الأحد، 8 مارس 2009

بلا إجابة


شد انتباهي في الفترة الأخيرة موضوع نقل الأعضاء من المتوفي إلى المريض .. وأثارني الخلاف بين الأطباء على تعريف كلمة المتوفي .. هل هو الذي توقفت وظائفه الحيوية ؟ هل هو الذي توقف جذع المخ عنده ؟

ووجدتني أتساءل هل من يعيش على جهاز التنفس الصناعي يعتبر حياً ؟ .. هل يفكر ؟ .. هل يتكلم ؟ .. هل يتواصل ؟ .. ثم هل يعتبره أهله حياً ؟ ..

حسناً مادمنا وصلنا إلى رأي الآخرين  .. هل انت تعتبر النبات حياً ؟ ..هل تختلف الشجرة في نظرك عن عمود النور وإشارة المرور ؟ .. دعك من دروس الأحياء والتمثيل الضوئي وتركيب الخلية النباتية ولتسأل نفسك هل تختلف ؟ .. بالطبع لا .. كلهم في نظرنا جماد نستند عليهم ونقطع ونكتب ..

إذن ما هي الحياة في نظرنا ؟ هل هي الحركة ؟ .. حسنا ماذا عن الإنسان المشلول ؟ هل هو جماد ؟ هل هو ( مش حي أوي ) ؟

هل هي الكلام والتواصل ؟ .. إذن ماذا عن الأخرس ؟ ماذا عن الأعمى ؟ ماذا عن الأخرس والأعمى معاً ؟

إذا قرأت أن أسداً في الغابة قتل غزالة فلن تهتم .. بينما إذا قرأت أن أسداً قتل رجلاً فإنها كارثة .. لماذا ترى أن حياة الرجل أهم من حياة الغزالة ؟ بغض النظر طبعا عن وجهة النظر الدينية في الموضوع فإن هذا الأمر هو نفسه في العالم كله وقبل الإسلام .. لماذا الرجل أهم من الغزالة ؟

ثم تخيل معي أن الغزالة تتكلم لغتنا ونفهم كلامها مثلما يحدث في أفلام الأنيميشن .. هل هذا سيجعل لحياتها قيمة أكبر ؟ .. في الواقع نعم فإن الغزالة التي تتكلم بطلة فيلم الأنيميشن .. أو النحلة .. أو النملة .. تكسب تعاطفك وترى أن حقها في الحياة كبير .. ولها أسرة وأبناء .. وأحلام وطموحات .. ليست مجرد شيء موجود في الحياه لتسليتك ..

أم أن الموضوع بالعقل ؟ .. تختار أن ينجو الرجل وليس الغزالة لأنه أكثر منها عقلا ؟ .. حسناً هل لو كان الاختيار بين رجلين ستختار الأذكى ؟ .. أو لو كان الاختيار بين قرد وغزالة ستختار القرد ؟

لربما تختار الغزالة لأنها أجمل شكلاً .. ربما .. لهذا تحزن جداً إذا ماتت القطة الجميلة التي تربيها بينما أنت تقتل الفئران والصراصير قبيحة المنظر ..

أم أنك تقتل الصراصير لأنها صغيرة ؟ .. إذن فمن حق الديناصورات إن وُجدت أن تقتل تلك الكائنات الصغيرة المزعجة التي تجري هنا وهناك تحت أقدامها .. تلك الكائنات هي البشر طبعا ..

أم أنك تختار الرجل لأنه بشري مثلك وأنك كان من الممكن أن تكون مكانه ؟ .. وهل هذا مبرر ؟ .. فأنت كذلك كان من الممكن أن تكون مكان الغزالة ..

 

هييييييه .. سنظل نفكر .. ونظل نتساءل ما هي الحياة ؟ .. وستبقى تلك التساؤلات .. تماماً تماماً .. مثل العنوان .

هناك 56 تعليقًا:

مذكرات مشاغب يقول...

المشكله ان الفكر الانساني مليان بالكتير من العيوب
وحاجات كتير بيعملها الانسان بدون تفكير
لكنه لو فكر فيها بعقله مش هيلاقي ليها سبب مقنع
على فكره انا فكرت في موضوعك ده قبل كده
ويمكن كمان الاسئله كانت اكتر في دماغي شويه
انا عندي اجابه انا مقتنع بيها
بس للاسف مش هتعجب حد

طبعا انا مش محتاج اقولك رايي في اختياراتك لمواضيعك
اكيد انت عارفه

تحياتي

د. ياسر عمر عبد الفتاح يقول...

إنت هتحيرنا معاك ليه بقى؟؟
مش عارف ..
بس شايف إنها فلسفة زائدة

د. ياسر عمر عبد الفتاح يقول...

إنت هتحيرنا معاك ليه بقى؟؟
مش عارف ..
بس شايف إنها فلسفة زائدة

mohamed ghalia يقول...

نعم ستبقى التساؤلات دائما

salma mohamed يقول...

الموضوع ده عاجبني جدا,وكمان انا فعلا فكرت فيه كتير جدا,
لكن انا من رأيي اننا ما نقارنش نفسنا بالحيوانات,لاني كتير كنت بفكر من وجهة نظرهم,وبعدين قلت طيب ماهو لو كده يبقى لا هنذبح فرخة ولا هنموت فار,في حاجات ربنا سخرها لينا ومش لازم نفكر من منطقها والى مش هنعيش,وكمان هي دورة متوازنه لازم تحصل لاتزان الكون,
اما بقى بالنسبة للبشر,فكل لنسان له حرمته ويجب ان يكون هناك احترام لشخصه حتى متخلف عقليا مشمعنى انه مش فاهم او مش حاسس انه انسان مهان,
اما بقى لمسألة الموت والحياة,بحط نفسي مكان اهل المريض اللي على الفنتليتور فبقول هو ممكن نعتبره في عداد الموتى,بس هل دي حاجة سهلة على اهله؟الاهل بكونوا متعلقين بقشة,بشعرة من الامل,انه موجود في الدنيا مش مدفون في القبر,انا اتحطيت فعلا في مكان الهل دول لما وضعت مامتي الله يرحمها عليه بس الحمد لله ربنا مطولش عليها وعلينا هو كان يوم واحد,
وعلى فكرة اعرف ناس وضعوا عليه,وكتبت لهم الحياة بعدها يعني فعلا ربنا احياهم تاني,
اما بقى بالنسبة للتبرع بالاعضاء عموما او فصل الجهاز عن الشخص ده فاظن ده قرار بياخده اهل المريض وحسب قدرتهم ونظرتهم للامر,ومهما كان الامر اللي هما اتخذوه منقدرش نحكم عليه بصح او غلط,لان لكل واحد نظرته,مثلا هما شيفين ان الاولى اكرامه بدفنه,او هما شايفين ان انقاذ انسان تاني حي امر يجعلهم يتبرعوا باعضاء مريضهماللي كده كده كتبت عليه الموت,وغيرهم ما عندوش قدرة التحمل انه يعمل كده حتى لو مقتنع انه ده الصح,وغيرهم بيعتبر ده غلط اصلا,غيرهم بيكون بيتمسك باي امل,
معلش طولت أوي بس الموضوع معقد جدا ومتشابك.

د/محمد الخطيب يقول...

اسئلة صعبة وفكر فلسفى عاااااااااااااااالى

انت الواحد يخاف منك ياواد ياحسام فى الايام دى

ولا دى برده ألإكار تقدم العمر !!!!

إيمان يقول...

تعرف أحد الصحابه راى عش نمل فى الطريق
فحمله ووضعه إلى جانب الحائط حتى لا تؤذيه أقدام البشر
والرسول الكريم نهى عن قتل الكائنات الحيه من غير سبب وجيه ( إنهم أمم مثلكم)
وقال ( إذا قتلتوهم فإحسنوا قتلهم )
يعنى لو هتموت ذبابه مثلا خوفا من اذيتها أقتلها بشكل سريع وغير مؤلم
لأنها ستقتص منك يوم القيامه
إسلوبك مميز جدا .. جدا
مشاء الله ...والبوست بجد مميز جدا

المعتصم يقول...

ايه ياعم كمية الاسئلة الغريبه دى ؟؟
والمشكله انها فعلا من غير اجابه
هو فيه ايه ياعم حسام ؟؟
انت مالك اليومين دول ؟؟
الاول دخلت على ادهم ياعينى وشردته ودلوقتى قلبت معاك فلسفه
دا كده الموضوع كبير خالص
تحياتى
سلام

مهندس / على درويش يقول...

السلام عليكم /

الحياه تختلف في نظر كل فرد عن الأخر
وانت أثرت وجهات نظر عديده
ولكن لما لا نساوي كلمه الحياه بكلمه الروح
نعم الروح فكل ما ذكرت من حيوان ونبات وأنسان به روح
ولكن أختلف الأنسان لأنه جمع بين الروح والعقل
أما بالنسبه للأحساس فأظن أنها للجميع النبات والحيوان والأنسان
لأننا أحيانا نجد العصفور إذا مات صغيره نراه حزين لا يأكل ولا يشرب وأحيانا يموت
أما النبات لو قطعت منه غصن فستراه يحس بأن الغصن قد قطع وسيخرج سائل مكان القطع أما الأنسان فحزنه مؤقت وأحاسيسه ليس مشتمرة فهي متقلبه
ما بين حزن وسعاده وكآبه وأحيانا أخري جنون


ولكن السؤال الأخر : ماذا تساوي الحياه؟

Unknown يقول...

أسئلة بلا إجابة
لكن انا بقدر قيمة حياة الحيوان
و بيصعب عليا

hasona يقول...

السلام عليكم

ايه كل ده ؟؟
الموضوع شائك
وشيق

لكنه فكري وفلسفي


وكلا مسخر لما خلق له

حتي فكرة القتل
أنت تقتل ما يضرك
ولا يتعلق بالمنظر فقط
أو الشكليات فقط

KEBLAWYAT يقول...

أان بصراحه مش عارف إنت تقصد إيه م الموضوع ده كله

بس ...

لو بتتكلم ف موضوع الأعضاء ده ...

فمينفعش يتناقش فى السطرين دول بس

لإنه موضوع كبير جدا و معقد



إنما يعنى بالنسبة لبقية الموضوع ..

أيوه أنا مش هزعل أما أشوف الغزالة بتموت أو القرد بينط تحت قطر


ةبعدين أنا مش بقتل الصراصير عشان هى صغيره .. انا بقتلها عشان هى مضره

و النقطة إللى لازم متنسهاش إن وظيفتها ف الكون ؟إنها تكون كائن مضر ليك

ووظيفتك إنك تقتلها..

هى مش بمبدأ الحجم يا حسام ...

بس حلوه الفلسفه بتاعتك دى ...

صوت من مصر يقول...

حسام كلامك كبير والموضوع فعلا مثير للاهميه
لكنى رافض فكره النقل من اساسها
يعنى
تسلم ايدك كتير

حسام غانم يقول...

مذكرات مشاغب
==============

بالظبط جدااا
حاجات كتير بيعملها الإنسان بدون تفكير

ميرسي يا أحمد على مرورك
ومبروك أول تعليق
تكسب جايزة البرنامج :)

حسام غانم يقول...

د. ياسر عمر عبد الفتاح
========================

هي فلسفة زايدة فعلا :)

مش فاكر مين كان بيعرف الفلسفة

إنها العلم الذي يجعلك تتأمل البرتقالة وتصفها بدى من التهامها

ففعلا فيه ناس كتير رأيها إننا نعيش الحياة وخلاص من غير ما نفكر أوي فيها

شكرا عالمرور يا دكتور

حسام غانم يقول...

mohamed ghalia
===============

بغض النظر عن أي حاجة

بس أنا بفرح دايما بتعليقاتك يا محمد

ربنا يديم عليك السعادة

حسام غانم يقول...

salma mohamed
==============

شكرا جدا على تعليقك

بجد أفدتيني كتير

حسام غانم يقول...

د/محمد الخطيب
==============

ميرسي يا خطيب يا غالي

ويبدو إنها فعلا من (ألإكار) تقدم العمر :)

حسام غانم يقول...

إيمان
========

ميرسي جدا جدا يا إيمان

وصلتي بالظبط للب الموضوع

فإنهم أمم مثلكم

حسام غانم يقول...

نبض الحياة
===========

صح جدا

شكرا لمرورك وتعليقك

حسام غانم يقول...

المعتصم
=========

ههههههههه
ميرسي على مرورك وتعليقك

حسام غانم يقول...

مهندس / على درويش
==================

شكرا على تعليقك يا بشمهندس علي

هو أنا مش عايز أعرف الحياة بشكل عام

أنا عايز أعرّف نظرتنا لحياة الآخر


سعيد جدا بمرورك
نورت البلوج

حسام غانم يقول...

بدراوى
========

جميل يا بدراوي
سعيد بمرورك

تحياتي ليك

حسام غانم يقول...

hasona
=======

أهلا بيك يا حسونة في أول زيارة

ويا رب يدوم التواصل

تحياتي ليك

حسام غانم يقول...

قبلاوي
========

قبلاوي العزيز

انت بتقول

( أيوه أنا مش هزعل أما أشوف الغزالة بتموت أو القرد بينط تحت قطر )

طيب ما ده شيء لا خلاف عليه

أنا بقول في مقالي كده

إن أنا مش هزعل

السؤال بقى ليه مش هزعل

--------

أنا عندي في البيت سلحفاة مربيها

وساعات يعني بقعد أغلس عليها يعني

كل أما تمشي شوية مثلا أشيلها وأرجعا من الأول كده يعني

طيب تخيل لو أنا مكان السلحفاة دي في القفص

كنت حاطط إنسان

ايه اللي كان هيخليني أطلعه

تخيل معايا كده

أكيد كان هيقول لي حرام عليك

ويستعطفني

أكيد هطلعه عشان أتخيل نفسي مكانه

أكيد عشان عنده عيلة وأولاد

وكل الأسباب دي

عشان كده بقول طب أفرض راجل أخرس

وفلسفة بقى


شكرا لمرورك يا قبلاوي
نورت البلوج

حسام غانم يقول...

صوت من مصر
============

موضوع نقل الأعضاء ده فيه كلام كتير فعلا

تحياتي ليك

وشكرا لمرورك

موناليزا يقول...

ايه النظرة الفلسفية دى
يكفى هذه الاية الكريمة حتى نحكم بها على الامور"ولقد كرمنا بنى آدم"

غير معرف يقول...

إزيك يا حسام ؟؟

الأسئلة هي الحاجة الوحيدة .. أيوة الوحيدة اللي بتقول إن العقل شغال .. لإن الحياة مش واضحة .. أو ممكن تقول الجملة دي بصورة أدق .. إن نظرتنا للحياة ككل ناقصة كتير .. ربنا خلقنا كدا .. إمكانات محدودة .. ولو تفتكر معايا الآية ( فكشفنا عنك غطاءك فبصرك اليوم حديد ) .. المسألة دي أعتقد واضحة كتير

أما بالنسبة للحياة .. أعتقد لإن النسبية غزت كل حاجة .. فاحنا ندور على حاجة ثابته نمسك فيها .. ومش هنلاقي أحسن من القران .. ونحاول ناخد منه .. وهو عرفنا برضه ( ويسألونك عن الروح ... قل الروح من أمر ربي وما أوتيتم من العلم إلا قليلا )

يعني ما عندناش علم بموضوع الروح .. ولعلي أعتقد إن الروح دي هيه الحاجة اللي مخليه الكائنات الحية أرقى من أي حاجة تانية .. وزي ما قال واحد من القراء ..الآية ( ولقد كرمنا بني آدم ) والآية الأخرى .. ( وسخر لكم ما في السماوات والأرض جميعا منه )

يعني إحنا الأساس ع الأرض .. والباقي بتاعنا .. نستخدمه بقواعده .. مش بالهبل!!

أعتقد إني طولت كتير مش شوية
يمكن نيجي نكمل القتال بكرة !!

ريمان يقول...

سبحان الله

عارف كلنا فى دماغنا الكتير من الاسئله

بس بجد مش بنقدر نوصل للاجابه الصحيحه

عشان كده بنحتار

وكمان فى بعض الافكار الغلط واللى مالهاش اساس مسيطره على عقولنا

KEBLAWYAT يقول...

حوسام حابيبى

طبعا إللى بتعمله فى السحلفه اللى مربيها عندك مش حلو

بس إنت فى ردك عليا برضه بتتكلم فى مبدأ الحجم

إن انا بعمل كده ف السلحفاه دى عشان هى أضعف و أصغر منى إنما لو بنى آدم مش هعمل

لأ مش ده المبدأ خالص ..

الفكره إنى حرام أعب كائن حى سواء كان بنى آدم أو سحلفه

إنما الطبيعى إنى اما أشوف بنى آدم بيموت أكيد هبقى متضايق أكتر أما أشوف زرافه بتموت

حسام غانم يقول...

موناليزا
=========

شكرا موناليزا على مرورك
بس أنا كنت مش عايز وجهة النظر الدينية في الموضوع
لأن أي حد في النرويج أو أوغندا بيفكر بنفس الطريقة برضه

فليه هو بيفكر كده ؟

حسام غانم يقول...

أحمد عمارة
============

إزيك يا عمارة بيه

هو الموضوع محسوم دينيا أنا عارف

أنا بتكلم من وجهة النظر الإنسانية

من وجهة نظر حتى اللي مش مسلم


نورت البلوج يا عمارة

حسام غانم يقول...

ريمان
=======

صح فعلا معاكي حق

شكرا لمرورك

نورتي البلوج

حسام غانم يقول...

قبلاوي
======

يبدو إنك مفهمتش ردي عليك

شكرا لمرورك ونورت البلوج

maha zein يقول...

ايه ده
الله
ده انت ايه اللى ودا دماغك بعيد كده
سبحان الله
بس وربنا فكرة جميلة خالص

اه صح

انت دماغك نضيفة علي فكرة
اه وربنا
اصل الناس اللى بتفكر في حجات غريبة كده بتبقه دماغها نضيفة

روح يا شيخ
كل سنة وانت طيب

غير معرف يقول...

ياااااااادماغك
:))
هو الواحد بتعدى عليه لحظات فلسفه عاليه كده وبعدين يفوق ويرجع لطبيعته
:))

بس بجد موضوع مثير اوى ويلفت الانتباه ويخليك تفكر وتقول اه صحيح .. ليه؟

سلامى
:))

حسام غانم يقول...

maha zein
==========

ميرسي كتير كتير كتير

وانتي طيبة

نورتي البلوج

حسام غانم يقول...

shayma
========

هههههههههههه

فعلا اللحظات الفلسفية دي مش بتيجي بالساهل كده


تحياتي ليكي
نورتي البلوج

dodda يقول...

اسد
غزاله
قرد
قطه
فار
صرصار
ديناصور
ايه يابنى عالم الحيوان ده؟؟؟

كله قضاء وقدر

انا جوزى مش بيموت اى حشره
ويستغرب اوى انى اتضايق لو لا قيت صرصار متسرب وعايزه اموته!!!
ويسألنى هو عملك ايه؟؟
بس خلينى انا اسألك
لو انت لاقيت جنب الاكل فار او صرصار حتاكله؟؟؟

حسام غانم يقول...

dodda
=======

أهلا بيكي يا دودّا في البلوج

بالنسبة للسؤال

فطبعا لا مش هاكله
وهموت الفار كمان

دي حقيقة تقريرية

أنا في الموضوع بتساءل

ليييييه بقى ؟

هــــــــــــايدي يقول...

انت تفكر اذا انت موجود
التفكير فى حد ذاته شىء مميز
بس مش المفروض نفصل التفكير عن حياتنا ودينا لان الدين هو اللى بيحكم الحياه
اكيد الانسان مكرم ومختار مش لانى اانسان لا لان ربنا كرمه واختاره
اما عن الحيوانات فدا بيتوقف على اهميتها بالنسبه لنا
نقل الاعضاء
موضوع مهم
بس كون اننا نقل من حد لسه مش متوفى او توقفت اجهزته موت اكيلنيكى
لا لانه لسه حى يرزق
واكيد كونه لسه عايش ان ربنا قدرله حاجه هتكون
لكن لوحد اتوفى اى المانع نقل الاعضاء لحد محتاجها بموافقه اهل المتوفى من غير ما تكون تجاره رخصيه
تحياتى

د.عصماء يقول...

جزاك الله خيرا شرفت مدونتى

Lady E يقول...

عاااااا كل دي تساؤلات انا اتلخبطت بقى

Wish I were a Butterfly ... يقول...

!!!
أنا احترت
في الأول كنت مركزة جدا لكن لقيتني تهت بين الأسئلة في النهاية :)

مش عارفة فعلا إجابات. بس لو اتكلمت شخصيا فأنا "للأسف"... بتعاطف مع كل حاجةزيادة
يعني من يومين استأذنت نملة لأني هقتلها عن قصد:(ودة طبعا يعتبر مش واقعي، بس فعلا بزعل أوي على أي روح حتى لو كانت لغير الإنسان،وهي في الآخر حاجة مضر وجودها في البيت

موضوع نقل الأعضاء طبعا دة للعلماءوالأطباء، بس شخصيا شايفاها للشخص اللي كان متفق من قبل تدهور حالته على نقل بعض أعضاؤه
في الغرب معظمهم إذا كان المريض عايش بسبب الأجهزة وبس، بيستأذنوا الأهل في نزع الأجهزة لأنهم مش شايفين إنه كدة عايش
بس الحقيقة إن دة غير إنساني شوية..لأن المفروض إنه يفضل موجود لاحتمال الأمل البسيط إنه يرجع للحياة تاني في يوم من الأيام..أو على الأقل مش يكون حد هو اللي أزهق روحه..حتى لوكان كدةكدة خلاص مش "عايش" بالمعنى اللي بنحسه
صعبة أسئلتك:). تحياتي

حسام غانم يقول...

هـــــــــايدي
===============

مرور جميل

شرفتي البلوج

حسام غانم يقول...

د.عصماء
=========

الشرف لينا يا دكتورة

وأهلا بحضرتك في أول زيارة

حسام غانم يقول...

Lady E
========

هههههههه
ما هو ده المطلوب


تحياتي ليكي
نورتي البلوج

حسام غانم يقول...

Wish I were a Butterfly ...
===============================

مرور جميل

انت وصلتي فعلا للنقطة اللي أنا بتكلم فيها

اللي هي نظرتنا ليه
أو نظرة الأهل

تحياتي ليكي
نورتي البوست

marmar يقول...

ليه بنقتل الحيوانات !!
دي حاجة مسخرالهالنا ربنا واحل قتلها سواء خوفا منها او اكلها او او او
اسئلتك دي كلها جوابها هو
تقدر تفسر ليه الانسان مبقاش حيوان والحيوان انسان !!!

Unknown يقول...

ايه ده؟
دوختنى !!

حسام غانم يقول...

marmar
========

هو الموضوع محسوم فعلا من الناحية الدينية

أنا بحاول أبص من وجهة النظر الإنسانية مش الدينية

وبعدين ما تلاقي وحيد القرن بيبص لباقي المخلوقات بما فيهم الإنسان على إنهم حيوانات وهو اللي مختلف

مرور جميل يا مرمر
نورتي البلوج

حسام غانم يقول...

norahaty
=========

ههههههه
وهو المطلوب إثباته

نورتي البلوج

MǿиY El-Shreef يقول...

سؤال احب اضيفه وبردوا بلا اجابه

انت بتفكر كتير كده ليه :D

شقلبت دماغي

حسام غانم يقول...

MǿиY El-Shreef
================

لا عادي يا أمينة فاضي بقى

نورتي البوست

غير معرف يقول...

تسائلات كبيرة ما لهاش جواب بس انا بعتقد ان من حق الكل انه يعيش في امان
مودتي

حسام غانم يقول...

assafo anaroze
================

شكرا ليك يا أسافو

تحياتي ليك ..