السبت، 7 فبراير 2009

وجهة النظر الأخرى

قصة قصيرة

- إزيك يا محمد إيه أخبارك ؟

= الحمد لله يا مينا مفيش جديد وانت عملت ايه في مشوار امبارح ؟

- ولا حاجة زي ما رحت زي ما جيت موافقوش برضه

= ربنا يسهل بس انت متيأسش

- يا سيدي ادينا بنعمل اللي علينا .. المهم كنت عايزك في موضوع

= خير يا مينا

- أنا شايف إن انت راجل محترم وطيب ومتدين وحرام تخش النار عشان دينك. أنا بعرض عليك تبقى مسيحي وتنقذ نفسك

= والله يا مينا أنا الموضوع ده بالظبط كان في دماغي وكنت لسه هعرض عليك الإسلام

- إزاي يا محمد بس بقى بعد ما ربنا هداني الحمد لله واصطفاني من عباده وخلاني مسيحي أغير أنا ديني

= يا مينا المسيحية دين من ربنا محدش أنكر بس ربنا بعث سيدنا محمد ص بالقرآن عشان يهدي الناس للإسلام وبعدين مكتوب عندكوا في الإنجيل إن هييجي رسول إسمه أحمد وده من أسماء سيدنا محمد

- فين دي يا محمد ؟ أنا قريت الإنجيل كله ملقيتش الجملة دي ؟

= ده عشان الإنجيل متحرف يا مينا وفيه كذا إنجيل عندكوا. ينفع يبقى كتاب ربنا فيه منه كذا نسخة ومختلفين عن بعض ؟

- المتحرف منه جمل بسيطة مش مؤثرة يا محمد . وبعدين الواحد مش هيغير دينه عشان حاكم ولا ملك غير جملة . دي حسابه عند ربنا

= يا مينا حرام عليك ده العلماء لحد النهارده بيتكلموا عن معجزة القرءان

- طيب ما سيدنا عيسى كان معجزة في الطب وبعدين انتوا دينكوا بيدعوا للإرهاب في القرآن فيه كذا آية بتدعوا للإرهاب

= يا مينا ده الإعلام الغربي اللي بيقول كده . الآيات دي بتدعوا للجهاد ودي ليها زمن معين وظروف معينة عشان نشر الإسلام وبعدين الإسلام منتشرش بالسيف زي ما بيقال . معظم انتشار الإسلام كان عن طريق معاملة التجار الطيبة مع الناس

- هقولك ايه يعني يا محمد ربنا يهديك وترجع للحق

= أنا مؤمن بديني تماما يا مينا وهدعيلك إن شاء الله ربنا يهدي قلبك

 

= اهئ .. اهئ .. اهئ .. يا رب اشهد أنا عملت اللي عليا اهديه يا رب

# خلاص يا محمد يا بني متعملش في نفسك كده

 

- اهئ .. اهئ .. اهئ .. يا رب اشهد أنا عملت اللي عليا اهديه يا رب

@ خلاص يا مينا يا بني متعملش في نفسك كده

 

الفكرة هي تقبل وجهة النظر الأخرى

الموضوع مش عن الدين
ده فقط مثال صادم

لو طرحت القصة دي في منتدى مسلم .. على طول هيبقى المسيحي متعصب
ولو عرضت نفس القصة في منتدى مسيحي .. هيقولك المسلم المتعصب

وجهة النظر الأخرى

يعني لما يقولك إسرائيل تتميز بالخسة والندالة عشان ضربت الطيارات المصرية عالأرض في 67
بينما مصر تتميز بالذكاء وحسن التصرف عشان ضربت إسرائيل وقت عيد الغفران في 73

وجهة النظر الأخرى 

يعني انت لما تيجي تكلم واحد من عبدة النار مثلا
لازم طبعا تدعوه وانت مدرك تماما إن انت على حق وهو على باطل
بس لازم ماتستهينش بحقه في إنه يعتقد إنه على حق وانت على باطل

وجهة النظر الأخرى

يعني مش لمجرد إن احنا مسلمين
نتهم الغرب اللي بيقولوا علينا إرهابيين بالغباء والمؤامرة
لأ لازم نفكر لو احنا مكانهم ومعانا نفس المعطيات اللي معاهم هنبقى شايفين إيه ؟

وجهة النظر الأخرى

يعني لما مسيحي يدعو مسلم للمسيحية يبقى متآمر وحقير
ولما مسلم يدعو مسيحي للإسلام يبقى راجل محترم

لأ أنا في رأيي المسيحي اللي بيدعو مسلم أحسن من المسيحي اللي مبيدعوش مسلم


حد فاهم حاجة ؟

هناك 38 تعليقًا:

angel يقول...

انا معاك ان مش كل حاجه الغرب بيعملها ضد المسلمين من نظريه الموامره وايضا مش كل المسلمين ارهابيين

غير معرف يقول...

الانسان متعصب بالفطرة للاسف

KEBLAWYAT يقول...

أيوه يا حسام ...

بداية أحييك على الموضوع الأول كده



بص ....

الكلام إن المسلم إللى بيدعو المسيحى للإسلام يبقى كويس والعكس غير صحيح ده مش ف الإسلام بس

ما وجهة نظر المسيحى نفس الحاجه ...

بس يعنى إيه المطلوب ؟

متدعوش ؟



بالنسبة لمثال مصر إللى ذكرته ..

فعلا مصر تتميز بالذكاء وحسن التصرف هنا ، لإنك راجل محتله ارضك ورايح بتاخد حقك مش معقول هتراعى مشاعر العدو و متضربوش يوم العيد

حسام غانم يقول...

angel + عباس

فعلا !!

حسام غانم يقول...

قبلاوي

ربنا يخليك

==========
الكلام إن المسلم إللى بيدعو المسيحى للإسلام يبقى كويس والعكس غير صحيح ده مش ف الإسلام بس

ما وجهة نظر المسيحى نفس الحاجه ...

بس يعنى إيه المطلوب ؟

متدعوش ؟
===========

ايوة طبعا مش في الإسلام بس
دي في كل دين وفي كل حاجة في الحياة

المطلوب إن زي ما أنا لما أجي أدعو مسيحي للإسلام أو أقنع أي حد بوجهة نظري ببقى منتظر من اللي قدامي إنه يسمعني من غير تحيزات مسبقة

يبقى لما مسيحي ييجي يدعوني أو أي حد يقنعني بوجهة نظره أسمعله من غير تحيزات مسبقة

وزي لو أنا شفت واحد من اصحابي بيدعو للاسلام بقول عليه ايجابي
برضه لو شفت واحد مسيحي بيدعو أقول عليه ايجابي

===============
بالنسبة لمثال مصر إللى ذكرته ..

فعلا مصر تتميز بالذكاء وحسن التصرف هنا ، لإنك راجل محتله ارضك ورايح بتاخد حقك مش معقول هتراعى مشاعر العدو و متضربوش يوم العيد
=================

ايوة معاك تماما
بس أنا شايف برضه إن حركة اسرائيل دي بنفس المقياس حركة ذكية وقلبت ميزان الحرب




شكرا لتعليقك يا قبلاوي

غير معرف يقول...

القصة دى حلوة اوى يا حسام ومعبرة

اى واحد بيكون متعصب لراية وفاكر ان هو الصح حتى لو كان غلط

عشان كدة لازم الانسان يتعلم المرونة ودى اهم صفة عشان تتكلم وتقنع اللى بتكلنة

فالشخص الاكثر مرونة هو الذى يسيطر على الموقف

ومهما اللى بتكلمة بيقول حاجة غلط ما تقللش من شان كلامة لان دة هيخلية غير متقبل ان يسمعك

حاول تكون مستمع جيد وتسمع فكرتة للاخر
دة هيخلية يحترمك ويسمع فكرتك وبكدة تكون كسبتة

واعرض فكرتك بحيث ان هو يشاركك فى الكلام اسالة مثلا خلية يندمج معاك فى فكرتك وتدخل دماغلة بالكلام عنها معاك
ويبقى انت كدة قصرت المسافة بينكم
واضرب امثلة واحصائيات العقل بيحب الحاجات دى اوى

غير معرف يقول...

الموضوع اصلا ان معبقاش حد يقدر يعمل كده دلوقتي يعني مثلا لو انت كلمت صاحبك المسيحي في موضوع زي ده متقدرش تقدر تضمن رد فعله وانت بردو لو صاحبك المسيحي كلمك في موضوع زي ده ممكن شويه هتتغير من ناحيته وصدقتني ده اللي هيحصل ويا حبذا بقي لو خكيت لحد كبير هيقولك اقطع علاقتك بيه فورا

احنا بس نعد نردد شعارات عاش الهلال مع الصليب والحاجات دي بس ناس كتير من الناحتين مليانين حقد علي الفريق الاخر
بصراحه عجبني اوي فيلم حسن ومرقص عشان مزيفشي اي حاجه وبين كل حاجه بصراحه
بصراحه احيك علي الموضوع بتاعك مع انه ممكن يكون درب من دروب الخيال ان الاصحاب دول يفضلو اصحاب اوي بعد المحادثه دي
واسفه ان كنت اطلت علي حضرتك

حسام غانم يقول...

ibrahim

شكرا لتعليقك وفعلا كلامك مهم جدا في الcommunication skills

حسام غانم يقول...

غير معرف

هو حتة إن الأهل هيخلوني أقطع علاقتي بيه دي

معاهم حق طبعا طول ما أنا صغير ومقدرش أميز وممكن أي حد يأثر عليا

وفعلا فيه خلف أقنعة الود والتسامح نوع من التربص بين المسلمين والمسيحيين

شكرا على تعليقك

DABBOR يقول...

تفكير من بره الدايرة كويس اوي يا حسام


استمر

مذكرات مشاغب يقول...

يخربيت عقلك يا ابني
انت اتكلمت في موضوع شائك جدا
عندنا هنا مجرد الكلام فيه جريمه ومحاولة اثارة فتنه
انا من غير اي مجامله معجب جدا بطريقة تفكيرك
انت قلت كلام يه فهم عميق ناس كتير مبتفهموش
وربنا يصبرك على النقد اللي هتشوفه اذا استمريت على كده
تحياتي

فتــافيت (رحاب الخضري) يقول...

لا دماااااااااااااغ بجد
كلامك صح.. وكتير بقول قبل ما تتهم اللي قصادك باي اتهام حط نفسك مكانه وشوف هاتعمل ايه

احيك على طريقة تفكيرك
تقبل مروري

حسام غانم يقول...

DABBOR

فعلا ..

الواحد المفروض ميبصش عالموضوع من منظوره هو

لأ .. المفروض يشوف من ما يسمى منظور الشخص الثالث أو عين الطائر


شكرا لتعليقك

حسام غانم يقول...

مذكرات مشاغب

شكرا لتعليقك

هي الفكرة مش موضوع دين بس

هي طريقة تفكير بشكل عام

وربنا مايجيب نقد ولا حاجة إن شاء الله

حسام غانم يقول...

فتافيت

ميرسي ربنا يخليكي

شكرا لمرورك وإن شاء الله نشوفك على طول

مهندس / على درويش يقول...

الموضوع جميل فعلا أخي حسام
ربنا يوفقك

د/عرفه يقول...

فعلا موضوع شائك حسام
وفعلا انت ممكن تتهم اللى قدامك بالتعصب رغم انك بتعمل نفس الشىء

سبحان الله على توارد الافكار
انا اتكلمت فى موضوعى الاخير عن الاختلاف
وبعد كده قريت موضوعك لقيتك بتتكلم برده عن الاختلاف مع الاخر
استمر يا حسام وبالتوفيق ان شاء الله

salma mohamed يقول...

السلام عليكم
المرونة وتقبل الرأي الآخر,هما من اسس الاقناع,
غير انهم من اخلاق دينا الاسلام.

على فكرة دي مش اول زيارة ليّا,
انا متابعة المواضيع من اول كبدة الحمار,بس مش عارفة اعلق للاسف مش عارفة ليه السهم مش راضي يتحط في مكان الكتابة,والمرة دي جت معايا بالحظ.

حسام غانم يقول...

مهندس / علي درويش

ربنا يخليك

شكرا لردك

حسام غانم يقول...

د/عرفة

شكرا لتعليقك

وفعلا احنا لو فكرنا بالطريقة دي هنلاقي حاجات كتير في الحياة احنا كنا شايفينها بشكل خاطئ

حسام غانم يقول...

salma mohamed

بالظبط جدا
من أسس أي مناقشة أو حوار
إن يبقى الطرفين عندهم استعداد لتقبل وجهة نظر الآخر والاقتناع بها
وإلا مش هتبقى مناقشة مثمرة
هتبقى مجرد عرض وجهات نظر

لو قلت لي أن جارك يتحول إلى دجاجة في الليل أو أن بيتك يتحول إلى طائرة ورقية ويذهب إلى الأرجنتين

فأنا مستعد أن أصدقك لو أحضرت لي الدليل


شكرا لتعليقك
ومتابعتك

kalamfady يقول...

كلام جامد

حسام غانم يقول...

kalamfady

ربنا يخليك

وشكرا لتعليقك

ِِAdem El-Mahdy يقول...

ايوه يا حسام

يعنى القصة دى حقيقية يعنى ولا ايه
؟!!

حسام غانم يقول...

انت تسال والكمبيوتر يجيب

اوك

حسام غانم يقول...

Adem El-Mahdy

لا مش حقيقية

شكرا لتعليقك

د/محمد الخطيب يقول...

جميييييييييييييييييل ياحسام

فعلا وجهة نظر اخرى وتُحترم

بس ذى ماكيبو قال فى مثال مصر ده

معاه حق

انت راجل محتل ولازم تدافع عن حقك

بس برده وجهة نظرك كويسة

حسام غانم يقول...

الخطيب

منطقي لما نقول إن مصر تتميز بالذكاء عشان اختارت توقيت عيد الغفران ( وده حقيقي فعلا )
إننا نقول برضه إن اسرائيل تتميز بالذكاء عشان فدروا يعرفوا ماقع الطيارات المصرية ويضربوها

مش لمجرد إن هم الطرف الآخر يبقى ذكاءهم مكر وخسة وندالة

ده المقصود

يبدو إن انت فهمت الجزء ده بطريقة تانية


شكرا لتعليقك

OldCatLady يقول...

وصلـــت و قعدت و اتربعت فى دماغى كمان

تسلم دماغك

حسام غانم يقول...

Saydalanya Mat7oona

ميرسي ربنا يخليكي

شكرا لتعليقك

غير معرف يقول...

بصراحة الموضوع ده مهم

والناس فعلا - وأنا واحد من الناس - صعب إنك تكلمهم في موضوع زي ده

إلا بعد مقدمات طويلة قد يفوت العمر كله ... ولسه ما جاتش لو هاتستناها

***

ربما المشكلة أصلا نشأت من حاجة معينة نفس فكرة valve بيبقى التيار ماشي في ناحية واحدة بس

مفيش حاجة عندنا اسمها حوار واقتناع ..

عندنا فكرة الحوار إننا نكسر راس صاحب الفكرة السيئة مش نكسر الفكرة السيئة بس !!

***
الحوار هو الحل

حسام غانم يقول...

أحمد عمارة

إزيك يا باشا
المدونة نورت

بالظبط جدا
احنا معظم حواراتنا ونقاشاتنا بتبقى إننا نكسر راس صاحب الفكرة السيئة مش نكسر الفكرة السيئة بس

شكرا لتعليقك

Khaled Selim يقول...

فكرتني بالإمام الشافعي لما كان في الدرس يختلف مع حد من أصحابة في مسألة فقهية
والإختلاف يكون شديد جداً
وأول ما يطلعوا من الدرس يمشوا مع بعض عادي ومفيش أي مشكلة
ده لأن الإختلاف في الرأي زي ما بيقولوا لا يفسد للود قضية

لكن إنتا بصراحة مختار مثال غريب أوي

أنا موافق جداً على حتة إن ضرب إسرائيل لطيراتنا على الأرض ده مش خسة وندالة بل ده إهمال من جانب مصر واستغلال فرص من جانب الصهاينة.


وعلى فكرة أنا من فترة من الزمن بدأت في نقاشاتي أياً كان موضوعها إني مش لازم أنتصر في النهاية
يكفيني شرفاً عرض قضيتي ورأيي اللي أنا مؤمن بيه
ويكفيني فخراً إني أخلي اللي قصادي يعيد التفكير في حاجة غلط هوا كان مقتنع بيها تماما على إنها صح، حتى لو مش حابب يظهرلي كده


لكن إحنا فعلاً بوجه عام في دول العالم التالت زي ما بيسمونا ، عندنا قصور رهيب في ثقافة الحوار
ده ميمنعش إن فيه نماذج مشرقة، لكن السواد الأعظم أهطل ولا يدري شيء عن أي شيء أو يدري بعض الأشياء ويتعصب لها بمنتهى الغباء

بس كده.

حسام غانم يقول...

khaled Selim

إزيك يا عم خالد .. نورت المدونة

أنا متفق معاك جدا

بالنسبة للمثال الغريب

الغرابة هنا مقصودة

كمثال صادم

أنا بتكلم على طريقة التفكير نفسها

في أول دعوة سيدنا محمد صلى الله عليه وسلم

كانت قريش بيعبدوا ألهة متعددة

وبعدين جه الرسول بيقول انتوا كده غلط ولازم تعبدوا إله واحد

تخيل

هنسيب الآلهة اللي بنعبدها من زمان ونعبد إله واحد بس

قمة عدم المنطقية ( بالنسة لهم )

بس لو كانوا بيفكروا بالطريقة دي

والحوار يعتمد عالإقناع

والحجة والحجة المضادة

كانوا كلهم أسلموا


شكرا عالمرور والتعليق

غير معرف يقول...

الموضوع جامد جدا والبلوج كله 100% تسلم دماغك يا برنس..سلام

حسام غانم يقول...

ميرسي عزام باشا

ربنا يخليك

lecaa يقول...

السلام عليكم ورحمة الله وبركاته
جميل جدا يا د-حسام
كلامك مهم جدا وعرضته أيضا من خلال موضوع آخر أكثر أهمية ....كتير من غير المسلمين فيهم صفات كتير كويسة لكنهم للأسف واخدين فكرة خاطئة عن ديننا ،
فعلا المرونة وتقبل الرأي الآخر,هما من أسس الإقناع,غير إنهم من أخلاق دينا الإسلام.
وأي وجهة نظر لكي يتقبلها الآخر خصوصا لو كانت متعلقة بأمر من أمور الدين سواء كانت لمسلم أو غير مسلم لازم نراعي حاجات أساسية :
1) إن حالي (الداعي) يكون منضبط....حال نبوي مش بدعي لطريق وأنا ماشي ف طريق تاني أكيد هكون غير مقنع بل ممكن أكون وسيلة للتنفير
2)الفهم الصحيح ....فقه نبوي والأدلة والردود تكون حاضرة ف ذهني
3)فهم للواقع
* وممكن كمان أعبر عن وجهة نظري بطريقة غير مباشرة أقنع بيها الآخر برأيي من غير مل أقع معاه في صدام وفي الدعوة إلى الله ممكن يكون دة الأفضل أحيانا باني أدعو من خلال أفعالي وسلوكياتي أومن غير ما أهاجم وجهة النظر الأخرى (ولتكن المعصية) بطريقة تزيد من حب العاصي لها وتمسكه بها
كمان عاوزة أضيف:
*هناك تدين خطأ وتدين صح والتدين الخطأ ينكره الدين
*الإرهاب ليس له دين
*يجب حسن الظن بالآخر عند الدعوة كما يجب التدرج والتروي
*المحاولات الخاطئة في إطفاء النار تزيدها وكثير من محاولات للإقناع خاطئة بنية سليمة...

حسام غانم يقول...

lecaa
======

شكرا يا د.لقاء ربنا يخليكي

متفق جدا جدا مع كلامك

أفدتيني الكثير