السبت، 14 مايو، 2011

عن إضراب الأطباء



نتكلم شوية عن إضراب الأطباء اللي بيقولوا عليه ده
بداية كده نحب نوضح شوية حاجات لإخوانا القادمين من الفضاء الخارجي .. الطبيب ده هو الشخص اللي بيكشف على المريض ويشخصه ويكتبله العلاج أو يعمل له العملية
ثانيا نحب نوضح إن الطبيب عشان يبقى طبيب بيدرس في حاجة اسمها كلية الطب ودي مدة الدراسة فيها سبع سنين ده غير التكليف والنيابة وخلافه إضافة طبعا إلى إنها بتاخد أعلى مجموع في الثانوية العامة
ثالثا وزير السياحة أصدر قرار بتحديد حد أدنى لأجور المرشدين السياحيين ب300 جنيه في اليوم و200 جنيه في النص يوم .. ناخد بالنا مع بعض .. في اليوم هه .. اللي هو ال24 ساعة العادي اللي احنا عارفينه ده مش في الشهر

كده بقى أخونا القادم من الفضاء الخارجي فاهم الأساسيات ويقدر يشارك معانا في النقاش .. رحبوا بيه يا ولاد

نبذة تاريخية :)
على مر التاريخ كان دايما دايما فئة الأطباء من الفئات اللي لها مكانة اجتماعية عالية على السلم الاجتماعي .. ومع تطور التاريخ وتغير النظم والظروف كانت بتحصل تقلبات وتغيرات في السلم الاجتماعي ده .. شوية يعلى شأن العسكريين في السلم .. شوية رجال الدين .. شوية رجال الصناعة .. شوية المعلمين .. إلا إن دايما دايما فئة الأطباء محافظة على موقعها في السلم الاجتماعي ..
وده كان صحي جدا ومنطقي
الأطباء دول شريحة منتقاة من النابغين .. ثم بعد كده عشان يبقى مسموحله يعالج مريض لازم يدرس كتير جدا .. ثم يستمر يدرس طول حياته تقريبا
معادلة بسيطة .. تعب كبير يساوي مكانة كبيرة
المشكلة حاليا بقى إن في الفترة الأخيرة بدأ السلم يتلخبط
بدأت فئة الأطباء تنزل شوية بشوية في السلم
لحد ما وصلنا إن فئات كتير سبقتهم آخرهم أهو المرشدين السياحيين
الوضع بقى حاليا مش منطقي وفوضوي والميزان اختل
بقى الواد اللي بيذاكر ويجيب 100% ويدخل طب ده غبي
واللي يجيب 60% ويدخل شرطة ولا يجيب مش عارف كام ويدخل سياحة أحسن منه
وده هيبقى كارثة بعد كده
إيه اللي هيخلي واحد يختار حاجة تعبها كتير وعائدها قليل
طالما قدامه الحاجة الأسهل وكمان عائدها أعلى
ده كان المطلب الأول للإضراب .. المرتبات
المرتبات فعلا مهزلة بلاش أقول لكوا يعني
اليوم بعشرة جنيه باين .. اللي هو لو اديتهم للسباك ولا الكهربائي نظير شغل نص ساعة مش هيرضى بيهم
ومش عارف لما تتجوز يزودولك مرتبك 3 جنيه باين
واللي يدور عن مرتبات الأطباء بره هيعرف
كله مش عارف كام ألف دولار .. حتى الدول العربية .. وهنا مبيكملوش 100 دولار يعني
قلة أدب

تاني حاجة .. الأمن
مينفعش دكتور ( اللي هو اتفقنا إنه حلو وعظيم ومفيش منه )
يخش عليه بلطجية معاهم واحد مصاب يقولوله خيطه ياض بدل ما نغزك
أو إن بلطجية متخانقين مع مريض في المستشفى يخشوا يدوروا عليه ويقتلوه جوه زي ما حصل في مستشفى المطرية
أظن متفقين عليها دي .. على الأقل الدكتور والمرضى يبقوا آمنين على حياتهم يعني

تالت حاجة .. ميزانية الصحة
الميزانية الحالية 3ونص في المية من ميزانية الدولة
ومعظم الميزانية كان رايح للحرس الجمهوري والأمن المركزي والكلام ده
المنظمات العالمية محددة نسبة 15 في المية كنسبة مثالية للصحة
وفي كل دول العالم ماشيين عليها
مش معنى كده إننا لو طبقناها إن مستشفياتنا هتبقى زي أمريكا
لأ .. دي نسبة من ميزانية الدولة .. وهم ميزانيتهم أكبر
بس يبقى فيه نسبة وتناسب
وده هيعود على الخدمة الصحية بشكل عام
مينفعش يبقى معظم الخدمة الصحية عندنا يقدمها القطاع الخاص من مستشفيات خاصة وعيادات خاصة
عشان المستشفيات مفيهاش حاجة .. والتحاليل مش موجودة والخيوط وحاجات كتير
لما الميزانية تتظبط يبقى المريض يقدر يحصل على خدمة صحية عالية الجودة في المستشفيات ويتعمل له تحاليله وأشعاته مجانا
رابعا إقالة القيادات الفاسدة
مينفعش الشخص اللي كان بينقل بلطجية في عربيات الإسعاف وبيديهم وجبات من المستشفيات يبقى وزير الصحة


طيب دي المطالب
فيه ناس بتقول أيوة المطالب مشروعة وكل حاجة .. إنما مينفعش إضراب يعني .. المرضى إيه ذنبهم
الأفضل ناس تروح تقابل المسئولين وتطرح المشاكل والسكك المشروعة المطالب الفئوية والكلام ده
تمام .. والكلام ده تم فعلا بدل المرة ألف ومفيش استجابة .. عشان كده كان التفكير في الإضراب .. وبعدين برضه الإضراب حاولنا إنه يكون ميجيش خالص على مصلحة المرضى .. إن الإضراب لا يشمل الطوارئ والرعاية الحرجة .. إضراب جزئي يعني .. يعني اللي متعور أو عليه ألم جامد وكده هنعالجه طبيعي جدا .. اللي مش هيشتغل بس الحاجات اللي عادي تتأجل لتاني يوم .. يعني واحد عايز يكشف أنف وأذن ولا حاجة عادي ييجي تاني يوم يعني .. هو مجرد رمز مش أكتر .. كان الإضراب الأول إضراب جزئي ليوم واحد يوم 10 مايو .. وبعد كده هيبقى فيه إضراب جزئي مفتوح من يوم 17 مايو .. المشكلة بقى لو مبقاش فيه تحرك بعدها برضه .. ممكن دكاترة خلاص تقول أنا مش شغالة خالص ويبقى إضراب كلي والعيان يتضر .. إنما يعني ما يقدر عالقدرة ..
أنا شخصيا لسه مش عارف بعد الإضراب الجزئي هعمل ايه .. إنما غالبا هشتغل عادي .. صعب جدا يبقى عيان بيموت قدامك وانت تقدر تنقذه وماتنقذوش .. وأرضى بنصيبي بقى وخلاص والحياه تمشي ..
وممكن أفكر أتجوز .. أنا أولى بالتلاتة جنيه برضه ..

هناك 19 تعليقًا:

keblawy يقول...

ايه الحلاوه دى يا حسام ..

مش طالع فى صورة الساحل ليه ؟؟؟

المهم ان اللى بيبوظ الاضراب ده والمطالب دى هم الاطباء نفسهم


اولا .. شيوخ المهنة مش حاسين بحاجه ،، بالعكس انت لو حاولت تفهمه دلوقتى ان الوضع القائم ده غلط ممكن ميقتنعش

وفيه آخرين عندهم منطق " مانا اتبهدلت وانا صغير .. يتبهدلوا هم كمان " واللى بيفكروا كده مش قليلين


ثانيا .. عندك الناس بتوع المريض المصرى المسكين اللى الـ verruca هتموته اذا مشالهاش النهارده

ودول كتير منهم من الدكاتره الصغيرين اللىن فس الشخص اللى شال ال verruca هيثبته بمطوه فى الاستقبال تانى يوم


ثالثا ...

ودى عشان محدش ياخدها على صدره أوى يعنى ،، موجوده فى نسبه مش الكل من الاخوان و السلفيين


الاخوان اللى بيحكمهم مكتب الارشاد

والسلفيين بيحكمهم مشايخهم


والاتنين عندهم روحوا يمين يبقى يمين .. روحوا شمال يبقى شمال


كنا بنتحاور حوار ودى أشبه بخناقه مع احد نواب النيورو يوم 10 ( وهم العياده الوحيده عندنا اللى خالفوا واشتغلوا )

النايب كان سلفى ..

يا عم الحاج ،، يقلك الشيخ ياسر البرهامى قال

والشيخ ماله لا مؤاخذه اصلا ؟ احنا بناخد آراء شيوخنا ف كل حاجه

طيب ما الراجل ده سلفى اهه ومضرب ،، ده مبياخدش بآراء شيوخه

ثم اتمها ..

"احنا جموع أطباء السلفيين والاخوان مش هنشارك فى الاضراب ،، مش دى الديمقراطيه ،، "


المهم ما علينا


انا اذا كنت رئيس الوزرا

مش هعبركم ،، وهطنشكم اكتر مما انا مطنش دلوقتى - مش عارف ازاى .. بس هتصرف يعنى -

وف الآخر المتحمسين هيزقوا ،، وزمايلهم هيثبطوهم ويقعدوهم


نايس توبيك على فكره

حسام غانم يقول...

قبلاوي بيك
------------
منور المدونة كالعادة

حتة شيوخ المهنة دي فهم ببساطة شيوخ المهنة .. مستفيدين يعني من الوضع الحالي

بالنسبة للسلفيين دول والله أنا مش عارف بيفكروا ازاي
محدش بيفكر بعقله في حاجة كله ورا المشايخ
على نهج وجدنا آباءنا هكذا يفعلون


يا سيييييييييييدي

موناليزا يقول...

بجد..ربنا معاكم

Khaled Selim يقول...

غانم .. قبلاوي .... تحياتي

Khaled Selim يقول...

واحشيني جداً على فكرة

حسام غانم يقول...

موناليزا
------------

نورتي المدونة كالعادة
وشكرا عالدعاء .. آمين يا رب
بس هو احنا بقينا مثار للشفقة أوي كده :))

حسام غانم يقول...

Khaled Selim
--------------
انت أكتر يا يحيى والله
عملت ايه في الخاصات
اتعلمت ولا قعدت :)

Khaled Selim يقول...

معملتش أي حاجة
اللهم كام محاضرة أشعة وكام مؤتمر في القاهرة

حسام غانم يقول...

Khaled Selim
--------------

حلاوتك

غير معرف يقول...

أنا مش عارفة إذا كانت العيادات و المستشفيات الخاصة مشاركة في الإضراب و لا لأ ..
بس في ناس بتقول من الرافضين للإضراب إن الإضراب دا ضد ( المريض المصري المسكين ) اللي بيروح المستشفى العام و محلتوش حاجة
لكن هو لو معاه فلوس و راح لنفس الدكتور المضرب دا في نفس يوم الإضراب بالليل في عيادته الخاصة هيعمله اللي هو عايزه
و عشان كدا المضربين دول وحشين و جشعين ..!

Saydalanya Mat7oona يقول...

الإضرابات الحالية على قد ما معظمها منطقى إنما هى مشكلة

إضراب الأطباء أنا اعتبرته إنسانى لحد كبير و احترمته جدا...بس مشكلته هتظهر وقت التصعيد إن حصل.....من حق الأطباء إنهم ياخدوا حقوقهم كاملة مينقصهاش حاجة لكن فى الوقت الحالى بالظروف الحالية مش هياخدوا حاجة غير وعد لأن ظروف البلد مش هتسمح بأكتر من الوعد

الإضراب هيبقا أوقع لما تكون البلد أقوى...على الأقل لما يسيب حكمها المجلس العسكرى

كده و لا كده متأكده إن حقوقكم هترجعلكوا قريب.....عشان مينفعش ميرجعش


حلو الموضوع

سلامات كده
:))

حسام غانم يقول...

غير معرف
-----------
وده من أهداف الإضراب
إن تتحسن المستشفيات الحكومية ويتحسن مستوى الدكاترة
عشان ميبقاش الطبيب مهتم بس بعيادته عشان هي مصدر رزقه
مفيش كده في أي حتة في الدنيا
المفروض شغلك الأساسي يعيشك كويس وبالتالي تشتغل فيه كويس

نورتي المدونة

حسام غانم يقول...

Saydalanya Mat7oona
----------------------

منورة المدونة كالعادة

هو ظروف البلد صعبة اه معاكي
إنما المطلب مش إن الحكومة تدي كل طبيب الفرق بين مرتبه الجديد والقديم بأثر رجعي مثلا
فالمبلغ يبقى كبير مرة واحدة ومش متوفر

هو المطلوب تعديل للميزانية عشان اللي جاي
وهي نسبة مش مطلوب فلوس زيادة من الهوا
المية في المية ثابتة
واللي هيزيد هنا هيقل هنا
وفيه أماكن صرف كتير غير منطقية لها نسب كبيرة في الميزانية

وبعدين الوضع الحالي دكاترة كتير مش قادرة تشتغل ساعة إضافية لما تلاقي زميلهم بينضرب ومفيش أمن
وهم مش جايلهم منها حاجة يعني

مصر اليوم يقول...

يه الحلاوه دى يا حسام ..

Zawag alnaddy زواج النادى يقول...

السلام عليكم ورحمة الله وبركاته جزاكم الله خيرا على هذا الموضوع الجميل ومن قلبي بدعى ان اى حد هنا ربنا يرزقه بزوج او زوجه ويبقي تعارف فى الحلال ** بجد موضوع جميل ومشوق... بارك الله فيكم يا شباب

Entrümpelung يقول...

شكرا على الموضوع

Entrümpelung يقول...

شكرا على الموضوع

Räumung يقول...

شكرا ع الموضوع

العاب فلاش يقول...

well done