مرة واحنا مسافرين بالميكروباص شوفنا ناس ملمومة على جنب الطريق على حادثة ، وقف الميكروباص ونزلنا نشوف .. لقينا عربية واقعة في الترعة وركابها فيها .. وكان فيه راجلين في الترعة بيحاولوا يطلعوا الناس من العربية بصعوبة من الشباك .. اللي ضايقني في الموقف ده إن احنا كنا واقفين بتاع تلاتين واحد عالشط ومفيش غير راجلين بس اللي بيعافروا ويطلعوا الركاب .. وكان الناحية التانية من الترعة فيه شوية ستات عمالين يشتموا فينا عشان ننزل ننقذ الناس .. يا رجالة حد يساعدهم .. يا رجالة الناس هتموت يا كفرة ..
خلص الموقف .. قعدت أفكر ليه أنا منزلتش أنقذ الناس .. لقيت إن أنا برضه بفكر بنفس طريقة موضوع هي جت عليا السابق .. وإن أنا هدومي هتتبل وهتأخر عالكورس ..
وجه على طول المثل ده في دماغي يموت حبيبي ولا استهواش .. نظرية ضرر صغير عليا مقابل منفعة عظيمة لغيري .
طبعا منطقياً إن أي حد مستعد يجيله برد أو أي ضرر بسيط في سبيل إنه ينقذ واحد من الموت مثلا .. ده منطقياً .. بس واقعياً للأسف مش كده .
نسمع كثيرا أن قطرة دم تساوي حياة انسان .. وده حقيقي فعلا .. بس كام واحد مننا لما بيلاقي عربية تبرع في الشارع بيروح يتبرع .. ومعلش هيتأخر عشر دقايق عن معاده .
في حملات المقاطعة كلنا نعرف إن كل جنيه يساوي رصاصة في جسم أخويا المسلم .. بس معلش والله أنا عطشان دلوقتي وبحب أشرب بيبسي .. ومعلش مش قادر أستغنى عن ايريال .. ومقدرش آكل مع أصحابي غير عند كنتاكي .
لو قابلت واحد فقير في الشارع أو واحدة شايلة ابنها بتشحت بيه هل هتديهم ولا لأ ؟ .. مع إنك عارف إنهم مهما كانوا بيستعبطوا فهم بالتأكيد محتاجين الجنيه ده أكتر منك بكتر عشان ياكلوا أو يجيبوا علاج .. مش هيروحوا يجيبوا بيه شيبسي أو يلعبوا بلاي ستيشن .
فيلم Blood Diamond يصوّر مأساة دول إفريقية كاملة .. وحروب تشتعل ودماء تراق .. وأطفال وعبيد .. في سبيل الحصول على الماس لتصديره لأوروبا .. ثم يطرح في النهاية تساؤل .. هل أنت مستعد أن تستغني عن الخاتم أو السلسلة في سبيل أن تُحقن دماء الملايين من البشر ؟
طبعا لا .. فكيف تكتمل فرحتنا من دون الخاتم والغويشة .. وكيف تمشي النساء من دون الماس وهو من ضروريات الحياة .
في أوروبا والدول الصناعية الكبرى يلقون الفائض من الأغذية والمنتجات الصناعية في البحر لمجرد أن توزيعه سيؤدي إلى انخفاض الأسعار .. دون النظر إلى المجاعات في الكثير من دول العالم .
في راوند الأطفال عندنا في المستشفى .. فيه طفل عنده عيب خِلقي في الأمعاء مبيعرفش يمتص الأكل .. ومحتاج عملية تغيير أمعاء مبتتعملش في مصر .. الأب والأم فقرا وبالتالي الولد هيموت .. رغم إن احنا ممكن ننقذ الولد ده لو أنا وعشرة زمايلي اتبرعنا بموبايلاتنا مثلا .
أنا آسف يا حبيبي .. فلتمت ألف مرة .. المهم أنا هدومي ماتتبلّش ، وأشرب بيبسي ، وألبس خاتم ، وألعب بالموبايل ... ولا أستهواش .
.jpg)
هناك 70 تعليقًا:
Very nice topic
Sorry I can't write in Arabic right now, but just wanted to tell u that ur blog is very nice mashaAllah
and you tackled the subject with a nice simple example
hagy tani lamma a2dar akeb in Arabic :) if u don't mind
Best regards
مدونتك أكتر من مميزه
حاجه كده من القلب وبتتكلم عن حقيقة القلب .. القلب إللى بيقول كلام زى السكر والعسل ... بس أفعاله زى البتنجان والبصل
سعيده إنى مريت بمدونتك
ربنا يوفقك دايما لما فيه خيرك وخيرنا جميعا
الكلمات التى من القلب تعبر للقلوب بسرعة كبيرة
حقيقية لكنها مؤلمة .. فضحت المرء أمام نفسه لعلنا نتقن "الشعارات والخطب الرنانة" .. لعل معطيات الحياة ومجرياتها التى اختلفت صنعت هذا الفارق بين ما نقول وما نفعل ؟ ربما !
ثقافة البذل -التضحية -حب الخير
قال رسول الله صلى الله عليه وسلم : لا يؤمن أحدكم حتى يحب لأخيه ما يحب لنفسه
نظرة على واقعنا بالعكس ماشيين :(
ربنا يصلح حالنا ولعل كلماتك تجد لها صدى فى النفوس ربنا يجازيك كل خير عنها
لعلها أول زيارة لكنى سررت بها ولن تكون الأخيرة إن شاء الله
تقبل تحياتى ودمت بخير
كلام جاى على الجرح..كلامك دايما فى الجون واسلوب جاااااااااااااااااااااامد
السلام عليكم
بجد جميييييييييييل
جزاك الله خير
حضرتك طرحت موضوع مهم جدا الإيثار من أجمل الصفات وأجرها كبير جدا
اتبسطت جدا بزيارتي ومش هتكون الأخيرة ان شاء الله
دمت بكل ود
تحيـــــاتي(:
بصراحه يا حسام من أحلى المواضيع اللى انا قريتها فى المدونات بجد
موضوع جد جميل
وهنعلن عنه عندنا كمان
وجزاكم الله خيرا
بسم الله
لهذا كان حديث رسول الله صلى الله عليه وسلم
خير الناس انفعهم للناس
لما الواحد يفهم الحديث ده كويس ويعيه ويتفكر فيه اكتر ، اكيد لما يتحط في اي موقف مشابه لما ذكرت هيفضل المنفعة العامة ويقدمها على منفعته الخاصة والتى لا تتعدى سواه ولا يتعدى ضررها سواه ان كانت فيها ضرر
تدوينة مميزة
تحياتي
Wish I were a Butterfly ...
ميرسي كتير .. ربنا يخليكي
وفي انتظار مرورك التاني بالعربي
عشان أرد عليه بالإنجليزي :)
إيمان
شكرا لإطرائك الجميل عن المدونة
وفعلا فيه أقوال كتير لا تترجم لأفعال
شكرا لتعليقك
خديجة عبدالله
شكرا لمرورك
وربنا يصلح حالنا إن شاء الله
kalamfady
ميرسي ربنا يخليك
شكرا لمرورك
بـسـمـــة صـــــلاح
شكرا لزيارتك
وإن شاء الله مش هتكون الأخيرة
د/ عرفة
شكرا لردك يا باشا
ومش عارف أقول لك إيه
ربنا يخليك للشعب
أحمد سعيد بسيوني
ده أكيد !!
شكرا لمرورك
السلام عليكم
بجد كلامك اثر فيا اوي وبقى نفسي اعيط,
فكرت في حالي وحال غيري احنا فعلا بنساعد الاخرين وممكن نيجي على نفسنا شويه بس لو الضرر كبير على الاقل بالنسبه لينا حتى وان كانت الفايده لغيرنا اكبر من الضرر ده,تلاقينا بنتخلى عن المساعده والوقوف جنب الاخرين,
من الاخر بنتخلى عن مبادئنا ودينا
)):
ربنا يبارك فيك وفي افكارك.
بسم الله الرحمن الرحيم
السلام عليكم ورحمة الله وبركاته
د/حسام
اخى الكريم
تحياتى
مدونة تعبر عن واقع فعلى للاسف مؤلم
بس هو اللى بيحصل فعلا
مدونتك جميلة واسلوبك حلو
تقبل مرورى وتحياتى
وان شاء الله يدوم التواصل
دمت بكل خير وود
والسلام عليكم ورحمة الله وبركاته
السلام عليكم
صدقت والله
والسبب معروف جدا اننا نقينا نحب نفسنا زياده عن اللزوم ونسينا قول رسولنا عليه الصلاة والسلام
لا يؤمن أحدكم حتي يحب لاخيه ما يحبه لنفسه
وقول الله تعالي عن الصحابه اللي المفروض ناخذ منهم القدوه
وَالَّذِينَ تَبَوَّؤُوا الدَّارَ وَالْإِيمَانَ مِن قَبْلِهِمْ يُحِبُّونَ مَنْ هَاجَرَ إِلَيْهِمْ وَلَا يَجِدُونَ فِي صُدُورِهِمْ حَاجَةً مِّمَّا أُوتُوا وَيُؤْثِرُونَ عَلَى أَنفُسِهِمْ وَلَوْ كَانَ بِهِمْ خَصَاصَةٌ وَمَن يُوقَ شُحَّ نَفْسِهِ فَأُوْلَئِكَ هُمُ الْمُفْلِحُونَ
هي شح النفس السبب
جزيت خيرا
غربتي
مقال جميل
و مؤلم و حقيقى و واقعى
شكراً ليك
----
احمد بدراوى مدون و مكنتش منشط مدونتى
ياريت تشرفنى بتعليقك فيها
http://ta3melboyout.blogspot.com/
salma mohamed
ميرسي على تعليقك
واحنا كمان بقينا بنتخلى عن المساعدة
حتى لو الضرر علينا مش كبير للأسف
المعتصم
شكرا لمرورك وتعليقك
وإن شاء الله يدوم التواصل
ghorBty
صح جدا جدا جدا
شكرا لتعليقك
بدراوي
أهلا وسهلا بيك
وشكرا لتعليقك
اولا شكرا على تعليقك الجميل لمدونتى وبالنسبة لموضوعك كتير حلو لان الموقف الصعب بيكشف شخصية الانسان بصدق علشان يعرف عيوبه ومميزاته بس بعد ما يكون خد ناس كتيير معاه من غير ما يحس المهم بلاش التشاؤم وكل واحد يبدأ من نفسه انا حتبرع وحقاطع وحساعد غيرى ولو مش لوجه الله علشان بس اكون راضى عن نفسى لان الرضا اصعب شى فى نظرى سلامى
السلام عليكم حسام غانم .. تحياتى
اول زياره لى لمدونتك الرائعه والهادفه
بصراحه كنت ناقص اشوف مدونه زى بتاعتك تدعو الى الفروسيه ومكارم الاخلاق
تحياتى وشكرا لك علىالزياره
بجد يا حسام بيعجبني طريقة تفكيرك جدا
بتهيالي كل مره بدخل اقولك كده
وعلى الرغم ان اي ح هيتفق معاك ان ضرر صغير عليه قصاد منفعه كبيره لغيري هو الصح
لكن فعلا مش كل الناس هتعمل كده
تحياتي
للاسف الانانية صفة بشرية
شرفتنى بزيارتك لمدونتى
دمت فى حفظ الله
سالى
بسمة مسلم
شكرا لمرورك وتعليقك
وربنا يوفقك في هدفك الجميل
fashkool
أهلا وسهلا بحضرتك في مدونتي المتواضعة
وشكرا على المجاملة الجميلة
مذكرات مشاغب
ربنا يخليك يا باشا
نورت البوست
واحــ الفكر و القلم ــة
ميرسي يا سالي
وشكرا لتعليقك
سيبك من البيبسى والاريال والموت اللى مش ادام عنينا ، ازاى قلبك طاوعك حد يموت ادامك ومتحاولش تساعده ؟؟ مجرد محاولة والاعمار بيد الله
wafaa
مش عارف
بجد مش عارف
شكرا لتعليقك
بسم الله الرحمن الرحيم
د.حسام جميل جدا الموضوع .. و متميز..
بس ياريت نفكر أثناء الموقف .. ان نتصرف بسرعه .. عشان منندمش بعد كده .. و نقول يا ريتنا كنا عملنا حاجه .. لللأسف فعلا مبيحصلش كده غالبا..
تقبل مروري علي المدونة..
تحياتى..
مش عارفة اقولك ايه بصراحة
ممكن لو كنت مكانك كان ده برضو اللي هعمله
بس الناس ديه طلعت عايشة ولا مالحقوش ينقذوهم؟؟؟؟؟؟؟؟؟
بس المقاطة انا ماشية عليها بالنص
بوست يوجع القلب
لازم كل واحد يبدا بنفسه والله لايغير ما بقوم حتى يغيروا ما بانفسهم شكرا حسام
واللي يخاف من بلل هدومه النهاردة ممكن اوي بكرة يبقى هو في المية بنفسه ويلاقي واحد واقف على الشط خايف من بلل هدومه
يموت حبيبي ولا استهواش....!!
اول مره اسمع المثل بس جميل اوي
ومعبر فعلا
احنا بقينا بنستهبل
وكله بيقول يلا نفسي
أنا أول مرة اسمع المثل دا
يعني ايه استهواش
معلش بقى شوية غباء
أول مرة اسمع الكلمه دي بردو
بس موضوع فعلا جميل جدا وكتابة حضرتك جميله
والمدونه رائعه بردو
تحيتي لك...
مش عارف ,
أنا حطيت نفسي مكانك في موقف الترعة ده ,
هقول هتوسخ و هتبل و ...
مع إن الأمر أعظم من ذلك و ناس بتموت جوة !!
مش عارف و الله , يمكن الواحد مش مدرك عظم الموقف و لا إيه بالظبط مش عارف !!
افتكرت مقولة لعبد الله بن مسعود رضي الله عنه يقول فيها :
إن الناس قد أحسنوا القول فمن وافق قوله فعله فذاك الذى أصاب حظه ومن خالف قوله فعله فذلك الذى يوبخ نفسه .
........
تحيتي !!!!!!!!!!!!!
فى موضوع المقاطعة مثلا....لو ملقتش حد عزيز عليا وقع مقتول بمجرد ما خلصت ازازه البيبسى....يبقا أنا عمرى ما هقاطع
فى مثل أمريكى بيقول لما تشوف بعينك هتصدق
احنا مبنشاركش و مبنساعدش لمجرد اننا مش عايشين فى المأساه....على اختلافها ان كانت حروب أو حوادث أو غيره...مدام مبتحصلش ليك و بتحصل من حواليك يبقا أنت مسار حياتك هيفضل ماشى عادى لأن مفيش داعى تقاطعه....و ده تفكير بشرى معظمنا نشأنا عليه
رغم اننا كلنا عايشين على نفس الأرض بس متعلمناش نتشارك فيها
البوست حلو جدا جدا ...
تسلم
د.آيه
--------
ميرسي كتير ربنا يخليكي
للأسف فعلا ده مبيحصلش واقعيا
فتافيت
---------
لأ ده اتضح إن العربية كانت في المية من بالليل
ربنا يوفقك في المقاطعة
المفروض فعلا نقاطع لدرجة تخلي استيراد البضائع دي يقف
ربنا يسهل
شكرا لمرورك وتعليقك
فكرة من الزمن ده
-----------------
تعليق يقهر فعلا
السلبية حاليا داء جماعي مريع
عاشقه وغلبانه
----------------
مثل حلو فعلا
مش فاكر أنا سمعته فين
لقيته نط من عقلي الباطن كده
شكرا لمرورك
*قـــمــــر*
--------------
ميرسي كتير ربنا يخليكي
همممممممم
ماأستهواش يعني مايجيليش برد
ويبدو إنهم بيقولوا عاللي جاله برد إنه استهوى أي تعرض للهواء
مرور جميل
iBRAHiM sAllAm
-----------------
هو الموقف كان سريع خاطف كده
كنا على سفر والسواق لقى لمة
فنزلنا لقينا إن فيه عربية في الترعة وبيطلعوها
والسواق ركب ونادانا على طول
مرور جميل
Saydalanya Mat7oona
بالظبط جدا جدا جدا
محدش بيحس بالحاجة غير لما تحصل له
شكرا لمرورك ومتابعتك
أخي حسام
السلام عليكم ورحمة الله وبركاته
كلام جميل .. وسخرية في محلها
وما ذكرته .. واقع مر
أحمد
هناك مزايا كثيرة في مدونتك و لكن اكثر شئ عجبني فيها
انها تتحدث عن اخطأ و نواقص المجتمع بصيغة المتكلم اي تنتقد المجتمع و تبدا بنفسك مما يعطي مصداقيه للحديث و ليس فقط اسقاطات علي اخطأ الغير و كاننا لسنا منهم
تحياتي
أحمد
-------
وعليكم السلام ورحة الله وبركاته
ميرسي ربنا يخليك
نورت المدونة
أحــوال الهـوي
---------------
شكرا كتير
وسعيد جدا بمرورك
السلام عليكم ورحمة الله.. وبعد
فهل يكفى أن نشبع أنفسنا لوما وتوبيخا ...كنت أود أن تحكى نفس القصة ولكن بطريقة إيجابة ..وهى أن تتحدث عن مواقف الرجال الشجعان باستفاضة... ثم تندم على مافاتك من.... ثم تعزم على ألا تفوتك مثل هذه الفرصة إذا لاقدر الله حدث مثله أمامك
أخى حسام
إن كثرة ترداد الأمثلة السلبية يؤكد معناها فى النفس ويجعل امتثالها وأداء
مقتضياتها سهلا وميسورا
هذا مايقرره علماء النفس.. وبمناسبة موضة التنمية البشرية أقول: وأيضا علماء التنمية البشرية
قال صلى الله عليه وسلم : لا يقولن أحدكم خبثت نفسى
هذا الحديث يلخص كل ماأورده علماء التنمية البشرية فى هذه الناحية
آسف للإطالة ولو أنها أول زيارة... أعمل ايه... ايه اللى جابك عندى...هاهاهاها
فعلا يأخى موضوع فى الجون بجد
وبيحصل مع ناس كتير جدا
بس انا رأيى ان الواحد لازم يبدأبنفسه ويغير اللى حواليه
آسفه جدا ان الرد على موضوعك متأخر شويه كنت بحاول أعلق من فتره بس كان عندى مشكله
على العموم تقبل مرورى
اولا اشكرك على زيارتك لمدونتى سعدت بها كثيرا وازدادت سعادتى عندما جئت لزيارة مدونتك وقرأت ما بها ، وثانيا احييك على صدقك ومشاعرك هذه فليت كل منا يمتلك مشاعر تلومه على ما يفعل فنأمل جميعا ان نمتلك نفسا لوامة تلومنا على ما نفعل وتوجهنا الى عمل الخير . جزاك الله خير ا.
تحياتى.
اخي حسام
موضوعك بجد رائع وجزاك الله الف خير على طرحة وربنا يجعله في موازين حسناتك يوم القيامة
ويارب يجعلنا من المحبين لاخوتنا كما نحب لانفسنا
وما يجعل الانانية وحب النفس في قلوبنا
تقبل خالص تحياتي وتقديري
واشكرك على تنويرك وتشريفك لمدونتي
وبجد مدونتك جميلة
فعلا التضحية بالحبيب احسن من ياخده الهوا
د.توكل مسعود
--------------
أهلا وسهلا بحضرتك
شرفتني بالمرور
هو طبعا ذكر الإيجابيات مهم جدا للتحفيذ وتنشيط الهمم
وذكر السلبيات مهم للتنبيه والصحوة
شكرا لمرور حضرتك
أفدتني جدا
wesoooooooooo
شكرا لتعليقك
فعلا أنا مؤمن جدا إن كل واحد لازم يبدأ بنفسه
وزي ما قال غاندي
كن التغيير الذي تريده في العالم
نبض الحياة
----------
ميرسي ربنا يخليك
سعدت بزيارتك
fnoonh
--------
آمين يارب
شكرا لتعليقك نورتي المدونة
كلام على بلاطة
-------------
هممممم
مش فاهم !!
مقال جامد يا حوس
ميرسي قبلاوي
لالالالالالا مش ممكن
بجد حاجه فوق الوصف يا د/حسام
ما شاء الله بجد اسلوبك راائع جدا
و مواضيع المدونه كلها بتمس حاجات بتحصلنا و بنشوفها و بنعملها كل يوم
و ما زلت بتوقع نفس المستقبل البااهر
ميرسي يا هبة ربنا يخليكي
شرفتي المدونة ..
بجد اسلوبك عاجبني جدا .. وكلامك فعلا حقيقه
بس اقولك ع سر :D
انا مقاطعه البيبسي والحجات دي
الاول كان بفرمان بس ناو خلاص من قلبي
تسلم ايدك =]
MǿиY El-Shreef
================
ميرسي يا أمينة
وربنا يعينك عالمقاطعة
(:
انا سعيدة ..
بطريقة العرض دي
وتسلسل الكتابه ...
وصلت الفكرة بطريقة حلوة بجد
أوقات كتير لما بفكر في المواضيع دي وأخواتها (:
بحس ان احنا أنانيين بشكل رهيب
مش بس كده لا ده احنا سطحيين كمان
(:
وافضل بقى أدي لنفسي دروس تربوية وتهذيبية ..
(:
وفي الاخر
يموت حبيبي ولا استهواااش
(:
تحيـــــــاتي
ميرام
====
ميرسي كتير يا ميرام
تحياتي ليكي
أنا فضلت أقلب في المدونة بتاعتك وقريت شوية بوستات ... بس عجبني العنوان ده أوي ..
وفضلت أقرا أقرا لحد ما لقيتني قريته تلات مرات من جمال اسلوبه وفكرته ... أنت فكرك عالي
ومليون حد مكانك مكنش هييجي في باله أصلا أنه مقصر في حق غيره من الناس
تحياتي
mimi
======
ميرسي كتير يا ميمي ربنا يخليكي
نورتي البوست
إرسال تعليق