الخميس، 21 مايو 2009

متعة التسوق


أعزائي المشاهدين ..

النهاردة جايبينلكوا مفاجأة ..

أيوة مفاجأة ..

جايبينلكوا الحل السحري لكل مشاكل ست البيت المصرية ..

معانا النهاردة .. الحللللللللة الذكية .. تن تن تررررررررررا تن تن ..

الحلة الذكية يا جماعة مش زي أي حلة عادية .. ولا إيه رأيك يا عبد الرحمن ؟

أولا هي دي حلة ؟ .. ده أنا كنت قاعد مش عارف إيه التحفة الفنية دي .. تصميم مبهر فعلا

- بالظبط كده يا عبد الرحمن .. أول ميزة في حلتنا النهاردة هي التصميم بتاعها .. يعني ممكن لو مش بتستخدمها تقدر تزين بيها أي ركن في البيت

- لأ ومش بس كده .. ده الشكل الدائري بتاع الحلة دي مثالي جدا بحيث متاخدش مساحة في التخزين

- اه والله فعلا يا عبد الرحمن .. الشكل الدائري هو أحسن تصميم للحلل .. ده أنا عندي حلة متصممة بالشكل الهرمي مغلباني جدا

- فعلا يا سامح .. وكمان بص معايا عالحلة من تحت كده .. هتلاقي إن قاع الحلة متخطط دواير كده شايفها ؟

- اه ده حقيقي فعلا

الدواير دي يا سيدي عشان التوزيع الجيد للحرارة على كل مكونات الحلة .. يعني ميبقاش فيه حتة الأكل فيها استوى وحتة لأ

معقول الكلام ده !! .. دي حاجة ولا في الأحلام

ما هو ده شعارنا في الشركة .. كل اللي بتحلم بيه بنحققهولك

طيب أنا ملاحظ على جوانب الحلة فيه حتتين بارزين كده يا عبد الرحمن .. إيه دول ؟

- الحلة الذكية يا سامح مزودة بعدد اتنين مقبض عشان تعرف تمسك الحلة وتشيلها .. والمقابض دي مصنوعة من البلاستيك العازل للحرارة

ياااه .. أنا مش مصدق عينيا .. ده كل حاجة فكروا فيها

- ومش بس كده يا سامح .. الحلة الذكية سعتها كبيرة جدا زي مانت شايف .. وممكن تطبخ فيها الخضار والمحاشي بأنواعها وممكن تاخد فرختين وكمان الرز والمكرونة

- وممكن أعمل فيها شوربة ؟

- أكيد يا سامح .. الحلة الذكية مفيش حاجة مبتعملهاش .. وكمان أعزائي المشاهدين عرضنا لسه مخلصش .. الحلة الذكية بيجي معاها غطا للحلة من نفس اللون والمقاس عشان تقدر تغطي الحلة

- بجد يا عبد الرحمن .. الغطا من نفس مقاس الحلة .. ده انت كده حليت مشكلة كبيرة جدا .. لأن معظم ستات البيوت بيعانوا من مشكلة إن الغطيان يا كبيرة جدا عالحلة يا صغيرة جدا .. بجد بجد أنا مذهول

- لأ وخد كمان المفاجأة دي يا سامح .. قلبك جامد ؟ .. مستعد ؟ .. عرضنا كمان لو اتصلت مش بس الحلة الذكية .. لأ .. ده هتاخد معاها مجانا .. أيوة مجانا .. الفوووووطة السحرية

لأ يا عبد الرحمن .. أنا هعيط من كتر الفرحة .. يعني كمان الفوطة السحرية مع الحلة الذكية ؟

أيوة يا سامح تمالك أعصابك .. الفوطة السحرية أهي يا سامح .. قول لي إيه أول حاجة شدتك فيها

- لونها رائع جدا

بالظبط كده .. الفوطة السحرية تتميز بألوانها الجذابة جدا .. وفيه منها تلات ألوان .. الأحمر والبني والبنفسجي

يااااه يا عبد الرحمن .. كلهم أحلى من بعض .. ينفع آخد التلاتة ؟

- ههههههه .. طبعا اتفضل يا سامح .. الألوان دي مريحة للعين جدا كأنك بتتفرج على منظر طبيعي .. وكمان تحبب الأطفال في المطبخ ويساعدوا مامتهم في شغل المطبخ وهم سعداء

اه ده أكيد يا عبد الرحمن .. مع الفوطة دي الأطفال مش هيطلعوا من المطبخ خالص

- وفوق كده .. الفوطة دي مصنوعة من القطن .. وكمان تقدر تمسح بيها أي مية تتكب عالأرض أو عالترايزة .. ومش بس المية لأ ممكن عصير أو شوربة أو أي سائل

لأ يا عبد الرحمن .. كده مش معقول بجد .. شوية شوية تقول لي إني ممكن أشيل بيها حاجة سخنة

فعلا يا سامح .. فوطتنا السحرية تقدر تشيل بيها حاجة سخنة

- أنا حقيقي مذهول .. دي حاجات لا تقدر بثمن

- ودي مفاجئتنا التالتة النهارده يا سامح .. السعر .. عرضنا النهاردة الحلة الذكية بتصميمها الدائري الرائع .. وواسعة جدا من جوه ممكن تحط فيها أي حاجة .. ودواير توزيع الحرارة .. ومقبضين من البلاستيك تشيلها بيهم .. وغطا رائع على مقاسها بالظبط .. وممكن تدخّلها التلاجة وكمان ممكن تحطها عالنار .. ومش كده وبس .. لأ معاها كمان الفوطة السحرية .. بألوانها الجذابة .. ومصنوعة من القطن .. وممكن أمسح بيها أي حاجة .. وكمان ممكن أشيل بيها حاجة سخنة .. كوووووووول ده فقط بـ 999 جنيه + مصاريف الشحن

- والله يا بلاش .. أنا هاروح جري أتصل قبل ما الكمية تخلص

- شاطر يا سامح

هناك 119 تعليقًا:

ستيتة يقول...

تررن تررن
من فضلك يا عبد الرحمن واحدة من المواصفات "الغير" عادية دي

مش الحلة اللي عجباني
لأ الدقن اللي انت حاططها وانت بتوصف الإيختراع الرهيب في التلفزيون
انت طبعا حاططها علشان انا احس بالمصداقية
خلاص يا عم متحلفش بالطلاق انا مصدقاك


بس حاجة غريبة سونة صاحبتي موت موت اشترت واحدة وايديها طارت تاني يوم
إيه .. بتقول ايه؟ أه نصيب سونة

طيب موني اشترت واحدة واتخرمت بعد شهر
إيه .. بتقول ايه؟ أه نصيب

مش ها اشتري يا عبد الرحمن
اي نعم مأنتخة ومش قادرة انزل اعاين بضايع في سوق ليبيا بس عندا فيك مش شارية

ستيتة يقول...

اول تعليق

طيب تررن تررن
ها اشتري يا سامح اكراما لخاطر اول تعليق


تحياتي يا دكتور

شقاوة مراهقة يقول...

ههههههههههههههههههههههههههههههههههههه

البوست تحفه اوووووووووي ..

تسلم ايدك بجد ..

والاعلاااااانات دي خنيقه بجد يعني ..

وال ايه كل دي مميزات ..

ماهو الطبيعي الحله تبقى بغطا وبايدين وبتتحط ع النار وبيتعمل فيها اكل ..

امل هنلبسها ع راسنا يعني ..

ولو اعلان ع مكنسه فرضا ..

يقولك دي من اهم مميزاتها اللي مش موجوده ف غيرها انها بتشفط وتقدري تكنسي بيها اي حته ف البيت ..

اماااااااال هيا ايه يا بشر يعني ..

موضوع جميل جدااااااااا..

وشكلي اول تعليق هههههههه..
اول زيارة وان شاء الله مش الاخيرة ..

تحياتي

شقاوة مراهقة يقول...

عااااااااااااااااااااااااااا


سبقتيني يا ستوووته ..

كنت فاكرة انه انا اول تعليق ..

يلا خيرها ف غيرهاااااا

د/عرفه يقول...

هههههههههههههههه
ههههههههههههه
ههههههههه
موتى من الضحك



والله يا حسام
الموضوع ده بيقع مررتى زيك كده بالظبط


بس بجد
بوست ملهوش
حل

mimi يقول...

يا سامح يا عبد الرحمن...

أنا الحلل بتاعتي ممكن يتعمل فيهم
مكرونة بالبشاميل ... وسمك كمان

أنتو حللكوا كدة؟؟؟

سؤال تعجيزي

مذكرات مشاغب يقول...

هههههههههههههههههههههههههههههههههههههههههههههههههههههههههههه
ههههههههههههههههههههههههههههههههههههههههههههههه
ههههههههههههههههههههههههههههههههه
يخربيت عقلك يا سامح
قصدي يا حسام
يا ابني انت دماغك ديه ملهاش حل
والله العظيم انا مش بجاملك خالص

انا كنت بكررررررررررررررررررررره وبتخنننننننننننننننق جدا من الاعلانات الساذجه اوي دي
وكنت لما اشوفها كنت اقلب القناه بغلللللللللللل
لكنك عملته موضوع جااااااااااااااااااااااااااامد جدااااااااااااااااااااااا
كالعاده مواضيعك ملهاش حل (مدونتك مدونه مختلفه)

تحياتي

رحلتنا في الحياة يقول...

هههههههههههه انا كمان عايزة الحلة الذكية دى لا بجد والله انا بكره الاعلانات الغبية دى بشكل غبى جدااااااا ربنا يرحمنا ياااااااارب
احيك على البوست التحفة ده :)

ايومي يقول...

(((:
عرفت تخنقني بالظبط وكأني شايفه الإعلان,
بحييك إنك عرفت تخرج إعلان بالقدر ده من الخنقه (:
وبحييك على فكرة البوست الرائعة بحق,
بيعجبني جدا اسلوبكم الساخر

أحمد سعيد بسيوني يقول...

الحقني بالنمرة بسرعة

Sweet Violet يقول...

يالله ده انا ضغطى بيعلى من الاعلانات دى

كنت لسه شايفة امبارح على الرحمة نفس الحوار ده على البطانية و عرض التصفية

بحس و الله انهم بيكلموا اطفال فى بطن مامتهم مش اطفال لسه مولدين كمان

لدرجة انى و الله مسكت البطانية عندى و قولت ماهى فل و زيها .. ايه الفرق ؟!!!!!!

ربنا يرحمنا بجد من الاعلانات العقيمة دى

تامر علي يقول...

والله بطلت اتفرج على القنوات دي كلها بسبب الشلل الرباعي اللي بيحصل ده ... عالم سخيييييفة جداً .... كل ما اشوف اعلام من دول أقول الله يحرقك يا تميمة ياللي لميتي علينا الواغش ده كله ...كانت فكرة هباب الله يخرب بيته اللي عملها .... طيب الجماعة الاصليين اتلموا وعملوا لنفسهم قناة خاصة للاعلانات دي امتى ربنا هايتوب علينا من المرار ده؟؟

اقوللك حاجه هات 5 حلل يمكن تغتنوا وتفتحوا قناه خاصة وتريحونا :)

البوست تحفة وفكرتة جميلة جداً .. تحياتي :)

احساس طفلة محبة للرومانسية بس واقعية يقول...

ومش بس كده يا سامح .. الحلة الذكية سعتها كبيرة جدا زي مانت شايف .. وممكن تطبخ فيها الخضار والمحاشي بأنواعها وممكن تاخد فرختين وكمان الرز والمكرونة

اية دا امال الحلل بتاعتنا دى لأية مش للحاجات دى طيب لو حصل وعملناها فى غير الحلة الذكية هيصبنا اضرار يعنى ولا اية ؟

دا فيها مقابض عازلة للحرارة كمان وغطاء مناسب هو المفروض مكنش يبقى فيها يعنى ولا اية ؟ امال هى بتسوى الاكل من غير ما يتغطى وممكن تكون بتطير فى الهواء وتحط الاكل فى الاطباق كمان

لا حلة ذكية ذكية بجد
رجاء من الاخ عبد الرحمن السرعة فى الاجابة ويجبلنا حلتين معاه بالمرة

هاهاهاهاهاهاهاهاهاهاهاهاهاهاها
هاهاهاهاهاهاهاهاهاهاهاهاهاها

تقبل مرورى

د. ياسر عمر عبد الفتاح يقول...

طب مقلتش النمرة ليه؟
أنا بصراحة عجبني أوي العرض ده
مع إني مبعرفش أطبخ أساساً
بس عاجبني وعاوز اشتريه

فيه ألوان تانية من الفوط؟


الإعلانات دي بتجيبلي شلل تساعي

Unknown يقول...

قرب يامحترم
قربى ياهانم
اتفرج ياسلااااااام
الحلة الذكية ناعمة
وقوية وكلها حنية!
على البوتاجاز تشتغل
على البابور الجاز تشتغل
على الكانون تشتغل!!!!
اتفرررررررررررررج

hasona يقول...

السلام عليكم

نحن في عصر السرعة
وآفاق السرعة
كذب ونفاق
ليتم تسويق السلع
والاعلانات فيها الكثير من المبالغات
وكلام لو ركزت فيه هيجليك السكر أو المرارة

واختراعات كثيرة لبرامج كثيرة
فكرة ان واحد بيحاول يقتل زوجته
وأخر حلال العقد والجرائم
و0000000
و
و00000000


والاعلانات أحد الوسائل اللي تدفعك الي الشراء وهتحس بمتعة التسوق فعلا عندما تتأكد انه تم النصب عليك
لكن بمزاجك
والضغط اللي كان في الحلة يبدأ يتسرب اليك

ألحق أنا أروح ((أفلسع))قبل الاعلان ما يخلص وقبل المفاجآت الكتيرة دي كلها

تحياتي

Unknown يقول...

ههههههههه
اعلانات خنيقة فعلاً
خصوصاً بتوع قناة الناس
و الأخ اللى شوية يسيب دقنه و شوية يحلقها
شوية يلبس جلابية
و يكلم لغة فصحى
و شوية يلبس قميص زى موضع السبعنيات
ابو يااه عريضة و كبيرة
و يسيب السوالف
حاجة بايخة اوووى
الإعلانات ديه
اخص يا بلد

( آلاء)daughter of egypt يقول...

لالالالا مش يكفي ع التلفزيون


انا لو اطول حد من بتوع الاعلانات الخربانة ديه ممكن اطبق ف زمارة رقابته

وبما انك بقيت واحد منهم فخاف على نفسك وخصوصا انك من طنطا

سلام يا دوك

حسام غانم يقول...

ستيته حسب الله الحمش
=================

آلو يا فندم

شركة الجزرة السعيدة مع حضرتك

مبروك عليكي أول اتصال

بالنسبة للضمان

احنا الضمان بتاعنا عالحلة الذكية

مش يوم ولا اتنين

ولا حتة تلات أيام

لا ده ضمان أسبوووووع كامل

يبقى كده موني صاحبتك متقدرش تغير الحلة للأسف

بس ممكن تشتري واحدة تانية وهنعمل لها خصم عشرين في المية


نورتي يا فندم :)

حسام غانم يقول...

شقاوة مراهقة
============

أهلا بيكي يا شقوة مراهقة في أول زيارة

وإن شاء الله يدوم التواصل


فعلا فعلا الإعلانات دي قمة في التخلف

أنا بحب أقعد أتفرج عليها كنوع من الاستمتاع إن انت مش أعبط واحد في الحياه


نورتي المدونة

MaNoOoSh يقول...

ما اكيد لاوم تبقى الحلة هى اللى ذكية.. علشان هم مستغبيين فيها ومعتمدين على غباء الاخرين

اعلانات تجيب القهر وتغل الواحد من كم الذكاء اللى فيها.


بس برافو عليك.. انا حسيت انى فعلا قدام التلفزيون والاتنين الهبل دول اللى شفتهم مرة وجابولى شلل فيها.. كان هيجيلى شلل بردو زانا بقرأ لولا ستر ربنا.
ههههههههههههههههههه

تسلم ايدك

MǿиY El-Shreef يقول...

ههههههههههههه

والله انا بيجيلي عته منغولي من الناس دي

اول مره اضحك كده يمنى افتكرتني هيست ولا حاجه :)))))))

تحفه اسلوبك ياحسام باشا غانم

وانا عن نفسي اشتريت واحده وزي الفل :))

Butterfly يقول...

ههههههههههههههه
دى اعلانات ممله بشكل ...

ايمان مجدى يقول...

بجد البوست ده ملوش حل
جاااااااااااااامد جدااااااااا
ده الاعلانات دى بجد تفطس من الضحك ....الحلة بتستحمل الحرارة ...امال يعنى بنحطها فى التلاجة
الحلة معاها غطة كمان ....ما هو لازمن يا سيدنا علشان تسوى الاكل
الحلة مساحتها كبير وبتوزع الحرارة كويس .....امال احنا جايبينها ليه يعنى
الغطا ممكن تتغطى بيه ....متشكرين على المعلومة
اللى يغيظ فعلا انهم بيغنوا ويردوا على بعض ...
بحس دايما ان دى الفقرة الفنية والكوميدية للقناة اللى بتذيع الاعلانات دى والمفروض يقولوا ممنوع لكبار السن والمصابين بالقلب ....حرام صحتهم تضيع علشان اعلان
بجد بوست رائع
تحياتى

رؤية يقول...

شاطر يا حسام

^_^

دمك خفيف
واختيارك موفق

تحياتى

غير معرف يقول...

ههههههههههههههههههههههههه
هههههههههههههههههههه

يخرب عقلك هموت من الضحك

لا عنجد عنجد مش قادرة استوعب كمية المميزات الهايلة فيها

ليها غطا وبايدين احمد يارب

ولا كمان فطوة ب3 الوان ياي

حاجة لا تصدق انا هغمى عليي من الفرحة بالحلة الفظيييعة دي

هههههههههههههههههههههههه

ايه رايك انا هشتريها بس عشان اخد الفوطة البنفسجي يمكن افكر اعملها فستان ولا حاجة :)

الا قووولي ايه حكاية 99 بكل حاجة

يعني قصدهم ايه كل اعلان الاقي فيه 99

طيب ما يكملوا المبلغ بينقصوا جنيه عشان الحسد مثلا ؟؟!!

باحييك على البوست الرائع واسلوبك الاروووع

وربي ضحكت من قلبي

دمت بالف خير

المعتصم يقول...

بسم الله الرحمن الرحيم
السلام عليكم ورحمة الله وبركاته
د/حسام
تحياتى
انت مجرم حرب على فكرة
انا اول مره فى حياتى اكمل اعلان من الاعلانات دى للاخر
بس برافو عليك
كده ان شاء الله العروسه الجديده هحطلها شرط انها تكون عندها فى الجهاز الحله الذكيه والفوطه البنفسجيه
هههههههههههههههههههههههههه
انت دماغك دى مالهاش حل
تحياتى ودمت بكل خير وود
والسلام عليكم ورحمة الله وبركاته

صوت من مصر يقول...

ممكن الغساله الى فى العرض
19195
ده الرقم

د/محمد الخطيب يقول...

هههههههههههههههههه

جاااااااااااااامد جدااااااااااااااا

أستاذ مفتاح

ههههههههههههه

جامد بجد

انا بتخنق م الحاجات دى جداااااااا

حسام غانم يقول...

د/عرفه
=======

يبدو إن الموضوع ده كان مستني البوست عشان يفجر كره الناس للبرامج دي

عايزين نعمل مظاهرة عشان نوقفها بقى


منورني دايما عرفة بيه

حسام غانم يقول...

mimi
=======

اوه لالا

مش معقول دي أكيد حلل من الفضاء الخارجي

حافظي عليهم بقى


نورتي البوست ميمي

حسام غانم يقول...

مذكرات مشاغب
==============

ياااااااه يا صقر

ربنا يكرمك يا رب

ده كتير عليا جدا


بس ليه بتقلب القناة بغل يا راجل

ده هي دي الحاجات اللي تتشاف عالتليفزيون

كوميديا


منورني منورني منورني

حسام غانم يقول...

ايوشة
======

ثانكس أيوشة

وخلاص تم الحجز باسمك لعدد واحد حلة ذكية من النوع اللي ممكن نطبخ فيها الأكل

مرور جميل

منوراني دايما

Khaled Selim يقول...

عندك حق والله

إنتا شوفت إعلان الموبايل بتاعهم
يا مغيييييييث
كنت هفقد القدرة على النطق من كتر الإندهاش

قشطة عليك يا حسام

حسام غانم يقول...

ايومي
======

شكرا كتير أيومي

ومعلش عالخنقة اللي البوست سببهالك :)

نورتي البلوج

حسام غانم يقول...

أحمد سعيد بسيوني
=================

الله عليك

هو ده الزبون الحقيقي اللي مقدر قيمة المنتج

مبروك عليك هنعمل لك خصم لو اشتريت تسع حلل

Radwa Amr يقول...

هههههههههههه .... مسخرة بجد بس عجيب أوي الاختراع ده ...أموت و أعرف ازااااااااااي ليييييه ايدين الواحد يشيلها منها و كلوا بقة كوم و الفوطة ده كوم تاني
الواحد كان محتاس من غيرها ...اي و الله :))

بجد بتحس بالسذاجة و الهطل لما تتفرج على الاعلانات ده و يقولوا الشعب المصري اهطل لييه
حلو أوي يا حسام :))

موناليزا يقول...

بغض النظر على ان الشباب مش لاقى شغل واهى الشغلانة دى احسن من غيرها بس مش ده برضه شغل ستات

اقصوصه يقول...

loooooooooooool

حلوه وايد التدوينه

ذكرتني بالقنوات الاعلانيه

ههههههههههههه

ريمان يقول...

ههههههههههههههه


ههههههههههههههههههه


ههههههههههههههههه


انت مالكش حل بجد


فطستنى من الضحك

بس والله وجهه نظر برضه


تحياتى

dr_meeting يقول...

لو التسوق بطريقة عرضك دى يبقى متعة فعلا ....
أنا كل مابفتكر بضحك مع نفسي و اخواتي بيضحكو عليا

well يقول...

لا يهم الشئ الذى سوف تبيعه
ولكن الذى يهم هو كيف سوف تبيعه
كيفية التسويق..كيف تزين هذا الشئ
اعرض الاشياء الجميلة فقط..وامدح فيها
وإياك ان تعرض شئ واحد من عيوبها
لدينا اتصال من عميل....مبروك بدأ مفعول الوهم يشتغل .

حسام غانم يقول...

Sweet Violet
=============

هههههههههههه
ههههههههههههههه

بالظبط كده
يبدو إنها إعلانات للمتخلفين فقط


مرور جميل يا سويت

نورتي البوست

حسام غانم يقول...

تامر علي
=========

يااااه خمس حلل مرة واحدة

يبقى كده يا فندم هنعمل لك خصم عشرة في المية

ألف ألف مبروك عليك

بس رغم إن الإعلانات دي سخيفة

بس الواحد لازم يتفرج عليها برضه

كنوع من تعذيب الذات برضه


نورت البوست يا تامر

حسام غانم يقول...

احساس طفلة محبة للرومانسية بس واقعية
===========================

لا يا إحساس طفلة

الحلل بتاعتكوا دي تقليد ومش أصلي
وكمان مفيهاش كل المميزات

يعني بتقوللي عندكوا حلة لها غطا

طيب هل لها مقبضين زي حلتنا الذكية ؟

هل ليها الشكل الدائري الجذاب ؟

أكيد لأ طبعا


مرور جميل يا إحساس طفلة

منوراني دوما

حسام غانم يقول...

د. ياسر عمر عبد الفتاح
=====================

لا للأسف يا ياسر مفيش ألوان تانية

بس أنا برشحلك اللون البنفسجي هيعمل أحلى شغل في المطبخ


منورني دايما

حسام غانم يقول...

norahaty
===========

هههههههههه

ولو إني مش عارف إيه الكانون ده

إنما الله عليكي

أيوة كده عايزين دعايا

حسام غانم يقول...

hasona
=========

تمام يا حسونة

تعليق أكثر من رائع

أثريت البوست ونورته

حسام غانم يقول...

بدراوى
========

بالظبط

يعملوا اللي يعملوه

بس ميستغلوش الدين في الدعايا بتاعتهم بالشكل ده


مرور جميل يا بدراوي

حسام غانم يقول...

( آلاء)daughter of egypt
=====================

هههههههههه

لأ خلاص أنا آسف مش هعمل كده تاني :)

ارحميني يرحمك ربنا


مرور جميل يا آلاء

حسام غانم يقول...

MaNoOoSh
==========

هههههههههه

بعد الشر عليكي يا ستي

ميرسي على مرورك

نورتي البوست

حسام غانم يقول...

MǿиY El-Shreef
================

ثانكس موني :)

منوراني دايما

ghorBty يقول...

دي وصفه هايله ووصفه سهله

وعرض مالوش مثيل

اضحك الله سنك .. عجبني جدا

بالتوفيق

منــار فايد يقول...

بجد بوست رائع جدا جدا
وضحكني من قلبي
فكرتني بالشلل اللي كل شويه يتعرض على قناه الناس
بس احلى اختراع عجبني المره دي ان الحله لها ايدين
ياراجل دا حل سحري للحروق من الدرجه الاولى....
الحله دي سعرها رخيص جدا كدا ليه مفروض تغلى التريبل



تقبل مروري
منار فايد

Soul.o0o.Whisper يقول...

السلام عليكم و رحمة الله و بركاته

"الحلة الذكية يا جماعة مش زي أي حلة عادية "

"يعني ممكن لو مش بتستخدمها تقدر تزين بيها أي ركن في البيت "

"ده الشكل الدائري بتاع الحلة دي مثالي جدا بحيث متاخدش مساحة في التخزين"

"طيب أنا ملاحظ على جوانب الحلة فيه حتتين بارزين كده يا عبد الرحمن .. إيه دول ؟ مزودة بعدد اتنين مقبض "

"لحلة الذكية سعتها كبيرة جدا زي مانت شايف .. وممكن تطبخ فيها الخضار والمحاشي بأنواعها وممكن تاخد فرختين وكمان الرز والمكرونة"

"الحلة الذكية بيجي معاها غطا للحلة من نفس اللون والمقاس عشان تقدر تغطي الحلة "

" ده هتاخد معاها مجانا .. أيوة مجانا .. الفوووووطة السحرية "

بجد ميتة من الضحك
ربنا يكرمك يارب و يبارك لك

هو تقريبا ماركة ساكح فى السوق كتير الايام دى
الله المستعان





دمت بود

Soul.o0o.Whisper يقول...

ساكح؟؟؟؟

قال ساكح قال

لالالا .. دا تأثير الضحك بس

قصدى سامح

Unknown يقول...

هههههههههههههههههههههههه
هههههههههههههههه
هههههههه بجد بجد والنعمة مش قادرة مضحكش البوست حلو اوى انا بشوف الاعلانات دى بس عالطاير كدة مبقعدش اركز يعنى بس تروح تشوف فيلم وللا برنامج وترجع تلاقيهم لسة بيدللوا على بضاعتهم

Mkjwe يقول...

كل دة علشان حلة , الله يوفقهم يا شيخ

حسام غانم يقول...

Butterfly
==========

ثانكس باتر

مرور جميل

نورتي البلوج

حسام غانم يقول...

ايمان مجدى
============

ههههههههههه

بالظبط كده

هي دي الفقرة الكوميدية بتاعة القناة

بتبقى حلوة والله وفيها مجهود كده


منوراني دايما يا إيمان

ميرام يقول...

ههههههههههههههه
والله انا كنت بتكلم من كم يوم على الاعلان ده
انا بيجيلي شلل منهم
(:
ولا السراير
ولا الملاية العبقرية ..
(: ماتفهمش عبقرية ليه
اللطيف اني كنت بتريق كتير
واقول اكيد مفيش مغفل بيشتري
(:
بس لما اكتشفت حد من المغفلين
صدقت ..(:
اه والله صدقت
(:
انها ذكية
(:
تحيـــاتي ياحسام

حسام غانم يقول...

رؤية
======

هههههههه

ميرسي رؤية

تحياتي ليكي

نورتي البوست

حسام غانم يقول...

ঔღঔ نـــوارة ঔღঔ
================

هههههههههههههه

شكرا ليكي يا نوارة

بالنسبة لسؤال 99

لو بتسألي بجد يعني

فدي حركة نفسية

لما يقول لك الحاجة ب 199 جنيه

انت بتقولي بينك وبين نفسك دي بمية وشوية

بس لو بمتين بتبقى دخلت في كاتيجوري تاني وشريحة تانية

لعبة نفسية في المقام الأول


منوراني دايما يا نوارة

OldCatLady يقول...

و الله يا حسام ما فى حاجة بتقدر فعلا تضغط على أعصابى قد الاعلانات دى...بحس بعد ما بشوفها بطاقة سلبية غير عادية

ليه الاستخفاف بعقل البنى آدم من و هو فى كى جى وان هو القاعدة؟؟؟؟

وحشتنى مدونتك و الله...

حسام غانم يقول...

المعتصم
=========

ههههههههه

اه طبعا اوعى تتنازل عن الفوطة البنفسجية

ميرسي ليك يا معتصم

ربنا يكرمك يا رب

منورني دايما

حسام غانم يقول...

صوت من مصر
==========

ايه ده يا كيمو

انت شكلك من شركة منافسة

امشي من هنا :)


نورت البلوج

حسام غانم يقول...

د/محمد الخطيب
===============

الخطيب حبيبي

أستاذ مفتاح مين ؟

شكرا لمرورك يا واد

حسام غانم يقول...

Khaled Selim
=============

حبيبي يا يحيى :)

الله عليك

أهو هو ده الريأكشن اللي أنا بدور عليه

أحييك يا ابني

استمر

ميرسي ليك وربنا معاك في الامتحانات :(

محمد سعد القويري يقول...

الأخ الفاضل :: حسام غانم ::

بعد التحية

أتيحت لي متابعة إعلانات شبيهة بالتي حاكيتها وجردتها في مقالك الساخر..

وطالما هناك ناس هتدفع ..
أكيد هيكون في ناس بتهررج وتضحك علينا ..

بس السعر مش وحش 999 جنيه
دول ثلاث فوط ومش أي لون ^_^

حسام غانم يقول...

Radwa Amr
===========

أهطل إيه بس يا رضوى

انتي مبتتفرجيش على كرومبو ولا إيه :)


ميرسي ليكي

نورتي البلوج

حسام غانم يقول...

موناليزا
==========

ياااا ستي

معادش فيه حاجة دلوقتي اسمها شغل ستات وشغل رجالة

خلاص الست بقت قاضية وسفيرة ووزيرة

والراجل بقى يطلع في برامج الطبخ :)


نورتي البوست موناليزا

osama44 اسامه 44 يقول...

ههههههههههههه انت شكلك حاجه من اتنيين لمتابع قناة الناس والرحمه لحابب تكون شغال فى الشركه السعوديه للمنتجات العصريه اشكرك جميله جدا

Lady E يقول...

الاعلانات اللي من النوع ده دمها تقيل جدا بس ما شاء الله عليك قدرت توصف كلامهم اللي يجيب شلل ببراعه

اوعى تكون بتاخد نسبة منهم يا حسام :)

القمر الساهر يقول...

ااااااااااه الاعلانات دي بتعصبني

والنار تطلع في دماااااااااااااغي

واللى هاموتواعرفه في ناس بجد بتصدق الكلام دة؟؟؟


يعنى في اعلانطالع الايام دى عن كمبيوتر خرافة

بيتكلم لواحدة

والكاميرا ال ايه هاتخليك تكلم اهلك صوت وصورة بكام بقى يا جدع

599 . والله ولا يسوى 200 جنيه قديم موووووت وامكانياته ما تقومش نملة

بس للاسف ناس بيضحك عليها لانها مش فاهمة

بس تشوغفهم وهما بيعلنوا عن المنتج حاجة سحرية

ربنا يرحمنا من الهبل والنصب دة

Adam يقول...

انا بقي مش بعرف اطبخ خالص

عشان كده الحله مش هاتنفعني

بس الموضوع جميل اوي

تحياتي

ادم

تأثير الفراشة يقول...

السلام عليكم و رحمة الله و بركاته

أول زيارة لى هنا يا دكتور، و الموضوع جمييييل جدااااا، و أسلوبك فيه هايل ما شاء الله
و فعلا معاك حق بخصوص الاعلانات الغريبة دى

تحياتى لحضرتك، بالتوفيق فى الامتحانات إن شاء الله

أبو العريف يقول...

والله يا عم الحسام الناس دي خلاص ناقصين يخرجوا من التلفزيون ويبيعولنا الحاجه بالعافيه
عموما اعمل حسابي في حلتين
بالمناسبه انا عندي واحد صاحبي عنده محل ادوات منزليه
مره كان عايز يبعلي بتاعه كده
بتعمل كل حاجه
بتقشر بطاطس وبصا وتخرط باميه وتلف كرمب
دا كان ناقص يقنعني انها بتقزقز لب

حسام غانم يقول...

اقصوصه
========

شكرا ليكي

أول زيارة للمدونة من الامارات


نورتي البلوج

حسام غانم يقول...

ريمان
======

^_^

ميرسي ريمان

مرور جميل

حسام غانم يقول...

dr_meeting
============

هههههههه

شكرا دكتور ميتنج

نورت البلوج في أول زيارة

حسام غانم يقول...

well
=====

هههههه

الله يبارك فيك

كلامك مظبوط جدا

وبينفذوه بافراط مبالغ فيه


نورت البوست يا ويل

حسام غانم يقول...

ghorBty
========

شكرا جدا يا غربتي

مفتقدين ردودك من فترة


مرور جميل

حسام غانم يقول...

شباك موارب
=============

شفتي يا منار

بنحطم الأسعار تحطيما أهو ههههه


منوراني دايما

حسام غانم يقول...

Soul.o0o.Whisper
==================

ميرسي يا سوول ربنا يخليكي

شكرا لمرورك

منوراني دايما

VÖltaa يقول...

"- فعلا يا سامح .. فوطتنا السحرية تقدر تشيل بيها حاجة سخنة"

يارااااااااجل
طب والحاجات الباردة
تصدق زعلت ^_^

جامدة والله

تسلم يامعلم
دمك عثل يابرنس
وضفتك عندى بقى
وابقى اعترض بقى
ورينى هتعترض ازاى
هع هع

فكرة من الزمن ده يقول...

اهم حاجة في الحلة انه يكون فيها دواير ازاي الاكل يتطبخ من غير دواير

ونسيت الجزمة اللي اول ماتلبسها تمشي في الشارع والملاية اللي بتتفرش على السرير وكمان اللي بيكون معاها الفاجأة اكياس مخدات والمفاجأة الاكبر انهم بيكونوا نفس اللون
وطقم الكبايات اللي بيتصب فيه عصير
وممكن بيبسي وممكن شربات وممكن كمان يتشرب فيه مية وفوق انها رقاصة فهي في الحقيقة بترقص
والله بيصعبوا عليا
جميل اوي البوست ياحسام ضحكتني بجد
اشكرك

حسام غانم يقول...

enjy
=====

هههههههه

حلوة بيدللوا على بضاعنهم دي

منورة المدونة دايما يا إنجي

وربنا يوفقك في امتحاناتك

حسام غانم يقول...

eAi
=====

اه ما هي الفكرة في التهويل بقى

نورت البلوج في أول زيارة

حسام غانم يقول...

ميرام
=======

شاعرتنا الصغيرة

يبدو إن كل الناس مشلولة من الاعلانات دي وكانت مستنية البوست عشان تنطلق :)


منوراني دايما

حسام غانم يقول...

Saydalanya Mat7oona
===================

ميرسي ليكي يا أماني

منتظرة إيه يعني من ناس برامجها المفضلة كرومبو والبيت بيتك والهطل ده
لازم يستخفوا بيهم

نورتي البوست :)

Esraa Hamed يقول...

ههههههههههههههههههههه
و انا كمان رايحة جررررري عشان الحق اجيبلي واحده

حسام غانم يقول...

محمد سعد القويري
====================


ههههههههههه
شكرا لمرورك يا أستاذ محمد

بس احم العرض مش التلات فوط مع بعض

لأ تختار فوطة واحدة من التلاتة :)


منورني دايما

حسام غانم يقول...

osama44
========

هو أنا متابع اه

وكمان لو عندك شغلانة من الحاجات دي يبقى يا ريت

بحب أنا الشغلانات الهبلة دي


نورتني يا أسامة في أول زيارة

وإن شاء الله يدوم التواصل

حسام غانم يقول...

Lady E
========

لا والله شغال لوجه الله

مباخدش منهم فلوس

كله عشان الشعب المصري ومصلحته :)


منوراني دايما يا ليدي

حسام غانم يقول...

القمر الساهر
===============

هههههههههههه

ما هو لازم تبقى امكانياته سيئة جدا عشان يتباع كده

لو كان حلو فعلا كان اتباع زي الناس من غير ما يدللوا عليه كده


نورتي البلوج في أول زيارة

حسام غانم يقول...

Adam
======

لالالالا مينفعش الكلام ده يا آدم

بقولك تحفة فنية

تحفة فنيييييييييية

طب خد الفوطة حتى :)


نورتني يا آدم

حسام غانم يقول...

تأثير الفراشة
===============

وعليكم السلام ورحمة الله وبركاته

شكرا ليكي كتير يا تأثير الفراشة

حلو الاسم بالمناسبة

نورتي البوست

حسام غانم يقول...

أبو العريف
=============

هم لهم فعلا ابتكارات حلوة

زي البتاعة اللي بتلف المحشي دي

والمساحة اللي بتمتص المية دي أول ما طلعت

إنما يبيعولي حاجات عاديييييييية ليه ؟

منورني دايما يا أبو العريف

حسام غانم يقول...

Mo7ammed
===========

شكرا ليك يا محمد

نورتني في أول زيارة

وإن شاء الله يدوم التواصل

حسام غانم يقول...

فكرة من الزمن ده
=================

هههههههههههههههههههههههه

ميرسي يا فكرة

منوراني دايما

حسام غانم يقول...

Esraa Hamed
==============

أيوة كده

هو ده الكلام

يا ريت كل الناس زيك :)


نورتي البوست يا إسراء

mahasen saber يقول...

الناس دى مش مدركه ان العبره مش فى الحله

العبره باليى هيتحط فيها
ده لو لقيت ست البيت حاجه اصلا تحطها فيها بعد التسمم الغذائى اليى احنا اتزرعنا فيه ده

mahasen saber يقول...

الناس دى مش مدركه ان العبره مش فى الحله

العبره باليى هيتحط فيها
ده لو لقيت ست البيت حاجه اصلا تحطها فيها بعد التسمم الغذائى اليى احنا اتزرعنا فيه ده

Unknown يقول...

هههههههههههههه

فكرتني بالاعلانات المتخلفة دي اللي بتيجي للأسف على القنوات الدينية أياها

مفاجأة النهاردة تلفون محمول والمفاجأة الكبرى أنه (( بيرن ))

تقبل تحياتي ومروري

ويبقى التواصل

Kiara يقول...

هههههههههههههههههههههههههههه

موتني من الضحك

انا فعلا بتشل منهم وكمية اعلانات لايمكن بجد ايه دا

حسام غانم يقول...

mahasen saber
==============

صح طبعا

شكرا لمرورك مدام محاسن

نورتي البوست

حسام غانم يقول...

معتز شاهين - باحث تربوي
========================

ههههههههههه

فعلا إعلانات المحمول دي من الحاجات اللي بتشلني بشكل خاص


مرور جميل أستاذ معتز

نورت البوست

حسام غانم يقول...

كيــــــــــــارا
=================

إعلانات قمة في السخافة فعلا

نورتي البوست يا كيارا

لاسع افندى يقول...

لو سمحت حضرتك نسيت تكتب الرقم
ده اختراع عبقرى مايتفوتش حله مدوره وغطاها مظبوط عليهاوكمان ايدين ناقص تقولى ان الغطا ليه مقبض يتمسك منه ارجوك اكتب الرقم بسرعه



تحياتى

المحرر يقول...

السلام عليكم
السيد حسام غانم تحية طيبة
فريق مجلة رؤية مصرية يتقدم بدوعة خاصة لشخصك الكريم للإنضمام إلى أسرة تحرير المجلة واثراء المجلة بفكركم الواسع ورؤيتكم بناء على ما وجدناه في صفحة مدونتك الكريمة
ننتظر ردك خاصة وأن المجلة تخوض معركة تغيير كبيرة جدا للانتقال من مرحلة الميلاد للنضوج الفكري بشكل جدي جدا
ننتظرك

منسق أعمال المجلة

المحرر يقول...

بريد المجلة للتواصل معنا
roaua.com@gmail.com

حسام غانم يقول...

لاسع افندى
==========

فعلا الغطا له مقبض يتمسك منه

بس دي كنا سايبينها مفاجأة بقى


نورتني يا لاسع افندي :)

حسام غانم يقول...

roaua
======

إن شاء الله سيتم التواصل معكم

mahasen saber يقول...

يا عم حسام بيصوتوا فى اللينك اليى بعته ازاى

انا جيت اسيبلك تعليق معرفتش

انا اؤؤيد حسام الترزى بكل حياديه

حسام غانم يقول...

mahasen saber
===============

فيه تصويت عاليمين في الموقع كده

بتعلمي فيه بس

شكرا على تأييدك بكل حيادية :)

غير معرف يقول...

حسام انت غايب ليه؟
وعلى فكرة في مدونات مفتقدة تعليقاتك من فترة.

حسام غانم يقول...

معلش والله أنا مطحون في الامتحانات الفترة دي

وإن شاء الله لما أخلص أحاول أتابع اللي فاتني في المدونات

شكرا لسؤالك :)

هراء لا داعى له ..... يقول...

عزيزى يمكنك أن تتلاعب بالشعوب الحمقاء كما تريد

فقط أخبرهم أن ذلك الصندوق به الكثير من

ال ( الويز فرانكل ) المصصم بأعلى

تكنولوجيا أوروبية و الحاصل على الأيزو C 7000

و ستجد الكثيرون يتوسلون إليك بأن تنعم عليهم بقبول نقودهم المتواضعة مقابل ال ( الويز فرانكل )


***********

رائع يا حسام

حسام غانم يقول...

GHALLAB 55
============

هههههههههه

أقول ايه .. مجنون فعلا

صح جدا جدا


منور