الأحد، 29 مارس 2009

القانون فوق الجميع

الصورة تصميم صديقي محمد سامي

جمعني الحديث قريّب بواحد صاحبي من أيام المدرسة خريج حقوق .. طبعا شيء مش لطيف إن يبقوا كل زمايلك اللي كانوا معاك دفعة واحدة في المدرسة متخرجين وشغالين وانت اللي لسه بتدرس ..

المهم بعد السلام والتقبيل والعناق واسترجاع الذكريات والبكاء على الأطلال .. احم .. قال لي إن هو بيتدرب دلوقتي عند قريبه المحامي وإن هو مبسوط من الشغل ده والتدريب .. الحقيقة أنا فرحتله جدا لأني كنت أعرف من أيام المدرسة إنه مالوش أوي في المذاكرة وكان مقضيها كده زي ما تيجي .. بس بعد ما دخل الكلية حب الدراسة بتاعته وبقى يجيب تقدير في الكلية .. تحس كده إنه لقى نفسه في الحقوق ..

وقعد بقى يحكيلي عن شغله ..

اتكلمنا الأول عن حادثة الاغتصاب الأخيرة اللي حكموا فيها بالاعدام على عشر متهمين وبخمستاشر سنة على طفل حدث .. سألته هي الأحكام دي عشان كلهم اغتصبوا ولا إيه ؟ .. قال لي إن في القانون أي حد مشارك في الجريمة يعتبر زي اللي نفذ في العقوبة يعني لو واحد كان بس بيراقب أو بيحرس كأنه نفذ بالظبط أو حتى لو واحد خطط معاهم ومجاش .. شيء غريب الموضوع ده أول مرة أعرفه ..

وقال لي كمان إن كان واحد صاحبه قريب اتمسك بطبنجة مش مترخصة بس هو عرف يطلعه منها .. هو بيقول إن الولد ده ابن ناس محترمين وكان في مدرسة لغات وإنه لو كان دخل السجن كان كده هيبقى مستقبله ضاع .. فهو كفاية عليه العشرة خمستاشر يوم بتوع الحجز هيخلوه ميعملش حاجة تاني .. طبعا مع تحفظي عالمبدأ ده سألته طلعته إزاي .. قال لي إنه لقى اختلاف صغير بين محضر الشرطة وأقوال الظابط واحد بيقول لقوا الطبنجة في العربية وواحد بيقول لقوها في جيبه .. فبالتاي يتوافر مبدأ الشك ويطلع المتهم براءة .. سألته ببساطة كده ؟ .. قال لي أيوة وأكتر .. بمبدأ الشك ده انت لو عايز تطلع أي متهم من أي قضية تعرف .. بس لازم تكون محامي شاطر تدور في الثغرات دي .. يعني مثلا في قضايا المخدرات لو اختلفت كمية المخدرات المظبوطة من محضر للتاني يطلع براءة .. قولتله أيوة أنا سمعت الموضوع ده يبقى في محضر 500 جرام وفي محضر تاني 300 جرام ويطلع براءة مع إن ياخي المحضرين بيقولوا فيه مخدرات مش واحد بيثبت وواحد بينفي .. قال لي ده لو محضر قال 500 جرام والتاني قال 501 يطلع براءة !!

وقال لي إن كان فيه قضية حشيش قبل كده طلع المتهم فيها براءة عشان المفروض الطب الشرعي يلاقي في جيب المتهم زيت كده بينزل من الحشيش وهو في الجيب وهم ملقوهوش .. يا جدعان ما الحشيش نفسه موجود .. لأ بس ده تضارب في المحاضر ..

القانون ده عجيب فعلا .. ده قال لي كمان إن كان واحد محامي عُقر دارس القانون جدا حب ينتقم من واحد .. جابه وقعده .. ونتفله شعر دقنه .. وقال إن مفيش حاجة في القانون بتعاقب على نتف الدقن .. قلتله يا راااجل طيب يعني لو جبت سكينة وقطعتله صوبع رجله الصغير فيه حاجة في القانون اسمها صوبع رجله الصغير ؟ .. قال لي اه دي هتبقى كده تهمتين تهمة حيازة سلاح أبيض وتهمة احداث جرح قطعي أدى إلى عاهة مستديمة !! .... سألته إيه حيازة سلاح أبيض دي .. ده سكينة مطبخ عادية ! .. قال لي هو انت فاكر إن انت تقدر تنزل بسكينة المطبخ دي في الشارع كده .. لو اتمسكت بيها فيها سنة حبس .. يا راااجل أول مرة أعرف الموضوع ده برضه .. لأ وإيه .. قال لي إن المحامي اللي نتف للراجل دقنه ده كان فيه محامي تاني أعقر منه خلا القاضي يحكم عليه بتهمة إتلاف مزروعات !! شوفتوا الهنا !!

قال لي كمان حاجة غريبة .. قال لي إن المحامي الشاطر بيقرا كل القضايا اللي حصلت قبله عشان بيقولك لو فيه قضية قديمة مشابهة لقضيتك في الملابسات واتحكم فيها بالبراءة .. تاخد انت محضر الجلسة بتاعها وتسلمه للقاضي بس .. وتطلب المعاملة بالمثل .. هيديك البراءة على طول .. يا سلااااام .. طب افرض قاضي غلط في الحكم مرة من زمان .. نفضل نقيس عليه على طول ؟ .. أنا أعرف مبدأ القياس ده في الأمور الدينية ممكن .. ولازم حد من الناس الكبار الرسول (ص) والخلفاء الراشدين مش أي حد كده في التاريخ حكم حكم نقيس عليه ..

وقال كمان إن لو واحد عمل جريمة واعترف على واحد إنه كان معاه بيتجاب ويتسجن .. قلتله إزاي ؟ .. مش يمكن بيتبلى عليه .. قال لي لو اعترف على واحد سوابق بيتجاب .. الله !! .. طيب ما جايز واحد سوابق بس مكانش معاه .. أو جايز واحد مش سوابق وكان معاه لكل حاجة أول مرة برضه ..

وسألته بقى عالأخطاء الطبية بحكم المهنة يعني .. قال لي إن دايما بيجيبوها عالممرضة !!

وبس خلص الكلام ومشينا وأنا الحمد لله طلعت مستفيد حاجات كتير بس أهم حاجة إن انت لو معاك فلوس تقدر تطلع من أي قضية .. وإن معظم اللي في السجون هم الناس اللي مقدروش على أتعاب محامي .. وإن القانون .. احم .. فوق الجميع !!

هناك 80 تعليقًا:

رحلتنا في الحياة يقول...

القانون من وضع البشر يعنى اكيد لازم يكون فيه حاجات ناقصة وثغرات تثبت فاشلة انما لو كان التعامل بتتطبيق الشرع من زمان مكنش الحال وصل لكده دول ناس بتتفنن فى تتبع ثغرات القانون

صوت من مصر يقول...

للاسف
طب فين روح القانون الى بنسمع عنها

د. ياسر عمر عبد الفتاح يقول...

ده قانون وضعى فرنسى
وفيه محامين بيعملوا كل حاجة فيه
أنا أخويا خريج حقوق هوه صحيح مشتغلش محامى بس فاهم وأصحابه كثير محامين
قالولى كل الكلام ده قبل كده
حاجة غريبة جداً
تحس إن مفيش عدل ابداً
وإن بالطريقة العبيطة دى ممكن أى حد يطلع من أى قضية بمنتهى البساطة
الأغرب من كده بقى
إن المخدرات نفسها وزنها بيقل بعد فترة لنها بتفقد كثير من مكونتها
يعنى لو القضية قعدت فترة ووزنوا الضبطية تانى هيلاقوا إختلاف فى الوزن
شفت الهنا؟؟

fnoonh يقول...

اه ياقلبي
من قانون مصر
ماهيا لو بلد بتطبق الشرع والدين والاحكام الدينية
ماكانش حد بقى مظلوم
ولا المعاه فلوس هوه التبان برائته

تقبل تحياتي وتقديري

MǿиY El-Shreef يقول...

هيهيهيهيهيهي

ايه العجب ده

يعني كده تجار المخدرات كلهم يقدروا يطلعوا براءه

عمار يابلدنا عمار

بجد حجات عجيبة اوي

فيها ايه بسلو نحكم بشرع ربنا

TIMMY !! يقول...

ما شاااااااااااء الله !!!

أمان يا مصر أمااااااااااان !!

أنا كنت أسمع أيوة عن ( ثغرات ) في القانون ,
لكن دي مش ( ثغرات ) , دي ( خروم كبييييرة ) !!

أنا بفكر أطلع محامي و لا حاجة علشان أعرف آخد حقي في البلد دي !!

مسدس صغير يقول...

فعلا القانون فيه ثغرات كتير جدا لانه فى الاول والاخر قانون وضعى من صنع البشر.
بالنسبة لموضوع الدقن ده معلش كلام غير صحيح. لان التعدى على الانسان لا يشترط له اى شكل ولا يشترط احداث جرح حتى يحاكم الشخص بعقوبة. طب ازاى بقى بيعاقبو بتهمة السب والقذف وما فيهاش اى اعتداء على جسم الانسان . هتقولى اصل منصوص عليها فى القانون والاعتداء على حرية شخص او جسده او شخصه بأى شكل من الاشكال يعاقب عليه القانون بس يمكن القضيه فيها ملابسات تانيه ..
بس دى حاجات بسيطة دا فيه ثغرات تودى فى داهيه . ممكن واحد يبقى زانى وقاتل فى نفس الوقت ويطلع براءة تماما.
وهابقى انزلها بوست عندى فى مدونتى عن قريب ان شاء الله..

احييك على البوست الجميل

حسام غانم يقول...

ايوشة
========

هو طبعا المفروض احنا نطبق الشرع

بس برضه ده مش مبرر القانون يبقى فضفاض للدرجه دي

ما هو في أوروبا معندهمش شرع بس أكيد كويس عننا كتير يعني

شرفتي البوست يا أيوشة
ومبروك ليكي أول تعليق
تكسبي عجلة

حسام غانم يقول...

صوت من مصر
===========

على رأيك يا محمد
كده مليان ثغرات بشكل غريب

نورت البلوج

حسام غانم يقول...

د. ياسر عمر عبد الفتاح
=======================

الله !!

يعني كمااااان المخدرات بتقل لوحدها

طيب وده يبقى اسمه كلام يعني

اللي معاه محامي يطلع منها حتى لو مذنب


سعيد بزيارتك ومتابعتك يا د ياسر

نورتني

حسام غانم يقول...

fnoonh
========

صح يا أفنان

عشان كده كتير فعلا


نورتي البلوج

حسام غانم يقول...

MǿиY El-Shreef
===============

شفتي يا أمينة

لأ وايه

ده شيء صغير من اللي بيحصل

ربنا يرحمنا يا رب


منوراني دايما

حسام غانم يقول...

TIMMY !!
==========

فعلا يا باشمهندس

دي خروم كبيرة

شبكة صيد

وفعلا فيه فئتين واخدين حقهم في البلد دي

منهم المحامين

حسام غانم يقول...

مسدس صغير
=============

هو قانون وضعي من صنع البشر اه

بس مش مبرر لكل الثغرات دي

متهيألي مش في كل دول العالم الثغرات بالمنظر ده


حكاية الدقن دي أنا فاهمك فيها
طبعا منطقي إن عليها عقوبة عشان ده تعدي عالانسان

بس يعني هم اللي عارفين القانون

واحنا كنا خدنا السنة اللي فاتت في مادة الطب الشرعي

إن احنا بنصنف الجروح والإصابات عشان كل نوع ليه عقوبة

اشي جرح قطعي وكدمات وجرح نافذ وعاهة مستديمة


شكرا ليك على مرورك يا مسدس

نورت البوست

mohamed ghalia يقول...

ههههههههههههههههه
أكيد فوق الجميع عندك شك ولا ايه !!!!!!!!!

lecaa يقول...

السلام عليكم ورحمة الله وبركاته
جميل يادكتور_مواضيعك فعلا مميزة
أنا شايفة ان لو كان القانون الإلهي بيطبق فعلا كان دة هيفرق كتير وفعلا مكنش أدى فرصة لناس انها تتبع ثغرات قوانين البشر واللي لازم هنختلف عليها
لكن طبعا القران ككتاب جامع للبشرية كلها وملائم لكل الازمان احق بان تطبق احكامه
اما غياب العدل دا ف كل العالم مش هنا بس واكيد دا انحدار اخلاقي ومنكر علشان اقدر اغيرة لازم عدة شروط منها انه يكون في دائرة سلطاني فابدأ الاول باصلاح نفسي ثم من هم في رعيتي واكيد دا هيكون له برده تأثيره على المجتمع.....
أحييك مرة تانية

KEBLAWYAT يقول...

".. أنا أعرف مبدأ القياس ده في الأمور الدينية ممكن .. ولازم حد من الناس الكبار الرسول (ص) والخلفاء الراشدين مش أي حد كده في التاريخ حكم حكم نقيس عليه .. "

هو أولا إنت بتتكلم فى حاجه غلط من أساسها

يعنى إنت المفروض تبقى القوانين إللى بتحكمك هى قوانين الشريعه الإسلامية

وده مش بيحصل

يبقى متنتظرش حاجه بقى



لا بس حلوه بتاعة اتلاف المزروعات دى

شوية قهوة يقول...

شكرا على الزيارة
ادخل تاني وانت تعرف اجابة السؤال
اقرا الموضوع

salma mohamed يقول...

ههههههه
نتف مزروعات,بجد دي نكته,
بجد الله المستعان على القانون لو مش ماشي تبع شرع ربنا,
ياما في السجن مظاليم,
وياما مجرمين بره السجن,
والمحامي بجد لو مش عارف ربنا هو والقاضي هيتحاسبوا حساب عسير عند ربنا.

حسام غانم يقول...

mohamed ghalia
=================

لا معنديش أي شك يا سعادة الباشا

هههههههه

نورت يا محمد

شوية قهوة يقول...

اختار حاجة وحدة بس

حسام غانم يقول...

lecaa
=======

صح جدا يا د لقاء

دايما تعليقاتك قيمة ومفيدة

شكرا ليكي

حسام غانم يقول...

قبلاوى
======

أيوة متفق معاك طبعا

بس برضه مش منطقي القياس على أي حد حتى لو في الشريعة

لأن دايما الأحكام البشرية فيها نسبة خطأ


نورت البوست يا قبلاوي

حسام غانم يقول...

مقتطفات من حياة فتاة
=====================

هههههههههه

لا ماليش دعوة أنا عايز اختار أكتر من اختيار

حسام غانم يقول...

salma mohamed
===============

فعلا يا سلمى
ياما في السجن مظاليم
وياما مجرمين بره السجن

وأنا متهيألي إن لو القضاء بالذات فسد في مصر

يبقى خلاص على مصر السلام

هتبقى غابة

شكرا جدا لمرورك ومتابعتك
نورتي البوست يا سلمى

KEBLAWYAT يقول...

"نورت البوست يا قبلاوي"

عارف طبعا يا حسام

المهم

هو صحيح خد الراجل نتفله شعر دقنه إزاى

ما كده يبقى خطفه

أكيد منتفلوش شعر دقنه فى بيتهم و كان بيقنعه مثلا إنه بيدور على حاجه جوه

wesoooooooooo يقول...

ايه الغريب فى كده
يابنى ده العادى بتاع مصر
أبتسم أنت فى جمهورية مصر العربيه
كل اللى تقدر تقوله"حسبى الله ونعم الوكيل"
لا بس حكاية نتف مزروعات دى جامده على الآخر هههههههههه

Khaled Selim يقول...

يا جدع أنا كرهت البلد دي أكتر وأكتر

المفروض إن الطبيعي في القانون الوضعي إنك تلاقي العك والهبل ده كله
ده إحنا لو عملنا موضوع زي ده عن القضاء في أمريكا هتلاقي بلاوي وارمة وغرغرينا في الدستور

لكن القانون المصري بقى حاجة زي الفل
حبة من أيام الإستعمار الأنجليزي من القانون الإنجليزي
وحبة من الشريعة الإسلامية
مع بعض التغييرات بين الفترة والتانية

يعني كائن هلامي غير واضح المعالم


سلملي على القضاء النزيه
وسلملي على العدل والمساواة
وسلملي على المستقبل

أم فريده يقول...

هى يعنى جت على القانون اللى هيبقى فوق الجميع

انا بيقيت بشك فى كل حاجة
حتى لما يكون فى قضية ويقولوا دة المتهم مش بصدقهم

ولما بتحصل كارثة او انفجار او اى حد بيعمل حتى ثورة
بيقولوك ايه؟

مختل عقليا
اخفاء الحقائق وتغييرها بقى عادة
دا العادى
تحياتى

المعتصم يقول...

واحد نتف لواحد دقنه ومافيش ماده فى القانون بتجرم ده
وواحد يطلع براءة علشان المحضر فيه 500جرام مخدرات والمحضر التانى فيه501جرام
وغيره وغيره وغيره
كده يبقى انت اكيد اكيد فى مصر
والقانون فوق الجميع فعلا
وحسبى الله ونعم الوكيل
تحياتى يادكترة
ودمت بكل خير وود

محمد سعد القويري يقول...

الأخ حسام غانم

بعد التحية

موضوع حيوي أكشن ساخر

ضحكت وتعجبت وحزنت

ويبقى القانون فوق الجميع

دمت بحفظ الله

د/عرفه يقول...

اللى ها يعيش ياما ها يشوف
بجد هتلاقى من الكلام ده كتير اوى
وكل شويه صاحبك ده ممكن يحكيلك بلاوى
دى بس عينه صغيره

hasona يقول...
أزال المؤلف هذا التعليق.
ريمان يقول...

قانون ايه بس


هو بقى فى حاجه اسمها قانون


ده بقه كله سلطه وهيصه


والقانون بقى بالمزاج



تحياتى ليك

حسام غانم يقول...

قبلاوى
=======

ازيك يا قبلاوي

مش عارف موضوع خطفه دي

أنا قولت اللي اتقال لي


لتاني مرة نورت

يلا إن شالله ما حد حوش

Ahmed يقول...

هههههههه
فوق الجميع مين بس؟
دانتا حسستني أن محاكم ديه قهوه والقانون فيها أي حاجه بتتشرب (قهوه ساده أو مغليه أو عناب)
يانهار أبيض
يعني لو محامي معندوش ضمير (ودول طبعا ممكن يكونوا كتير؟) ممكن يطلع مجرمين وقتالين قتله من السجن بالبساطه ديه
لا حول ولا قوة الا بالله

ربنا يستر علينا بأه

حسام غانم يقول...

wesoooooooooo
===============

فعلا حسبي الله ونعم الوكيل

مرور جميل يا ويسوووو

نورتي البلوج

حسام غانم يقول...

Khaled Selim
==============

برضه مش مبرر يا خالد

الفكرة في التطبييييق


شكرا لمرورك يا خالد

اه على فكرة المستقبل بيسلم عليك وبيقولك كل سنة وانت طيب

حسام غانم يقول...

زوجة عنيدة
===========

فعلا يا زوجة احنا وصلنا لحالة كبيرة من انعدام الثقة في أي حاجة

وإن هذا لشيء خطير


نورتي البلوج يا زوجة

حسام غانم يقول...

المعتصم
=========

كلام قمة في الغرابة فعلا يا معتصم

يبقى انت أكيد في مصر


شكرا لمرورك

نورت المدونة

حسام غانم يقول...

محمد سعد القويري
=================

شكرا ليك يا محمد

تحياتي ليك

نورتني

حسام غانم يقول...

د/عرفه
=======

هقول ايه بس يا عرفة

المشكلة إن الواحد كان عارف إن فيه ألاعيب

بس مكنتش كتوقع إنها بالوضوح ده


منورني دايما

حسام غانم يقول...

تم حذف التعليق
===============

شكرا ليك يا تم حذف التعليق
و .. احم .. ايه ده مين اللي رد رد ومسحه ؟

حسام غانم يقول...

ريمان
=======

ههههههه
بالظبط يا ريمان

شكرا لمرورك

حسام غانم يقول...

أحمـــــــــــــد أبو العلا
=========================

أيوة للأسف يا باشمهندس أحمد

بالبساطة دي

وياللأسف


نورت البوست

موناليزا يقول...

استفدت جدا من الحوار ده وبشكرك جدا على هذا البوست

حسام غانم يقول...

موناليزا
===========

ميرسي يا موناليزا ربنا يخليكي

شكرا لمرورك

نورت البلوج

د.عصماء يقول...

السلام عليكم.صدق الله تعالى:(ومن لم يحكم بما انزل الله فاولئك هم الفاسقون)طول ما احنا هانبعد عن دين الله وشرعه هنلاقى بلاوى اكتر من كده ربنا يعافينا ويعافيكم.

المـــفـــــــقــــــــوعـــــة مــرارتـهــا يقول...

قانون ده والا فتة
دا الواحد كدة ممكن يضيع ياجدعان
ربنا مايوقعنا تحت ثغرات القانون

المـــفـــــــقــــــــوعـــــة مــرارتـهــا يقول...
أزال المؤلف هذا التعليق.
احساس طفلة محبة للرومانسية بس واقعية يقول...

هم يضحك وهم يبكى
المتهمين برة السجون عشان سرقوا فلوس ناس وطلعوا بيها برائة
والمسروقين جوة السجون عشان بلغوا ومكنش معاهم فلوس يدوها لمحامى يدافع
وفى الاخر تطلع بلاغ كاذب

اهو كل حاجة فى اى مكان
واللهى انا مش عارفة اقول اية
القانون فعلا فوق الجميع
مشاء الله

تقبل مرورى

Unknown يقول...

بوست جميل دكتور حسام
فعلا فيه محاميين متخصصين فى البراءة (لتجار المخدرات )بالثغرات اللى بتبقى فى المحاضر ومتهيأللى قريبك
قالك على (اشهر واحد فيهم) كمان
من ضمن الحاجات وبعيد عنك عن تجربة
(مش انا ماتبصش لى:)لا واحد اعرفه
بيقولك ان بعيد يارب عن الناس
كلها ان يوم (الحبس) بسنة فى السجن
وان فعلا الحبس ده بعيد عنك العذاب بعينه.كمان من الحاجات اللى عرفها ان شهادة الميت مصدقة!يعنى لو واحد بيموت وقال ان فلان قتلنى بيصدقوه وهو لازم يثبت العكس !
يكفينا يارب شر المحاكم والشرطة والحبس والظلم والظالمين.

Beram ElMasry يقول...

الاخ العزيز ا حسام غانم
السلام عليكم ورحمة الله وبركاته
ابنى دكتور حسام شكرا للزيارة والتعليق (من أكتر القصايد اللي عجبتني
في قراءاتي *)
وعلى فكرة ارجوك ان لا تعتمد على ان الممرضة هتشيل البيعة ، خاصة لو كانت حلوة
لك تحياتى والسلام عليكم ، ولا سلام مع اليهود

سوبيا يقول...

فكرتني
بواحد معرفة
كان برده بيقول كدهه

القانون فوق الجميييييييييع

بقاله 10 سنين
دايخ
فالمحاكم
مش عارف ياخد حقه
مع انه ليه حق

ماتعرفش عنوان الجميع ده فين
وهو يروحله هناك

د/محمد الخطيب يقول...

ههههههههههههههههه

نتف مزروعات

ههههههههههههههههه

حلوة دى

يابنى محدش يبقى فوق القانون

انت عايش فى مصر ياعم الحاج

فاكر حاجات امن الدولة

هههههههههههههههه

جميل ياحسام

حسام غانم يقول...

د.عصماء
========

تمام يا دكتورة

ربنا يعافينا جميعا بإذن الله


شكرا لمرورك

حسام غانم يقول...

المـــفـــــــقــــــــوعـــــة مــرارتـهــا
====================

بالظبط كده يا أستاذة سحر

هو فتة

وأنا مبجبش الفتة :)


نورتي البلوج

حسام غانم يقول...

احساس طفلة محبة للرومانسية بس واقعية
====================
بالظبط يا احساس طفلة

بس هي التقسيمة دلوقتي مش سارق ومسروق

لأ

بقت معاه محامي أو معاهوش



شكرا لمرورك ومتابعتك

نورتي المدونة

حسام غانم يقول...

norahaty
=========

هقول ايه بس

ربنا يحمينا جميعا من كل ده


نورتي يا دكتورة

حسام غانم يقول...

Beram ElMasry
===============

اه طبعا إن شاء الله الواحد مش هيبقى شغال وحاطط في دماغه ثغرات القانون وإنه يشيل أي حاجة للمرضة

إنما يعني لو كانت حلوة بقى الموضوع يختلف :)


شكرا لمرورك يا أ بيرم

منورني دايما

حسام غانم يقول...

سوبيا
========

هههههه

ربنا معاه

يدينا ويديله طولة العمر

الجميع ورا محطة البنزين الدور التالت


نورتي البلوج يا سوبيا

محاولة لكسر الصمت يقول...

سيدي... ليس القانون فوق الجميع..
وإنما الجميع تحت القانون...
تحياتي..

حسام غانم يقول...

د/محمد الخطيب
===============

الخطيب حبيب قلبي من جوه

واحشني يا ابني

نورك في البلوج غطى على نور الممثلة

حسام غانم يقول...

محاولة لكسر الصمت
=================

همممممممم

مش فاهم والحمد لله

Unknown يقول...

انا استفدت بشده من تلك التدوينة
يا حسام بجد
يعنى كدة مش بعيد قضية هشام طلعت و السكرى تنزل على مفيش
و يأخذوا الإثنين براءة
!!!
و بعدين المفروض تقول القانون تحت الجميع
مش فوق
لان فوق يبقى ماشيين بيه تمام لكن تحت
يبقى بيلعبوا بيه الكورة و يمسحوا بيه البلاط و فى الأخر يقولك كله قانونى يا باشا و احنا فى السليم
!!!
تعرف انا قعدت مرة مع وكيل نيابة
بدردش معاه فى موضوع القضايا اللى يتحكم فيها براءة و لكن اصلاً التهمة لابساه المتهم بنسبة مليون المية
قاللى القاضى قدامه ورق يحكم بيه و بس
الورق بيقول ايه
و ممكن يكون ورق مضروب مش صح
ّّّ!!
شكراً على التدوينة

سندباد يقول...

البلد دي اللي يشوفها من فوق غير اللي يشوفها من تحت

يا صاحبي ..كل حاجة بتمشي ما دام فيه حاجة اسمها روح قانون

و بعدين ما دام مش بنطبق حاجة صح
يبقي مجتش عليهم

و ملحوظة اخيرة ... ان القانون ده في المزيكا برضه فالمحامي اللي بيعرف يلعب عليه بيكون الاتي محترم

بيس يا مان

سندو

حازم النبراوي يقول...

تعرف ان ابوي خريج حقوق .... لكن عمرة ما فكر يشتغل محامى.. لما بسالة بيقولى .. (يا ابنى المحامى دة نصاب برخصة) يبقى عارف ان الراجل قاتل اوسارق ومع ذلك يتعاون مع الشيطان علشان يخرجة من السجن ... طبعا مش كل المحاميين لكن انا حبيت اعلق واقول وجهه نظري
شكرا لك

Unknown يقول...

اشطة بالهبل
انا على طول اقول لعبة القانون دى خطر وممكن تودى النار ومحدش بيصدقنى

حياتى نغم يقول...

السلام عليكم / موضوع خطير يا دكتور حسام حسبنا الله ونعم الوكيل ، ودى ضريبة البعد عن الإسلام وتطبيق الشريعة الإسلامية .. ماهو قانون فرنساوى يعنى مجرد فهلوه ، هوه اللى بقينا فيه من قليل ربنا يرحمنا وما نكون تحت رحمة القانون ده أبداً ، تحياتى .

حسام غانم يقول...

بدراوى
=======

شكرا يا بدراوي على إطراءك

بالنسبة لهشام طلعت والسكري

انت منتظر ايه يعني ؟

إن كان اللي أنا بقوله ده في قضايا سلاح ومخدرات

حاجات خفيفة يعني

تخيل بقى الشغل الكبير اللي هيحصل مع هشام والسكري

يا سيدي كفاية قضية أكياس الدم

نورت البلوج يا بدراوي
شكرا لمرورك

حسام غانم يقول...

سندباد
========

سندو حبيب قلبي

الله عليك

فعلا القانون زي المزيكا
والمحامي الشاطر آلاتي

نورتني يا محمود

حسام غانم يقول...

حازم النبراوي
=============

حلو التوصيف ده يا حازم

نصاب برخصة

نورتني

حسام غانم يقول...

enjy
=====

صح جدا يا إنجي

للأسف


نورتي البلوج

حسام غانم يقول...

حياتى نغم
===========

هو المفروض اه نطبق الشريعة الإسلامية

بس يعني ما هم في فرنسا بيطبقوا القانون الفرنساوي برضه

وأكيد الحال مش كده


شكرا لمرورك يا حياتي نغم

نورتي البلوج

غير معرف يقول...

القانون لا يحمل مغفلين
هههههه

شمس النهار يقول...

انت عارف لي قريب محامي كبير قال لي ان القانون وضع لكي يخرق ايه رأيك
طيب وهنروح بعيد ليه مش المدرس اللي موت الولد اخد اقصي عقوبه ضرب افضي لموت عارف انت المحامي بتاعه في الاستئناف هيعمل ايه هيشكك وهيعتبروه قتل خطأ وياخد ياسنه يا اقصي عقوبه 3سنين
وعمار يامصر
وعايزه اقول لصوت من مصر روح القانون دي حصلت اي روح حلوه في البلد دي علي بلد اللي يروح مايرجعش
البوست جميل جداجدا

حسام غانم يقول...

غير معرف
=========

ههههههه
مااااااشي يا سيدي

حسام غانم يقول...

شمس النهار
============

نقول ايه

على رأيك

عمار يا مصر

نورتي يا شمس

Soul.o0o.Whisper يقول...

كل شئ فى مصر بئا بالحداءة و الفهلوة
و الشطارة و تفتيح الدماغ

و العُقر فعلا -رغم انى لسه عارفاها منك- اللى شايف انه مفيش حاجة مايقدرش يحلها حتى لو كانت غلط وهو مش مقتنع بيها

فعلا اللى بيحكم بهواه مش تأمن له ابدا



شكرا على البوست دا

حسام غانم يقول...

Soul.o0o.Whisper
=================

صح يا سوول

وبعدين إزاي مش عارفة عقر دي لحد دلوقتي

ده مصطلح مشهور جدا :)


شكرا لمرورك

نورت البلوج