد اوي في المقالات الساخره زي دكتور احمد كده :))

حسام غانم يقول...

أحمد خالد ده راجل أسطورة !!

شكرا يا هبة على مرورك وتعليقك

mimi يقول...

يبقي أنت أكيد أكيد في مصر

حسام غانم يقول...

mimi
========

بالظبط كده يا ميمي


نورتي البوست

غير معرف يقول...

Online Poker - Free bankroll $50 - INTERNATIONAL players - $ حرّرت خمسون
محراك يحرّر علاوة
من بولندا إحترامات

Khaled Selim يقول...

منه لله اللي في بالي .. هوا السبب .. الشعب المصري دلوقتي من أكثر الشعوب إنحطاطاً على كافة المستويات .. وا أسفاه على الوطن.