السبت، 14 مايو 2011

عن إضراب الأطباء



نتكلم شوية عن إضراب الأطباء اللي بيقولوا عليه ده
بداية كده نحب نوضح شوية حاجات لإخوانا القادمين من الفضاء الخارجي .. الطبيب ده هو الشخص اللي بيكشف على المريض ويشخصه ويكتبله العلاج أو يعمل له العملية
ثانيا نحب نوضح إن الطبيب عشان يبقى طبيب بيدرس في حاجة اسمها كلية الطب ودي مدة الدراسة فيها سبع سنين ده غير التكليف والنيابة وخلافه إضافة طبعا إلى إنها بتاخد أعلى مجموع في الثانوية العامة
ثالثا وزير السياحة أصدر قرار بتحديد حد أدنى لأجور المرشدين السياحيين ب300 جنيه في اليوم و200 جنيه في النص يوم .. ناخد بالنا مع بعض .. في اليوم هه .. اللي هو ال24 ساعة العادي اللي احنا عارفينه ده مش في الشهر

كده بقى أخونا القادم من الفضاء الخارجي فاهم الأساسيات ويقدر يشارك معانا في النقاش .. رحبوا بيه يا ولاد

نبذة تاريخية :)
على مر التاريخ كان دايما دايما فئة الأطباء من الفئات اللي لها مكانة اجتماعية عالية على السلم الاجتماعي .. ومع تطور التاريخ وتغير النظم والظروف كانت بتحصل تقلبات وتغيرات في السلم الاجتماعي ده .. شوية يعلى شأن العسكريين في السلم .. شوية رجال الدين .. شوية رجال الصناعة .. شوية المعلمين .. إلا إن دايما دايما فئة الأطباء محافظة على موقعها في السلم الاجتماعي ..
وده كان صحي جدا ومنطقي
الأطباء دول شريحة منتقاة من النابغين .. ثم بعد كده عشان يبقى مسموحله يعالج مريض لازم يدرس كتير جدا .. ثم يستمر يدرس طول حياته تقريبا
معادلة بسيطة .. تعب كبير يساوي مكانة كبيرة
المشكلة حاليا بقى إن في الفترة الأخيرة بدأ السلم يتلخبط
بدأت فئة الأطباء تنزل شوية بشوية في السلم
لحد ما وصلنا إن فئات كتير سبقتهم آخرهم أهو المرشدين السياحيين
الوضع بقى حاليا مش منطقي وفوضوي والميزان اختل
بقى الواد اللي بيذاكر ويجيب 100% ويدخل طب ده غبي
واللي يجيب 60% ويدخل شرطة ولا يجيب مش عارف كام ويدخل سياحة أحسن منه
وده هيبقى كارثة بعد كده
إيه اللي هيخلي واحد يختار حاجة تعبها كتير وعائدها قليل
طالما قدامه الحاجة الأسهل وكمان عائدها أعلى
ده كان المطلب الأول للإضراب .. المرتبات
المرتبات فعلا مهزلة بلاش أقول لكوا يعني
اليوم بعشرة جنيه باين .. اللي هو لو اديتهم للسباك ولا الكهربائي نظير شغل نص ساعة مش هيرضى بيهم
ومش عارف لما تتجوز يزودولك مرتبك 3 جنيه باين
واللي يدور عن مرتبات الأطباء بره هيعرف
كله مش عارف كام ألف دولار .. حتى الدول العربية .. وهنا مبيكملوش 100 دولار يعني
قلة أدب

تاني حاجة .. الأمن
مينفعش دكتور ( اللي هو اتفقنا إنه حلو وعظيم ومفيش منه )
يخش عليه بلطجية معاهم واحد مصاب يقولوله خيطه ياض بدل ما نغزك
أو إن بلطجية متخانقين مع مريض في المستشفى يخشوا يدوروا عليه ويقتلوه جوه زي ما حصل في مستشفى المطرية
أظن متفقين عليها دي .. على الأقل الدكتور والمرضى يبقوا آمنين على حياتهم يعني

تالت حاجة .. ميزانية الصحة
الميزانية الحالية 3ونص في المية من ميزانية الدولة
ومعظم الميزانية كان رايح للحرس الجمهوري والأمن المركزي والكلام ده
المنظمات العالمية محددة نسبة 15 في المية كنسبة مثالية للصحة
وفي كل دول العالم ماشيين عليها
مش معنى كده إننا لو طبقناها إن مستشفياتنا هتبقى زي أمريكا
لأ .. دي نسبة من ميزانية الدولة .. وهم ميزانيتهم أكبر
بس يبقى فيه نسبة وتناسب
وده هيعود على الخدمة الصحية بشكل عام
مينفعش يبقى معظم الخدمة الصحية عندنا يقدمها القطاع الخاص من مستشفيات خاصة وعيادات خاصة
عشان المستشفيات مفيهاش حاجة .. والتحاليل مش موجودة والخيوط وحاجات كتير
لما الميزانية تتظبط يبقى المريض يقدر يحصل على خدمة صحية عالية الجودة في المستشفيات ويتعمل له تحاليله وأشعاته مجانا
رابعا إقالة القيادات الفاسدة
مينفعش الشخص اللي كان بينقل بلطجية في عربيات الإسعاف وبيديهم وجبات من المستشفيات يبقى وزير الصحة


طيب دي المطالب
فيه ناس بتقول أيوة المطالب مشروعة وكل حاجة .. إنما مينفعش إضراب يعني .. المرضى إيه ذنبهم
الأفضل ناس تروح تقابل المسئولين وتطرح المشاكل والسكك المشروعة المطالب الفئوية والكلام ده
تمام .. والكلام ده تم فعلا بدل المرة ألف ومفيش استجابة .. عشان كده كان التفكير في الإضراب .. وبعدين برضه الإضراب حاولنا إنه يكون ميجيش خالص على مصلحة المرضى .. إن الإضراب لا يشمل الطوارئ والرعاية الحرجة .. إضراب جزئي يعني .. يعني اللي متعور أو عليه ألم جامد وكده هنعالجه طبيعي جدا .. اللي مش هيشتغل بس الحاجات اللي عادي تتأجل لتاني يوم .. يعني واحد عايز يكشف أنف وأذن ولا حاجة عادي ييجي تاني يوم يعني .. هو مجرد رمز مش أكتر .. كان الإضراب الأول إضراب جزئي ليوم واحد يوم 10 مايو .. وبعد كده هيبقى فيه إضراب جزئي مفتوح من يوم 17 مايو .. المشكلة بقى لو مبقاش فيه تحرك بعدها برضه .. ممكن دكاترة خلاص تقول أنا مش شغالة خالص ويبقى إضراب كلي والعيان يتضر .. إنما يعني ما يقدر عالقدرة ..
أنا شخصيا لسه مش عارف بعد الإضراب الجزئي هعمل ايه .. إنما غالبا هشتغل عادي .. صعب جدا يبقى عيان بيموت قدامك وانت تقدر تنقذه وماتنقذوش .. وأرضى بنصيبي بقى وخلاص والحياه تمشي ..
وممكن أفكر أتجوز .. أنا أولى بالتلاتة جنيه برضه ..