السبت، 31 يناير 2009

رحلة

طلعنا امبارح رحلة ..

طبعا مش هحكي تقرير عن الرحلة زي مواضيع التعبير في المدرسة وأقعد أقول " تجمعنا الساعة 7 في انتظار الأتوبيس وقام المشرف بتنظيم الصفوف وركبنا الأتوبيس في سعادة وأمل في رحلة سعيدة تتوج مجهود عام كامل من التعب والجد في الدراسة ويمحو أثر المش عارف إيه " عشان احنا مش في مدرسة يا جدعان .

رحنا أول حاجة الأهرامات .. نزلنا ومشينا شوية كده وقلنا نروح نركب خيل .. جميل .. ركبنا خيل .. وطلع حظي في حصان من النوع اللطيف يبدو إنه كان مستعجل باين أو حب يرجعني بدري .. قعد يجري - الوغد - طول الطريق وأنا قاعد أشد اللجام ويا حبيبي اهدا وهجيبلك حاجة حلوة .. مفيش فايدة .. بقية الأولاد كانوا بيحقدوا عليا عشان كنت راكب حصان بيجري وأنا كنت بحقد عليهم عشان راكبين احصنة زي الناس .. بس عرفت إن الحصان بتاعي مكانش سيء لهذه الدرجة لما واحد زميلي حصانه وقعه عالأرض وقعد يتمرمغ في الأرض ويعمل حركات عجيبة - أعني الحصان طبعا - وحصان تاني بتاع واحد زميلي اكتشف إن الوقت بتاع ركوبه هو الوقت المناسب للتبول .. دفعت في الموضوع ده 15 جنيه .. وأنا مش زعلان عالفلوس بقدر ما أنا معجب بالراجل اللي بيأجر الاحصنة دي .. الراجل قال لنا تاخدوا الرحلة الكبيرة اللي بعشرين ولا الصغيرة اللي بعشرة .. قلناله الصغيرة .. قال ماشي .. وركبنا الخيل .. بعد ما ركبنا جه وقال لنا نحاسبه دلوقتي عشان هو هيرجع .. حاسبناه .. قعد يقنعنا إننا ناخد الكبيرة وإزاي إنها هنلف فيها براحتنا وهنطلع الصحرا ثم بعبقرية " ها هتاخدوا الكبيرة زي زمايلكوا ولا هتاخدوا الصغيرررة " وهو تكنيك عبقري يشعرك بالضآلة ويخليك متتكلمش .. أتذكر أنا مرة بعد ما حلقت عند الحلاق اديته عشرة جنيه فكان معايا زميلي استكتر المبلغ وقعدنا نسأله عن سعر الحلاقة ولو عمل ايه يبقى بكام وكده .. رد علينا " إن ده رزق والزبون هو اللي بيقدّر وإنه مبيتكلمش في السعر غير لو الزبون دافع أقل من المطلوب .. يعني مثلا لو جه زبون عملتله شغل في شعره بـ50 جنيه ودفعلي 25 فهقول له إن ده قليّل" .. شفت المثال 50 جنيه وإداله 25 .. إذن عليك انت أن تصغي وتصمت أيها الضئيل ياللي بتتكلم في اتنين تلاتة جنيه .. يالعبقرية هؤلاء الرجال !!

المهم خدنا الكبيرة بعد ما حسبهالنا بـ15 ورجع الراجل ومشينا شوية ولقينا الواد بيقول لنا نرجع .. سألناه أمال الناس اللي هناك دي ايه مش احنا واخدين الكبيرة ؟ قال دول دافعين 30 جنيه يا عم وراح مرجّعنا ..

سمّه نصب كما شئت .. ولكني لا أستطيع أن أخفي اعجابي وانبهاري .. ده راجل خد مننا 90 جنيه في ربع ساعة من غير ما يبذل أي جهد .. شغل دماعه بس

في حاجة كمان عجبتني في المنطقة عاملين للسياح حفرة كده عشان يرموا فيها فلوس ويبدو أن هناك من يقنعهم بأن هذا قربان للإله رع أو سبيل لحلول بركة الإله آمون .. وطبعا حاطين أسياخ حديد بالعرض فوق الحفرة عشان محدش من الأوغاد ينزل ياخد الفلوس .. الفلوس دي طبعا للإله رع الحقيقي اللي بيلمها آخر اليوم

دول ناس عرفوا إزاي يشغلوا دماغهم صح .. بص للراجل بتاع الأحصنة ده وبص للراجل البائس اللي عنده حصان هنا تأجره منه بخمسة جنيه باين وبيجيله زبونين في اليوم ولتبدي انبهارك وإعجابك معي بالرجل الأول

بعد كده رحنا معرض الكتاب .. كان الوقت ضيق فكنا بنتحرك بسرعة وبنروح على دور معينة بس .. جبت رواية اسمها عزازيل ودي كنت سامع عنها خير قبل ما أروح .. وكذا كتاب مقالات لأحمد رجب ومحمود السعدني وتامر أحمد ومحمد هشام .. وشوية كتب من سور الأزبكية

محمد هشام كان عامل حفل توقيع فمضيت منه كتابه اللي اشتريته وكتب لي ( العزيز حسام غانم خالص تقديري ويارب لا تكون ممن لديهم الحالة ميم ) الحالة ميم هو اسم الكتاب طبعا .. وكان فيه حفل توقيع تاني في دار الشروق للكاتب أسامة غريب .. فكرت إيه السر في موضوع حفلات التوقيع ده ؟ وإيه سر فرحة الواحد لما يتمضى كتابه ؟

سر الفرحة طبعا مش إنه معجب بإمضاء الكاتب على كتابه ولا إنه سعيد إن الكاتب بيقول له " مع تحياتي " أو " خالص تقديري " .. لأ .. هو سعيد لأنه سيكون معه كتابا موقعا من الكاتب يريه لأصدقائه .. إنها ثقافة التفاخر .. لماذا يا صديقي تهرع لالتقاط الصور مع تلك السائحة الشقراء ؟ .. بل لماذا (تتصور) أصلا ؟ .. هل السبب كله كي تجمع ذكرياتك الجميلة في ألبوم، أم أن هناك جزءا من التفاخر وشوف أنا سافرت هنا وهنا واتصورت مع ده وده .. من طراز أنا أكثر منك مالا وأعز نفرا

بعد كده رحنا ملاهي سندباد ولعبنا شوية .. وبعدها طلعنا رحلة نيلية و..

" صعد الطلاب الأتوبيس في سعادة شاعرين بعظمة التاريخ الفرعوني العريق سعداء بما اشتروه من كتب تنمي علمهم وتثري ثقافتهم "

هناك 18 تعليقًا:

غير معرف يقول...

اهى حتة التفاخر دى اللى انا مكنتش فاهملها مصطلح الحقيقة

بس برده اعتقد ان ده على حسب سياسة مخ كل مجموعة بقى عن الحاجة اللى بيتفاخروا بيها

غير معرف يقول...

لا بجد حلوة المدونة دى يا حسام
اهو انا بقى معنديش مفاهيم ولا بتنجان للحاجات دى لان يمكن اكون حد منهم هحطمفهوم على نفسى .. بس اهو سيبها كدا وخلاص
عارف .. الحياة دى فيها كتير محتاج يتغير
بس انها الحياة
الف مبروك ع المدونة دى بجد جامدة

حسام غانم يقول...

شكرا للردود يا عباس وعزمي

=======

الله يبارك فيك يا عزمي

غير معرف يقول...

بصرف النظر عن الرحله

اللي عاجبني تحليلك للموقف وانك فكرت فيه

أنا بحترم الناس دي جدا اللي مبيسيبوش كل حاجه تعدي , حقا علمتني الكثير

جزاك الله خيرا

بجد أنا محترم فكرك في انشاء المدونه دي

حسام غانم يقول...

ميرسي يا عبد الوارث

ربنا يخليك

د/عرفه يقول...

خلاص يا حسام عايزك تشغل دماغك بعد كده
لما تيجى تعمل عياده واتصرف بعبقريه زى بتاع الحصان
بس لو جيتلك متعملش عليا عبقرى
وكل رحله وانت طيب

kalamfady يقول...

يا بختك تصدق ان عمرى ما رحت الاهرامات..بس ما تقولش لحد...مع انى طلعت رحلات كتير..منها طابا اجمل مكان ممكن تشوفه والعريش ورفح..المصريه طبعا..ومطروح واسكندريه وجمصه وطنطا

كل رحله وانت طيب

غير معرف يقول...

معلش متأخر حبتين تلاتة

بس اعذرنى

الف مبروك ياجميل على المدونة الجامده دى

وكل رحلة وانت طيب ياعسل

بس انا ملاحظ ان اسلوب كتابتك بقى جامد فعلا

استمر ياحبى

حسام غانم يقول...

د/عرفة

والله هي فعلا الشطارة والذكاء هم اللي ممشيين الحياة

والدكتور اللي شغال مش دايما يبقى هو الأكثر علما

وانت طيب يا باشا

حسام غانم يقول...

kalamfady

هي الأهرامات مش حلوة قد كده طبعا

بس يعني عيب إن الأجانب بييجوا من بلادهم عشان يشوفوها

واحنا منروحهاش ولا مرة

عشان كده رحنا

عقبالك يا سيدي

وعقبالي أما أروح كل الحتت الجامدة اللي انت قلت عليها دي

حسام غانم يقول...

الخطيب حبيبي

الله يبارك فيك + وانت طيب يا حبي

angel يقول...

عجبنى اوى الراجل اللى خاد منكوا 90 جنيه فى ربع ساعه بس عادى لاعب الكره مبيعملش حاجه غير انه بيلعب (بيلعب)وبيقبض بالملايين اكيد شغلوا دماغهم مش زى بتاع الطب اللى انطحن 7 سنين وفى الاخر 150 جنيه

angel يقول...

فكره حلوه المدونه دى واعلم اننا نشجعك لتقديم المزيد

DABBOR يقول...

هع
نجحت اني اعمل اكونت.........!!

الله عليك يا حسام

انا مش عارف انتوا بتجيبوا الاسلوب بتاع فلتتامل و لتبتسم معي ده منين

شئ عجيب فعلا

حسام غانم يقول...

angel

على رأيك

وحلوة حتة بيلعب دي

احنا عشان نلعب بندفع فلوس

اللاعب بيستغل هوايته أصلا وبيجيب فلوس


وشكرا لتشجيعك

حسام غانم يقول...

DABBOR

ميرسي كتير

Heba يقول...

حلوة المدونه دي هو صحيح

في حاجات كتير مش فاهماها

بس كل اللي قريته موضوع

بسيط عاوز يوصل فكرة معينه

بأسلوب سهل

أحييك د/ حسام

حسام غانم يقول...

Heba
======

شكرا يا هبة على زيارتك

وإن شاء الله تتكرر