الجمعة، 3 أبريل 2009

جااانا التاج جااااانا


التاج ده جالي من العزيزة إيمان بنات أفكاري

 

ومفيش يوم وجالي من الباشمهندس علي درويش

 

وشوية وجالي برضه من فنونة ما وراء الأفق

 

وبعدين جالي من موني عيش أحلى ما في اللحظة

اللي اتغدت بيا قبل ما اتعشى بيها J

 

معلش اتأخرت في الرد بس كنت مزنوق الفترة اللي فاتت

عشان امتحان جلدية امبارح الخميس

 

المهم نبدأ

 

يلا بسم الله

 

اسمك ؟

 

حسام غانم .. اتفاجئتوا هه

 

المشهور بيه وسط أصحابك ؟

 

هممممم

هو معظم اصحابي بيقولولي حسام عادي

وفي الراوند بما إن كلنا حسام بيقولولي يا غانم

فيه قلة بقى بيقولوي سمسم

وقلة بيقولوا حوحو

وواحد بيقول أوسة

 

 

سنك ؟

 

21 سنة

 

اسم مدونتك ؟

 

حسام غانم

 

والسبب مش النرجسية بالتأكيد

 

بس يعني قبل ما أبدأ كنت استقريت على اسم

بس لما جيت أعمل الاسم ده لقيته متاخد قبل كده

قلت أعملها حسام غانم بقى بحيث تبقى بتعبر عني

وأنا مؤمن بالمقولة اللي بتقول

أفكاري هي أنا

 

وبعد كده عرفت إنه كان اختيار حكيم

عشان اللخبطة

حسام غانم صاحب مدونة حسام غانم

شفتوا السهولة

أنا دلوقتي في قمة اللخبطة في مدونات كتير

الواحد عارف أسامي الناس بس مش حافظ أوي أسامي المدونات

فتلاقي لما تخش المدونة تقعد شوف ملف التعريف تفتكر كانت بتاعة مين

ليه كل واحد اسمين .. ما يبقى اسم واحد حتى لو مش الاسم الحقيقي

ليه يبقى الباحث عن مش عارف ايه صاحب مدونة أحلام مش عارف مين

 

 

 

 

مجال دراستك ؟

 

خامسة طب بشري .. يا مسهل

 

 

 

الصورة الرمزية لمدونتك بتعبر عن ايه ؟

 

مبتعبرش عن حاجة

هو أنا لما بدأت أخش نت ومنتديات وكده

قولت أختارلي صورة شخصية

ولقيت الشخص اللي بيضحك بعبط ده

فعجبني حطيته

ومن ساعتها وهو معايا

 

مبحبش التغيير في الحاجات الصغيرة دي

هو الشخص ده صورتي في المنتديات وهنا

وفيه صورة تانية ليا

عالفيس بوك وفي منتديات تانية

ومش بغير فيهم بقى

 

حتى عالموبايل هي نغمة للرن ونغمة للرسايل وانجز نفسك

بقالهم سنة متغيروش باين

دماغك

 

 

هل فكرت فى إغلاق المدونة ؟ والسبب ؟

 

لأ مفكرتش

هقفلها ليه يعني

حتى لو انشغلت عنها فترة

أهي موجودة

 

 

ايه رد فعلك لو حد قل أدبه عليك في التعليق ؟

 

هممممم

هو أنا تماما ضد حذف الردود

حتى لو معترض على كلامي أو بينتقدني

 

إنما لو فيه كلام خارج أو سب مباشر

هضطر أحذفه

 

أسوأ مدونة ؟

 

فيه مدونات الواحد اتكعبل فيها كده

ملحدين على شواذ على مش عارف ايه

 

فمدخلتلهمش تاني

إنما من حق كل واحد يعبر عن رأيه

 

 

هيحصل ايه للإيميل بتاعك بعد ما تموت ؟

 

مش هيحصل له حاجة

بس هو متسيف عالمتصفح

فممكن حد من اخواتي يبقى يخش بيه يقول لكوا

 

 

أديت الباس وورد لحد قبل كده ... ؟

 

لأ

 

السفر بالنسبة لك ؟

 

هوووو هووووووو هووووووووه

أنا شخص بكره جدا الثبات والملل والروتين

 

ولو طولت أقدر كل يوم خميس أقضيه في مكان

هعمل كده

بجد تبقى حاجة جامدة

بدل ما الواحد بيخرج كل مرة في نفس المكان

ليه الواحد مياخدش اصحابه كل خميس ونخللي خروجتنا النهاردة في الزقازيق مثلا في بنها في دمنهور

تغيييير

 

بالنسبة للسفر بره مصر

فأنا مسافرتش غير السعودية

كنا قاعدين فيها وأنا صغير

بس إن شاء الله في الأجازة السنة دي

هنطلع صربيا شهر

حاجة كده تبادل طلابي تبع الكلية

 

 

المود بتاعك ؟

 

متقلب المزاج

ممكن حاجة صغيرة تحصل في أول اليوم تغيرلي مودي طول اليوم

 

 

بتعمل ايه فى وقت فراغك ؟

 

اااااااه

 

وقت الفراغ

 

طبعا بالإضافة للكمبيوتر والنت والمنتديات والمدونات

 

فميضرش يعني أتفرج على فيلم عالكمبيوتر وأنا مفشفشلي اندوماية وباكلها كسناكس

 

أو أقعد في السرير أقرالي قصة ما وراء الطبيعة وطبق اللب في ايدي

 

أو أخرج مع أصحابي أو ألعب كورة

 

 

الأكلة المفضلة ؟

 

همممممم

 

خدوا عندكوا

 

بحب الكبسة السعودي .. الفراخ بالبطاطس بالبصل .. البسلة .. الكوسة

 

ومبحبش السمك .. الملوخية .. محشي الكرنب .. وطبعا الفسيخ والكوارع والحاجات دي

 

 

أكلت في مطعم صيني مرة

 

الأكل كان حلو بغض النظر عن شكله

دي صورة طبقي


ودي صورة طبق صاحبي


لو لاحظتوا فيه في الطبقين حاجة كده شبه صباع الجلاش

شفتوها ؟

كل واحد فينا بيقطم منها بسعادة فاكرها جلاش

طلعت حاجة ربنا ما يوريكم

كرنب مسلوق سخن .. يع

كل أما افتكر الطعم معدتي تقلب

ودي صورتها من قريب



 

الصفات التى ورثتها من والدك ؟

 

الطب J .. وممكن الكرم وتكبير الدماغ

 

 

الصفات التى ورثتها عن والدتك ؟

 

الطيبة

 

أكتر ست حاجات بتكرهها ؟

 

هممم

ليه الحاجات اللي بكرهها الأول قبل اللي بحبها ؟

 

بكره الظلم

بكره سياسة أنا اللي بفهم والباقي مبيفهموش أو رأيي هو اللي صح والباقي غلط

بكره الفسيخ والـ .. ايه ؟ قولناها دي ؟ .. طيب

بكره ممدوح فرج

بكره النيورو

 

فيه حاجة كمان

مبحبش الخيال العالي والرومانسية الحالمة دي

اللي هو تقول له السماء بتمثلك ايه

يقولك الصفاء والنقاء

والبحر بيحسسني بالغدر والتقلب

والوردة بتحسسني بالبراءة والطهارة والكلام الحمصي ده

 

بكره كمان عامر منيب ومصطفى قمر لما بيمثلوا

وبالتالي بحب أتفرج عليهم كنوع من الماسوشية

 

عارفين البرنامج اللي بيسأل سؤال أهبل ويستنى اتصالات المشاهدين والواد أبو شعر ده اللي بيقعد يخنق عاللي خلفوك عشر دقايق لحد ما يتلقى اتصال

عارفينه ؟

ده بكرهه بقى

بس لما بلاقيه بتفرج عليه .. ماسوشية برضه

 

بتخنق لما حد يقول اسم مروان بتسكين الراء .. يع

 

وطبعا بكره باقي الحاجات اللي الناس كلها بتكرهها

الخيانة والخداع والغباء والقهر وعلاء صادق والغلاسة والثرثرة والكذب

 

 

أكتر ست حاجات بتحبها ؟

 

طبعا بعد ربنا والرسول وأهلي

 

بحب إصحابي .. عيال دماغها عالية بجد

بحب الكمبيوتر

بحب المدونة والمدونين

بحب الصراحة

بحب أحمد حلمي

بحب أحمد خالد توفيق

بحب بينكي وبرين

بحب اللون الأحمر واللون الأسود

بحب الزمالك

بحب مايكروسوفت

بحب ألعب كورة وتنس وسلة

بحب أغني

 

 

شخصيتك نوعها ايه ؟

 

شخصيتي ملولة صريحة كسولة

 

 

لماذا دخلت عالم التدوين ؟

 

همممم

 

هو أنا في الأول مكنتش نتخيل العالم التدويني بالشكل الرائع ده

 

كنت كل معلوماتي عن المدونة

إنها بدل الكراسة بتاعتك

مكان تكتب فيه اللي انت عايزه

 

فعملتها وحطيت فيها شوية حاجات

وواحدة واحدة بدأت أتعرف أكتر عالعالم ده

 

 

أجمل كلمة قيلت فى وصف مدونتك ؟

 

هو طبعا كل تعليق بيجيلي بيسعدني سعادة خاصة

بس يمكن أبرز حاجة كان تعليق بيقول إن دايما مواضيعي فريدة

 

 

أهمية التعليق بالنسبه لك ؟

 

يعني تقدر تقول إنها الترمومتر اللي بتقيس بيه رأي الناس

وتحدد بيه هل فكرتك واصلة زي ما انت كنت عايز ولا لأ

وغالبا كل تعليق بيبقى فيه معلومة جديدة بستفيد منها

 

 

أحسن بوست كتبته وليه ؟ ضع اللينك

 

همممم

ايه يا واد يا حسام ؟

 

هم طبعا كلهم أولادي

 

بس أنا بحب موضوع ( وجهة النظر الأخرى ) عشان بحاول دايما أتعلم أفكر بالطريقة دي

 

وكمان موضوع ( رجل المستحيل ) عشان كان أول حاجة كتبتها خالص

 

وموضوع ( كبدة حمار ) عشان كان بداية جديدة ليا بعد فترة كبيرة من الإنقطاع

 

 

أفضل بوست قرأته ؟وأفضل مدونة؟

 

فيه مدونات كتير قمة في الروعة باتابعها على طول

 

فتافيت

إيمان

فنونة

م/علي درويش

د/عرفة

سلمى محمد

ريمان

المعتصم

قبلاوي

أيوشة

حازم النبراوي

احساس طفلة

د/محمد الخطيب

بدراوي

موني الشريف

ويسوووو

عمرو فاروق

د/ ياسر عبد الفتاح

محمد كمال كيمو

محمد غالية

مسدس صغير

فكرة من الزمن ده

محمد القويري

مفكر

صيدلانية مطحونة

نبض الحياه

كلام فاضي

أحمد سعيد بسيوني

حلم كبير

مذكرات مشاغب

ابراهيم سلام

تيمي

موناليزا

آدم المهدي

حياتي نغم

أبو العريف

غربتي

خديجة عبد الله

نوراهاتي

 

ورغم إن مبحبش الشعر بس عجبني جدا :

 

محمود أبو العزم .. رجل كل المناسبات

ميرام .. الشاعرة الصغيرة

بيرم المصري .. الكرباج السوداني

 

 

 

 

 

الإنترنت بالنسبة لك ايه ؟

 

وسيلة رائعة في كل مجالات الحياة

خصوصا التواصل والحصول على المعلومات والأخبار

 

تمرر التاج لمين ؟

 

هو أنا كنت عايز أمرره لناس كتير بس معظمهم جاوبوا عليه

فهمرره لدول ويا رب ماكونش نسيت حد من اللي كنت عايزهم ولسه مجاوبوش

 

محمود أبو العزم

ميرام

كرباج سوداني

سلمى محمد

المعتصم

قبلاوي

بدراوي

ويسوووو

د/محمد الخطيب

عمرو فاروق

محمد غالية

فكرة من الزمن ده

محمد القويري

مفكر

صيدلانية مطحونة

نبض الحياه

كلام فاضي

أحمد سعيد بسيوني

حلم كبير

مذكرات مشاغب

ابراهيم سلام

تيمي

موناليزا

آدم المهدي

غربتي

خديجة عبد الله

نوراهاتي

هناك 120 تعليقًا:

dramaqueen يقول...

واااااااااااو
اول زيارة واول تعليق

محدش ادى

مدونتك حلوة اوى
واضح ان شخصيتك كويسة
هاقرا باقى المواضيع واكيد هتعجبنى

تحياتى وميرسى على زيارتك

د. ياسر عمر عبد الفتاح يقول...

بغض النظر عن الماسوشية
فكل إجاباتك جميلة وبتقول فيه هنا شخصية محترمة معتدلة ودمها خفيف


شكلك متأثر جداً بأحمد خالد توفيق

salma mohamed يقول...

بجد تعليقاتك لذيذة
وبصراحة برضه فريدة من نوعها,
انا مش عارفه ايه اللي بيحصل ده ثالث مره التاج يتبعتلي,
انتوا بتقولولي مفيش مفر منه (:
ان شاء الله هبقى اجاوبه.

MǿиY El-Shreef يقول...

عاااااااا

وربنا كنت اول تعليق بس النت عملها معايا

اهو تعليقي

..

وبعدين جالي من موني عيش أحلى ما في اللحظة
اللي اتغدت بيا قبل ما اتعشى بيها J
..

هع هع هع ده انااااااااا

..
وقلة بيقولوا حوحو
..

كويس انهم قله :D

..
هوووو هووووووو هووووووووه
..

هههههههههههههه

حلوه

..
أنا شخص بكره جدا الثبات والملل والروتين
..

طب منين ومنين مش تغير الرينج تون ولا الموبايل ولا الرمزيه بتاعتك

..
هنطلع صربيا شهر
..

يعني هترجع نقولك محمدوووف هههههههههه

:p

..
مفشفشلي اندوماية وباكلها كسناكس
..

ايه ده ايه ده مووووش مومكون (ع طريقه الشوالي)

انت بتاكل الاندومي سناكس زيىىىىىىى بالظبط

انا افتكرتها عاده عبيطه :D

..
ومبحبش السمك .. الملوخية .. محشي الكرنب .. وطبعا الفسيخ والكوارع والحاجات دي
..

مش معقول لازم اعمل تشيك ع شجره العيله

انا بكره كل ده ياسلام الملوخيه .. اخيرا لقيت شبيهي يابشرررررررر

كمان بموت ف البسله بس بكره الكوسه يع يع

انت عارف انا لو شفت اكل مش عجبني شكله مستحيل اكل ولا حتى عجبني نص نص بس ماعرفوش لو قتلوني مش هاكل

وبعدين انا سامعه سمعه زي الزفت عن التشاينيز فوود ابلتنا حكتلنا حجات يع صراحه

..
بكره ممدوح فرج
..

هيهيهيهيهيهي .. ليه بس كده ده حبيب الملايين وهلف لفه واررررررررجع مره تاني هههههههههههه

..
والكلام الحمصي ده
..

ياعملي انت ياعملي :D

..
والقهر وعلاء صادق
..

ههههههههههههه .. اه ياكايدهم

حرام اديكوا مشيتوه من القناتين :D

كان قمر ياخواتي

..
بحب بينكي وبرين
بحب اللون الأحمر واللون الأسود
..

انت اتولدت فين ياحسام عشان انا ابتديت اشك .. ع فكره كل الي بتحبهم بحبهم ماعدا الزمالك :D:D:D

بس احمر واسود غريبه بتحب الاحمر .. وبعدين غريييييييبه ماشفتش ف البلاك ليست الاهلي هع

وبعدين دول اكتر من سته

شكلها عقده ستة هههههههههههه

..
أخص منهم كمان :
..

كل ده تخص

لا والنبي اكتب كمان

بس كنت هعيط لو مالقيتش اسمي :D

كل دول هتمررلهم

ياراجل خلي غيرك يستمتع بانه يمرر التاج

يالهوي ع الانا الي فيك :P:P:P

يلا ابسط ياعم

تعليق ولا موضوع التعبير

وصراحه انت رغاي اصلا هع

سلام ياعم حسام

حسام غانم .. تصدق اسمك في ميوزيك كده

ههههههههههههي

حسام غانم يقول...

dramaqueen
=============

أهلا بيكي يا كوين

ومبروك عليكي أول زيارة

تكسبي عربية


شكرا عالمرور
وإن شاء الله يدوم التواصل

ghorBty يقول...

السلام عليكم

بجد اجابات جميله

ربنا يبارك ما شاء الله

واطباق الاكل عامله شغل :)

ربنا يوفقك في دراستك ويحقق كل امانيك

دمت بخير

غربتي

حسام غانم يقول...

د. ياسر عمر عبد الفتاح
======================

ميرسي كتير دكتور ياسر

ربنا يخليك

اه فعلا أحمد خالد توفيق مش بس أثر عليا

ده أثر على جيل كامل

شكرا لمرورك

منورني دايما

حسام غانم يقول...

salma mohamed
===============

شكرا ليكي يا سلمى

في انتظار إجاباتك بقى

اوعي تهربي


نورتي المدونة

حسام غانم يقول...

MǿиY El-Shreef
================

يا خبر أبيض يا موني كل ده تعليق

لأ موضوع تعبير فعلا

أنا مش عارف أعلقلك على إيه ولا إيه

بس كله حلو يعني

ما عدا موضوع الستة ده :)


نورتي يا موني

حسام غانم يقول...

ghorBty
=========

شكرا ليكي يا غربتي

وفي انتظار إجاباتك

اوعي تهربي :)


نورتي البلوج

صوت من مصر يقول...

يا حسام تحبق اقولك التاج عرفنا عليك بشكل ماساوى
انت زمالكاوى يا حسام نورت ؟

د/عرفه يقول...

بجد يا حسام فعلا
إجاباتك فريدة جدا
تدخل بيها أى لجنة شفوى تخص الممتحن بالإجابات دى تقفل اللجنة وتاخد الفول مارك من غير ما يكمل معاك
ههههههههههههه

Rania Lelah يقول...

جميله اوى اوى اجاباتك و دمها خفيف موت
تحياتى

mohamed ghalia يقول...

هههههههههههههه
ايه ياعم الدبلوماسية دى
انت قولت انى المدونين كلهم عجبينك كده هههههههههه
لازم تختار
ربنا يكرمك ويسعدك

رحلتنا في الحياة يقول...

لا تماما تماما يادكتور اجابات حلوة اوى وعجبتنى جدا المقولة دى

وأنا مؤمن بالمقولة اللي بتقول
أفكاري هي أنا

ربنا معاك فى الامتحانات ويوفقك

S H A H يقول...

كويس اني لحقت اول تعليق يا دكتور:PPPP
جميلة مدونتك و تقبل مروري

صحيح انتو كنتو بتاكلو فين

OldCatLady يقول...

:))

ماسوشى....بتكره ممدوح فرج....ملول و صريح و كسول و بتكره المتذاكين من عينة أنا بفهم و أنت فى البطيخ و بتحب أحمد خالد توفيق

أنت بتقول كلام زى الفل....و دماغك زى الفل

:))

و مدبـــس نص مصر فى التاج...و أنا من ضمنهم...من عنيـــا بس اصبر عليا حبتين

سلامات

♥نبع الغرام♥♪≈ يقول...

السلام عليكم ورحمة الله وبركاته
تقبل مرورى
أنا زيك برده جانى تاج هديه
وبجد رديت بكل صراحه
ويارب يعجبكم
وبصراحه انبسطت قووى لما لقيتك بتتكلم بصدق
تقبل تحياتى

المعتصم يقول...

بسم الله الرحمن الرحيم
السلام عليكم ورحمة الله وبركاته
د/ حسام
الاجابات جميلة
والشرح مستفيض
وكمان انا عرفت السبب انك بتكره علاء صادق ههههههههههههههههههههههههه
وبعدين الاخت مونى عندها حق فى موضوع السته ده
ههههههههههههههههههههههه
عقده ياعينى
ههههههههههههههههههههههه
بس تصدق فيه حاجات كتير مش بتحبها انا كمان زيك فيها
يعنى ممدوح فرج مش بطيقه ومش بحب الفسيخ والكوارع والذى منه
وبعدين بتقول ورثت من والدك الطب وممكن الكرم !!! انا كده هقلق منك
بس انا بحييك على شجاعتك وجرأتك وصراحتك
هو فيه فى مصر حد لسه بيقدر يقول انه بيحب الزمالك !!!!! غريبه بصراحه ههههههههههههههههههههههههههههههههه
بص ياعمنا
انا مش مجاوب على التاج والسبب عندى فى ردى عليك فى مدونتى
لو عاوز تقرالى تاج مجاوبه قبل كده ادخل فى الارشيف هتلاقى تاج فى شهر يناير اقراه وكده زى الفل
هههههههههههههههههههههه
تحياتى ودمت بكل خير وود
والسلام عليكم ورحمة الله وبركاته

Unknown يقول...

السلام عليكم ورحمة
الله تعالى وبركاته
واستنى علىّ يادكتور حسام:)
بعد سنتين ان شاء الله انت
والدكتور عرفة فى التدبيسة
بتاعة التاج دى معلش !معلش!
أن شاء الله احله كوبيس واقولك
ولو ان انت الدكتور عرفة قولتوا
كل الكلام الحلو اللى ممكن يتقال :)
على العموم زى ما قلت حامخمخ كده
واجاوب بأذن الله.ومتشكرييينن يازميل فى النقابة عن قريب ان شاء الله

wesoooooooooo يقول...

السلام عليكم
جميلة جدا اجاباتك
ربنا يوفقك والى الامام دائما
بس ثوانى بقى انت بتدبسنى ولا ايه؟
ماشى حاضر ياسيدى متشكرين انك افتكرتنا
تحياتى
دمت بكل الخير

fnoonh يقول...

اجوبتك غاية في الجمال والله وباين مشاء الله تبارك الله فيها الصراحة الجامدة

وبالنسبة للاكل الصيني شكل الوجبة كانت هنا في السعودية ولا في مصر اصل هنا بيقدموها كده نص دجاج عفوا عفوا قصدي فراخ ونص لحمة ومعاها مكرونة ورز

بس جميييييييييييييل جدا جدا
يلا بالهنا والشفا

بالنسبة بقى للاندومي فما تقوليش انك بتدشدشه وتكله سناكس لااااااااااااا
دي صعبة جدا طعمة مش حلو الا وهو مطبوخ عموما براحتك اتلاقيه بيعجبك هههههههههههههههه


ايه تاني ايه تاني


اه اه بالنسبة للحجات البتكرهها وبتحبها حقيقي ظريفة جدا كلامك عنها يعني عندك دقة جامده جدا انك تقول بتحب ايه وتكره ايه


ايه تاني يافنونة
اه بما انك كنت في السعودية قولي بقى ايه احسن مصر ولا السعودية
يعني هتاقلم لو جيت مصر بسرعة ولا العيشة صعبة زي مابيقولو

بس خلاص كده

يلا تقبل تحياتي وتقديري

موناليزا يقول...

بداية اشكرك على تمرير التاج واعتذر عن الاجابة
رايى بقى فى التاج
اجابات مميزة
بس يعنى ايه ماسوشية؟
ومين علاء صاق ده؟

blue-wave يقول...

زملكاوى يا حس؟؟؟
يا خسارة:))
بس سيبك
اجاباتك زى العسل
والتاع الكرنب دا كلته ازاى؟؟؟؟:))
تحياتى

سوبيا يقول...

اجاباتك لذيذة

واديتني عنك فكرة حلوة
أكيد هاتشوفني هنا كتييييييييييير

Unknown يقول...

يا راجل حلال عليك
بتحطنى ليه فى التاج
ده انا غلبان تدوينياَ خالص
شكراً يا باشا
على تاجك
و منحرمش من مدوناتك و ذوقك و اخلاقك
تعرف انا توصيفى لمدونتك انها تتسم بالهدوء الشديد
رغم طرافة مواضيعها
يمكن ديساين المدونة هو مدينى الإحساس ده
تحياتى

حسام غانم يقول...

صوت من مصر
============

ميرسي يا كيمو

احم .. انت طبعا قصدك إن التاج عرفكوا عليا بشكل كبير


وللأسف زمالكاوي اه

نورتني يا كيمو

حسام غانم يقول...

د/عرفه
=========

ههههههههه

يعني على ضمانتك لما أخش الشفوي

أكلم الدكتور عالأكل الصيني ؟

مش عارف ليه حاسس إنه مش هيتبسط بيا ساعتها !!

نورت البوست يا دوك

حسام غانم يقول...

أحمد سعيد بسيوني
=================

ميرسي يا أحمد أنا أسعد جدا


بالنسبة لإني هادي

فأنا فعلا في أول علاقتي ببقى يعني هادي ومتحفظ

بس لما نتقابل أكتر

هتلاقي شخصية قمة في الجنان والعبط :)


شكرا لمرورك يا أحمد

نورت المدونة

حسام غانم يقول...

Rania
=======

ميرسي يا رانيا كتير

تحياتي ليكي

نورتي البلوج

حسام غانم يقول...

mohamed ghalia
===============

والله يا محمد كلهم عزاز عليا جدا

ومش قادر أطلع حد فيهم من القايمة

وبعدين أنا قلت إني ورثت عن بابا الكرم :)


منورني دايما يا محمد

حسام غانم يقول...

ايوشة
=======

ميرسي يا أيوشة ربنا يخليكي

بيسعدني دايما مرورك

حسام غانم يقول...

S H A H
========

احم .. هو مش أول تعليق أوي

بس كأنك أول تعليق برضه

ليك نفس الجايزة


كنا بناكل في المطعم الصيني اللي في سيتي ستارز



نورت المدونة

حسام غانم يقول...

Saydalanya Mat7oona
=====================

شكرا جدا يا صيدلانية

وربنا معاكي في الإجابة :)


منوراني دايما

حسام غانم يقول...

عاشقة الأحزان
==============

شكرا يا إيناس

وكمان إجاباتك فيها صدق واضح وجميل


تحياتي ليكي
وإن شاء الله يدوم التواصل

حسام غانم يقول...

المعتصم
========

ههههههههههه

مااااااااشي يا معتصم

يعني مش كفاية مش هتجاوب عالتاج

كمان بتتريق عالزمالك

هنلاقيها منك ولا من اللعيبة نفسهم :)


نورتني يا معتصم

حسام غانم يقول...

norahaty
===========

وعليكم السلام ورحمة الله وبركاته


لأ سنتين كتير على فكرة :)

متمخمخيش .. على طول كده اللي في دماغك اكتبيه


وميرسي ليكي عالكلام الحلو ده

نورت المدونة يا دكتورة

حسام غانم يقول...

wesoooooooooo
===============

ميرسي يا وسام ربنا يخليكي

وربنا معاكي في الإجابات :)


نورتي المدونة

حسام غانم يقول...

fnoonh
=======

ازيك يا فنونة

الأول شكرا عالتاج

الأكل الصيني ده كان في المطعم الصيني اللي في سيتي ستارز

في مصر يعني


بالنسبة للاندومي
فلا حرام عليكي
جربي بس فشفشي الكيس في طبق
وحطي عليه النكهة وقلبيه

وبالمعلقة بقى
جااااااااامد

متقوليلها يا موني

بالنسبة للسعودية
فانتي أكيد هتتأقلمي
بس السعودية أحسن كتير
مستوى المعيشة والخدمات والدين


شكرا لمرورك يا فنونة
نورتي المدونة

حسام غانم يقول...

موناليزا
=========

كده تهربي من التاج ؟
ماااااشي

الماسوشية هي حب تعذيب الذات

علاء صادق ده محلل كروي سخيف


نورتي يا موناليزا

حسام غانم يقول...

blue-wave
===========

للأسف يا عمور

قدري بقى إني أبقى زمالكاوي أعمل ايه

ربنا معايا


متفكرنيش بالبتاع الكرنب ده

أوحش حاجة كلتها في حياتك

بينتشر ويتوغل


ميرسي ليك يا عمرو

نورت المدونة

حسام غانم يقول...

سوبيا
=====

ميرسي يا سوبيا

وإن شاء الله يدوم التواصل

نورتي البلوج

حسام غانم يقول...

بدراوى
========

ميرسي يا بدراوي

وفي انتظار إجاباتك :)


والله هو ديزاين المدونة ده رغم إنه شبه الإسهال

إلا إنه أكتر واحد عجبني في الحاجات الستاندارد بتاعة بلوجر

ناوي إن شاء الله أشوف حاجة تانية أحلى

شكرا يا بدراوي

نورت البلوج

بسمـــة مســـــلّم يقول...

السلام عليكم شكرا اوى حسام على تعليقك الجميل وحلو اوى موضوع التاج ده بس بجد شخصيتك حلوة تسلم

Beram ElMasry يقول...

الاخ العزيز . د. حسام غانم
السلام عليكم ورحمة الله وبركاته
شكرا جزيلا ، لو لبستنى العمة عندى اكرم لى من تاج الجزيرة السلطانية
لك تحياتى ، ولا سلام مع اليهود

فاتيما يقول...

ازيك يا استاذ حسام
أهو التاج معمول عشان المناسبات اللطيفة اللى زى دى
لما تحب تتعرف على حد من قرب
و تسمعه بيتكلم كانك قاعد معاه و بتكلمه
اجاباتك بتقول إنك شخصية مميزة و دمك خفيف
و مش غاوى تعقد الدنيا
و تكلكع حياتك ..و منفتح على كل الدنيا دا كفاية إنك دخلت تاكل فى مطعم صينى يا شيخ
هيا دى شوية ؟؟!!!
و شايف الحياة بمنظار فاتح مش غامق ...
أنا سعيدة بالمعرفة دى
و أتمنى تكون دايما فى الخير
خالص ودى و احترماتى

Soul.o0o.Whisper يقول...

امممممممممممممممممم

إجاباتك حلوة
و خفيفة

مش زى الدش اللى انا عملاه
هههههههههههههههههه


أتمنالك التوفيق
و ربنا يسهل
:)




دمت بود

Ebraheem Aadam يقول...

ما شاء الله ,
أربعة بحالهم باعتين التاج ؟؟
ده التاج جاي لي " من الوسع " :)

بس إيه صربيا دي يا عم حسام ,
خاف على نفسك يابني , دول كانوا بيصطادوا المسلمين في البوسنة و الهرسك ,
لو حد فيكم تاه و لا حاجة هتبقى نهايته :(

و بعدين بقى ماله النيورو يا عم حسام ؟؟
أنا ما اسمح لكش :) ,
آه , أصلي بموت في حاجة اسمها سيكاتري , و بما إنه ابن عم النيورو , يبقى أنا و ابن عمي على حسام اللي بيكره النيورو ده :)


عموما ربنا معاك يا حسام ,
تروح و ترجع بالسلامة ... صربيا يعني :) :) :)

Unknown يقول...

فعلا انا مع الباشمهندس ابراهيم
خلى بالك من صربيا دى ملهومش امان
ومهما ظهروا من الود والاحترام اللى فى القلب فى القلب ماتنساش مسيلوفتش بتاعهم عمل ايه فى البوسنة
والهرسك وعمله عن اعتناق
وفكرة محفورة فى عقلهم
وقلبهم كمان.
خلى بالك من نفسك وربنا يحفظك.

نبض الحياة يقول...

بجد هدية جميلة
جزاك الله كل خير
وبجد مش عارفة اقول ايه انك افتكرتنى
بجد هدية اعتز بها
ومعلش لأن النت سىء جدا عندى ودة اللى مخلينى متاخرة عن كل الصحبة الجميلة دى ومتأخرة فى الرد والتعليقات
دمت اخى الفاضل بخير .

فتــافيت (رحاب الخضري) يقول...

ايه ده اسم حسام غانم؟.؟؟ مش ممكن انا جاتلي صدمة عاااااااااااااا

ومبحبش السمك .. الملوخية .. محشي الكرنب .. وطبعا الفسيخ والكوارع والحاجات دي

تخيل بقى الحاجات الياي ديه كلها بموت فيها .. عااااااااااااااااا

الاكل اللي انت مصوره ده من سحر اسيا صح؟؟

البتاع اللي بتقول عليه جلاش ده اسبرينج لروز .. بموت فيه وبعمله احسن منهم

واقولك حاجة انا فرحاااااااااااانة ان اسمي مكتوب

وافتكرتني كمان اول حد

ربنا يخليك واشوفك كده شاطر وماسك فسيخاية بتاكلها علشان تكبر وتبقى داكتور كابير

ههههههههههههههههههههههه

سلاااااااموز وفكر في الفسيخ

حسام غانم يقول...

بسمـــة مســـــلّم
================

ميرسي يا بسمة ربنا يخليكي

شكرا لمرورك الجميل

نورت المدونة

حسام غانم يقول...

Beram ElMasry
==============

وعليكم السلام ورحمة الله وبركاته

ليه كده بس يا أستاذ بيرم

التاج ده فرصة نتعرف أكتر على حضرتك


شكرا لتعليقك

نورت البلوج

حسام غانم يقول...

فاتيما
=========

ياااااه

ميرسي جدا عالكلام الحلو ده يا فاتيما


أنا أسعد بالمعرفة دي

وإن شاء الله يدوم التواصل


نورت المدونة بزيارتك

حسام غانم يقول...

Soul.o0o.Whisper
==================

ههههههههه
ميرسي يا سوول

ربنا يسهل يا ستي دعواتك


شكرا على مرورك

وربنا يوفقك دايما

حسام غانم يقول...

iBRAHiM sAllAM
================

لا يا ابراهيم هو النيورو ابن عم السايكاتري اه

إنما شتان بينهم

السايكياتري ده قمة في المتعة

والنيورو ده قمة في الخنقة

خلايا غريبة وتراكتات عجيبة

وموجود في برانشات كتير




بالنسبة لصربيا بقى

فيعني الموضوع مش للدرجادي

صربيا فيها جالية مسلمة كبيرة

ومساجد كتير


وربنا يستر بقى


شكرا يا ابراهيم عالمرور

منورني دايما

حسام غانم يقول...

norahaty
==========

الله انتوا هتخوفوني ليه

ربنا يستر

ادعولنا بقى


نورتي يا دكتورة

اه واوعي تكوني كنتي بتحبي النيورو :)

Unknown يقول...

(واوعي تكوني كنتي بتحبي النيورو :))
دى برضه تهمة تتهمنى بها؟
ماكنش العشم ياحسام:(
يابنى سبحان من أنجنا
من الكلية دى بسلام:)

حسام غانم يقول...

نبض الحياة
============

ميرسي كتير يا نبض الحياه

وربنا يصلح حال النت عندك :)


نورت المدونة بمرورك

حسام غانم يقول...

فتافيت
========

همممم
هو لو سحر آسيا ده اسم المطعم يعني

فالإجابة لأ
ده كان من مطعم صيني في سيتي ستارز
واسمه مكتوب بالصيني
وأنا للأسف لغتي الصينية ضعيفة إلى حد ما :)


وبعدين تعالي هنا

بغض النظر عن الفسيخ والكوارع والكلام ده

إنما بتعملي صوبع الجلاش ده

كرنب مسلوق سخن ؟

حرام عليكي


منورة دايما يا فتافيت

حسام غانم يقول...

norahaty
==========

هو ده الكلام المظبوط :)

احساس طفلة محبة للرومانسية بس واقعية يقول...

طيب لما تيجى تجرب اكل تانى جرب اطالى يابانى حتى هندى بس صينى دا صعب اوى عندهم مكسات غريب

مبحبش الخيال العالي والرومانسية الحالمة دي اللي هو تقول له السماء بتمثلك ايه يقولك الصفاء والنقاء والبحر بيحسسني بالغدر والتقلب والوردة بتحسسني بالبراءة والطهارة والكلام الحمصي ده


لية لية لية لية كدا يا حسام ؟

اجابتك كلها متزنة
وتدل على شخصية عقلانية
وعملية


تقبل مرورى

ميرام يقول...

حسام
انا جيت متأخر عارفه
): مشاريع الكلية
المهم
اجاباتك حلوة
وحاسة ان فيه تشابه كبير
(:

على فكرة انا قريت البوست
ورحت جبت اندومايه وعملتها بطريقتك
وكلتها
ايه ده
دي طلعت حلوة !
اه والله

بـــس ..
(:
انا عندي مشروع هيتسلم بكره ياترى هعيش لحد ماا أسلمه !؟؟ (:

ماتخيلتش خاااالص انها ممكن تتاكل كده
بس برده وهي معموله احلى ..

ضحكت كتير على الشاعره الصغيره دي
وبجد سعيده ان مدونتي عاجباك
(: شهادة أعتز بها
غالبا همشي من عندك واجاوب على التاج
مستنيه جديدك

تحيــــــاتي

غير معرف يقول...

هههههههههههههههه
هههههههههههههههههههههه

يعني اكلت الاكل الصيني كله وتمام جيت عالكرنب المسخن وقلت يع دا كل الصحن يع ويع ويع بتاكل حاجة زي دي ازاي ههههههههههه

اجاباتك تووووحفة ودمها خفيف مووت

بالتوفيق يارب

بنت مصر يقول...

اول زيارة ليا ولاقيتك لابس التاج

اجاباتك خفيفه وصريحة

اتمنى ليك النجاح دايما في حياتك أن شاء الله

تقبل مروري

حازم النبراوي يقول...

افكارى هى انا
عجبتنى قوووووي العبارة دى
اجاباتك فوق الرائعة ومميزة
شكرا على انك اعتبرت مدونتى من ضمن احسن المدونات
والى الامام دائما

Unknown يقول...

دة حلو اوى الكلام دة يا دكتور حسام...بجد والله اجاباتك لطيفة بجد يعنى

على فكرة بكره ممدوح فرج اوى اوى وكل الحاجات اللى انت بتكرهها كمان

وبحب دكتور احمد خالد توفيق بشدة

التاج لطيف فعلا الله ينور

Beram ElMasry يقول...

الاخ العزيز . د. حسام غانم
السلام عليكم ورحمة الله وبركاته
بارك الله فيك مفيش ضيق ولا حاجة
لك تحياتى والسلام ، ولا سلام مع اليهود

حسام غانم يقول...

احساس طفلة محبة للرومانسية بس واقعية
===========================

هو مكس غريب فعلا الصراحة

فراخ عليها سكر وشطة :)

إنما طعمها حلو

المشكلة بس في الشكل

وفي الكرنب :(


ميرسي يا احساس طفلة

نورتي البلوج

حسام غانم يقول...

ميرام
======

ربنا معاكي يا ستي في مشاريع الكلية

وبجد مدونتك عاجباني مش مجاملة

نوع الشعر اللي بيعجبني بالظبط


شكرا لمرورك

منوراني دايما

حسام غانم يقول...

ঔღঔ نـــوارة ঔღঔ
==================

أهلا بيكي يا نوارة في أول زيارة

الصحن حلو فعلا بغض النظر عن شكله

الكرنب وحش جدا وقال ايه هو ده المقبلات !!


نورتي البلوج يا نوارة :)

وإن شاء الله يدوم التواصل

حسام غانم يقول...

بنت مصر
========

أهلا بيكي في أول زيارة

شفتي وشك حلو عليا إزاي

التاج مرة واحدة


ميرسي على زيارتك

وإن شاء الله يدوم التواصل

حسام غانم يقول...

حازم النبراوي
=============

ميرسي يا حازم على كلامك

منورني دايما

حسام غانم يقول...

enjy
======

ميرسي جدا يا إنجي


ربنا يخليكي

شكرا لمرورك الجميل
وإن شاء الله يدوم التواصل

حسام غانم يقول...

Beram ElMasry
==============

وعليكم السلام ورحمة الله وبركاته

شكرا يا أستاذ بيرم

وإن شاء الله يدوم التواصل

تحياتي لحضرتك

محمد عبد الباسط يقول...

الاخ الكريم حسام غانم

لعله اول تعليق لى لكن لن يكون الاخير ان شاء الله

بجد تشرفت وذادت مدونتى ثقلا بذكرك اياها

اجابتك بسيطة ومن القلب بارك الله فيكم
ولا تنسانا من دعائك

حلم كبير

أبو العريف يقول...

دكتور حسام
ايه الدماغ دي يامان
وجايبلنا اكل كمان

وبعدين هو حد سألك عن اللي مش بتاكله ايه يا عم ده


اسلوبك لذيذ
دكتور يا عم الحج

كنت عايزك في استشارة طبيه كده
مصلحه يعني

ولا اقولك مش دلوقت
هجيلك تاني

شمس النهار يقول...

اجاباتك لطيفه جدا
ان شاء الله تكون دكتور ناجح
انا برضه كنت بتوه بين اسم المدون واسم مدونته الاول بس دلوقتي اتعودت وبقيت اعرفهم
اما الاكل الصيني حدث والا حرج بكره جدا جداومافيش بينا عمار خالص

Beram ElMasry يقول...

الاخ العزيز . د. حسام غانم
السلام عليكم ورحمة الله وبركاته
شكرا جزيلا اخى وبارك الله فيك وارجو ان تجعلنى من الاصدقاء
لك تحياتى ، ولا سلام مع اليهود

حسام غانم يقول...

محمد عبد الباسط
===============

شكرا جدا يا محمد

وإن شاء الله يدوم التواصل

نورت المدونة :)

حسام غانم يقول...

أبو العريف
===========

ميرسي جدا ربنا يخليك

وتحت أمرك طبعا في أي استشارة

رغم إن مش هفيدك أوي طبعا :)


نورت المدونة وفي انتظار الاستشارة

حسام غانم يقول...

شمس النهار
===========

ميرسي جدا يا شمس

وأقدر اقول لك بكل ثقة

نورتي المدونة :)

حسام غانم يقول...

Beram ElMasry
===============

وعليكم السلام ورحمة الله وبركاته

شكرا لحضرتك

حضرتك من الأصدقاء أكيد


نورت البلوج

MaNoOoSh يقول...

اكتر حاجة عجبتنى اللب وانت بتقرا
بس دة اللب محتاج تركيز لوحدة.. هو الواحد هيركز مع القزقزة وللا مع الكتاب
هههههههههههههه
تحياتى يا باشا

حسام غانم يقول...

MaNoOoSh
==========

لا عادي الواحد بيركز في أول لبتين تلاتة

وبعدين يستمر الموضوع بصورة آلية بقى

ونبدأ نقرا

مرور جميل يا منوش

نورتي البلوج

محمود ابوالعزم يقول...

شرف لي ان اسمي يتقال في المدونات اللي بتعجبك يا حسام
ومن ساعة ماشفت الموضع بحالو افضي وقت لما ادخل نت عشان ارد عليه
ربنا ييسر يارب وممكن ارد عليه التلات الجاي
قريت اجاباتك كلها كانت كلها جميلة وخفيفة وصادقة
بالتوفيق دايما

Tamer Nabil Moussa يقول...

السلام عليكم

اجابات معقولة

لانها صادقة

احنا نتفق فى حاجة

انى مولود بالسعودية

وسبتها وانا صغير

تحياتى

حياتى نغم يقول...

السلام عليكم / اجابات جميله واتعرفنا عليك اكتر ، وعجبنى تشريحك لصباع الجلاش :) دكتور بجد :) وشكراً لإضافة مدونتى بالبوست وبمدونتك . وفقك الله فى كل شئونك .

Mohamed Nagah يقول...

مدونه رائعه

بالتوفيق دائما

_ دعوه خاصه الى زيارة منتدى البيت العربى للتصميم

منتدى اكثر من رائع
http://mohamed-nagah.com/vb/

Mohamed Nagah يقول...

مدونه رائعه

بالتوفيق دائما

_ دعوه خاصه الى زيارة منتدى البيت العربى للتصميم

منتدى اكثر من رائع
http://mohamed-nagah.com/vb/

Mohamed Nagah يقول...

مدونه رائعه

بالتوفيق دائما

_ دعوه خاصه الى زيارة منتدى البيت العربى للتصميم

منتدى اكثر من رائع
http://mohamed-nagah.com/vb/

حاجات جوايا يقول...

مممممممم
واضح يا حسام انك شخصية عملية جدا
دكتور بقى وكده
ربنا يعينك


انا كمان بكره الفسيخ
بقرف منه يعنى
بس كل كام سنة كده نفسى تروحله واستخسر اسيبه يتاكل قدامى كده من غير ما اشارك :)
مهى النفس امارة بالسوء


بس سؤال على جنب كده
الوجبة دى كانت عبارة عن ايه ؟ بغض النظر عن الكرنب اللى مش شبهه خالص ده ...
اوعى تكون ضفادع .. يعععع مهو اكل صينى وتوقع منهم اى حاجة


خالص ودى
سالى

مذكرات مشاغب يقول...

يا واد يا 7os يا جامد
انا زيك برده بكره حاجات من اللي انت بتكرهها
وانا بحب التنس زيك
بموووووووت فيه
ولو لاعبتك هغلبك
شوفت الغرور

تحياتي

lecaa يقول...

السلام عليكم...،
اجاباتك صريحة،شخصية محترمة...دبلوماسيةإلى حد كبير.
أنا كمان شايفة ان موضوع "وجهة النظر الاخرى" أجمل وأقوى مواضيعك بيعرض فكرة مهمة واستفدت من الردود الي كانت علية،بصراحة هو الي جذبني لمتابعة المدونة.
ف انتظار مواضيع اجمل واقوى....

زى الهوا يقول...

التاج دا جالى , بس مش عارفة حاسة إن اجاباتك احسن من اجاباتى

حسام غانم يقول...

محمود ابوالعزم
=================

ميرسي يا محمود

وفي انتظار اجاباتك بقى

وحي القلم يقول...

روعة والله اجابتك
وربنا يكون ف عونك
زملكاوي يعني كل يوم بيتحرق دمك
ودكتور يعني كل يوم بيطلع عينك ف الدكتارة
تقبل تحياتي

حسام غانم يقول...

Tamer Nabil
=============

شكرا يا تامر

السعودية بلد جميلة جدا فعلا


مرور جميل
نورت البوست

حسام غانم يقول...

حياتى نغم
============

ميرسي كتير

وطبعا صباع الجلاش ده ميتفوتش لازم يتشرح بالظبط :)

وأكيد انت من الأصدقاء اللي اتشرفت بيهم

نورت البوست

حسام غانم يقول...

Mohamed Nagah
===============

ميرسي يا محمد

وإن شاء الله هزور المنتدى

نورت البوست

حسام غانم يقول...

حاجات جوايا
============

هو بغض النظر يا سالي عن موضوع الفسيخ ده

الوجبة كانت عبارة عن رز وصنفين تانيين

واحد فراخ وواحد لحمة

والاتنين عليهم سكر وشطة :)

بس حلوين يعني


مرور جميل يا سالي
نورت المدونة

حسام غانم يقول...

مذكرات مشاغب
===============

ميرسي يا صقر

بالنسبة لموضوع التنس ده

فأنا أحب أقولك بكل تواضع

إن انت هتتقطع :)


منورني دايما

حسام غانم يقول...

lecaa
=======

شكرا جدا يا لقاء

وسعيد بمتابعتك

حسام غانم يقول...

زى الهوا
============

لا إزاي يا سماح إجاباتك جميلة جدا

وبعديم مفيش هنا حد أحسن من حد

مقياس جمال الإجابة إنها تكون صادقة وبتعبر عنك فعلا


نورت المدونة في أول زيارة
وإن شاء الله يدوم التواصل

حسام غانم يقول...

مصعب صلاح
==========

ميرسي يا مصعب

شفت يعني هلاقيها من هنا ولا من هنا :(

مرور جميل
نورت المدونة

غير معرف يقول...

يا ابن الايه يا حسام يا لذينا انت

تصدق بجد اجباتا خفيفة خفيفة لطيفة جامدة رهيبة ما حصلتش

عشرة على عشرة يا حس
:)

مها ميهوووو

kalamfady يقول...

اجاباتك دبلوماسيه ودمها خفيف ..ربنا يوفقك

Beram ElMasry يقول...

الاخ العزيز حسام غانم
السلام عليكم ورحمة الله وبركاته
شكراً لك صديقى العزيز وأنا سعيد بهذه الصداقة وفبها دواعي سروري
لك تحياتىوالسلام ، ولا سلام مع اليهود

Unknown يقول...

السلام عليكم ورحمة
الله تعالى وبركاته
دكتور حساااااام
يازميلى فى النقابة عن قريب
احب اقولك انى جاااااااااوبت
التاج الهدية بتاعك ويسعدنى
انك تيجى تشوف الردود وتقول
رايك وكمان تاكل من الحاجة
الحلوة قبل ما تخلص ..منتظرينك

Unknown يقول...
أزال المؤلف هذا التعليق.
رؤية يقول...

بصراحة..
دمك خفيف
سعيدة بمرورى على مدونتك

تحياتى

حسام غانم يقول...

أحسن تـستاهـل
===============

ههههههههههههه
ميرسي يا مها ربنا يخليكي

مرور جميل
نورتي البلوج :)

حسام غانم يقول...

kalamfady
============

ميرسي يا شرقاوي

ورغم إن أنا مبحبش يعني الإجابات الدبلوماسية

إنما جت كده بقى

نورت البلوج

حسام غانم يقول...

Beram ElMasry
==============

شكرا لحضرتك أستاذ بيرم

أنا أسعد

وسعيد بمرورك

منورني دايما

حسام غانم يقول...

norahaty
=========

الحمد لله جيت بدري ولحقت نصيبي :)

إجاباتك جميلة يا دكتورة

وشكرا على قبول التاج


نورتي البلوج

حسام غانم يقول...

رؤية
======

ميرسي كتير يا رؤية

سعيد بزيارتك

وإن شاء الله يدوم التواصل

نورتي البلوج

فكرة من الزمن ده يقول...

معلش اتاخرت بس جزائي اخدت الدور الاخير
ماعلينا يمكن الفرن يخلص وامشي من غير ما اخد عيش


حلوة جدا الاجابات ومختلفة
وشكرا مؤخرا على التاج وجاوبته طبعا
طيب محدش بيقولك ياحوسس
انت بتاكل الوجبة اللي مصوره لينا دي؟
الله يكون في عونك
بس بغض النظر عن الشكل بجد الاكل الصيني تحفة

لكن الفسيخ انا احبه جدا جدا
والسطر اللي انت بتكرهه ده انا بحبه والعكس بالعكس السطر اللي عاجبك ده كل الاكل اللي فيه مش بيحبني
معاك حق لما بتكون المدونة نفس الاسم بتاع صاحبها اللي معروف بيه
ونفس العنوان بيكون احسن لصاحبها علشان الناس تعرف بسرعة من لخبطة
تحياتي يانرجسي

d:D:D:D:D:D:D

حسام غانم يقول...

فكرة من الزمن ده
=================

هههههههه
لا أكيد ليكي عيش يا فكرة متخافيش

اه صحيح وفيه قلة بتقول لي يا حوس :)

وشفتي بقى أيوة باكل الوجبة دي :(


اوووووووه
بتحبي الفسيخ
يبدو إن حاسة الشم عندك ضعيفة :)


تحياتي ليكي
نورتي البلوج

Enas Amen يقول...

وااااااااو

حلوة أوي المحشي المسلوق ده :)

لا بجد المدونة تحفة

أنا كنت قرأت من مدة بتاع الميكروباص
والضحية اللي بتدفع 10 ج ويجيلها فكة مقطعة وشكلها طالع من بق كلب ديه

فتاني يوم بركب ملقتش معايا فكة غير 10

افتكرت البلوج بتاعتك

:)

ده أول بوست ليا هنا . . ومتابعة معاك بإذن الله

Khaled Selim يقول...

يا رايق
صربيا مرة واحدة ؟
طيب ليه مش البوسنة ؟؟؟

بس بوست جامد
وأسلوبك طريف أوي في الإجابات ..

أنا إستمتعت :)